თიბისი კაპიტალის საცხოვრებელი უძრავი ქონების მიმოხილვის მიხედვით, თბილისში ბინების გაყიდვების მეოთხედი დიდ დიღომზე მოდის.

იანვარში ბინების გაყიდვები 6%-ით შემცირდა, გასაყიდი ბინების საშუალო ღირებულება კი მცირედ - 1%-ით გაიზარდა. ჯამში თბილისში 225 მილიონის ღირებულების 2 796 ბინა გაიყიდა. ტრანზაქციების 74% ძველ ბინებზე მოდის, რომელთა გაყიდვების შემცირებამაც იანვარში, უძრავი ქონების ბაზარზე შენელება გამოიწვია.

რაც შეეხება უბნებს, იანვარში, დედაქალაქში ყველაზე მეტი ბინა დიდ დიღომში გაიყიდა, რაც საერთო ტრანზაქციების 25% იყო. გაყიდვების რაოდენობით მეორე ადგილს 16%-ით საბურთალო იკავებს.

"ახალი ბინების გაყიდვებში მნიშვნელოვანი წლიური ზრდა დაფიქსირდა ჩუღურეთსა და გლდანში, ძირითადად საბაზო ეფექტის გამო. რაც შეეხება დიდუბესა და კრწანისის უბნებს, აქ ახალი ბინების თანაბარი წლიური ზრდა დაფიქსირდა. მიუხედავად იმისა, რომ უბნების უმრავლესობაში ძველი ბინების გაყიდვები წლიურ ჭრილში შემცირებულია, კრწანისში მნიშვნელოვანი ზრდა აღინიშნება, რაც უმეტესწილად საბაზო ეფექტით იყო განპირობებული", - ნათქვამია მიმოხილვაში.

თიბისი კაპიტალის მონაცემებით, საცხოვრებელი ბინების ღირებულების მიხედვით, იანვარში, ყველაზე მაღალი მ²-ის საშუალო ფასი დაფიქსირდა მთაწმინდასა და ვაკეში, სადაც ფასი $1 800-ის ფარგლებში მერყეობდა. ორივე უბანში გაყიდული ბინების 60%-ზე მეტი მაღალი - (> 1 500 $/მ²) საფასო სეგმენტის ბინების კატეგორიას განეკუთვნებოდა.