2024 წლის ნოემბერში, თბილისის უძრავი ქონების ბაზარზე 3,560 ბინა გაიყიდა. თიბისი კაპიტალის საცხოვრებელი უძრავი ქონების განახლებული მიმოხილვის მიხედვით, 2024 წლის ოქტომბერთან შედარებით, ნოემბერში ბინების ტრანზაქციები თვიურ ჭრილში 3%-ით შემცირდა, ხოლო წლიურად ზრდამ 10%-ს მიაღწია.

„ტრანზაქციების კუმულაციური რაოდენობა 2024 წლის 11 თვის განმავლობაში 2%-ით აღემატებოდა გასული წლის იმავე პერიოდის მაჩვენებელს. ნოემბერში გასაყიდმა ფასმა $1,247-ს მიაღწია, რაც წლიურად 4%-იან ზრდასა და თვიურად მცირე 0.4%-იან კლებას აფიქსირებს. ბაზრის მოცულობამ $290 მილიონი შეადგინა 15%-იანი ზრდა აჩვენა“, - ნათქვამია მიმოხილვაში.

მიმოხილვის ავტორების ინფორმაციით, 2024 წლის ნოემბერში 846 ახალი ბინა გაიყიდა, რაც წლიურ ჭრილში მნიშვნელოვანი, 40%-იანი, გაუმჯობესება იყო, ხოლო 2024 წლის ოქტომბერთან შედარებით მაჩვენებელი 10%-ით გაიზარდა. ძველი ბინების შემთხვევაში 2,714 ტრანზაქცია შესრულდა, რაც წლიურად 3%-იან ზრდასა და თვიურად 6%-იან კლებაში აისახა.

„შედეგად, ახალი ბინების წილმა ჯამურ გაყიდვებში მიმდინარე წლის განმავლობაში ყველაზე მაღალ ნიშნულს, 24%-ს მიაღწია. ნოემბერში საშუალო გასაყიდი ფასი ახალი ბინებისთვის წლიურად 9%-ით გაიზარდა, ხოლო გასულ თვესთან შედარებით 3%-ით შემცირდა. რაც შეეხება ძველი ბინების ფასებს, დაფიქსირდა 5%-იანი წლიური ზრდა“, - აღნიშნულია მიმოხილვაში.

ნოემბერში ყველაზე მეტად 50-დან 75 მ²-მდე ფართობის ბინები იყიდებოდა, რომელზეც გაყიდვების 42% მოდიოდა, თუმცა მაჩვენებელი როგორც გასულ წელთან, ისე გასულ თვესთან შედარებით შემცირდა. 125მ²-ზე მეტი ფართის მქონე ბინების წილმა კვლავ 4% შეინარჩუნა, რაც 2023 წლის ნოემბერთან შედარებით 1 პროცენტული პუნქტით ნაკლებია. ნოემბერში მაღალი (>1,500$/მ²) საფასო სეგმენტის ბინების წილმა მთლიან ტრანზაქციებში 23% შეადგინა (+5პპ,წ/წ).