ელექტრომობილების ერთ-ერთი უდიდესი მწარმოებელი, ჩინური BYD მომხმარებლებს კიდევ ერთ რევოლუციურ სიახლეს სთავაზობს. BYD-ის წარმოების ავტომობილები, ამიერიდან, აგრეთვე ჩინური DJI-ის დრონებით აღიჭურვება. კომპანიებმა შექმნეს ჭკვიანი სისტემა, სახელწოდებით Lingyuan, რომელიც ავტომობილის სახურავში მაგრდება და სურვილისამებრ, დრონს უშვებს. სისტემა, რომელიც დრონისგან, მისი დასამუხტი სადგურისგან და დამატებითი აპლიკაციებისგან შედგება, ამ დროისთვის, მხოლოდ ჩინეთში არის ხელმისაწვდომი და მისი ფასი $2,200-ია.

როგორც ShanghaiEye-ის YouTube-ის არხზე გავრცელებულ ვიდეოში ვხედავთ, მას შემდეგ, რაც მძღოლი ბორტკომპიუტერის ეკრანზე დრონის გაშვების ფუნქციონალს აირჩევს, ავტომობილის სახურავი გაიხსნება, იქიდან კი დრონი ამოფრინდება, რომელიც საკუთარი მისიის შესრულების შემდეგ იმავე ადგილას, სპეციალურ დასაფრენ ადგილას დაეშვება. დრონი, რომელიც AI-ით იმართება, გაჩერებულ და 25 კმ/სთ-მდე სიჩქარით მოძრავ ავტომობილზე მუშაობს. მისი მაქსიმალური სიჩქარე 54 კმ/სთ-ია, ხოლო დაბრუნება დრონს ორკილომეტრიანი რადიუსში შეუძლია.

შეგახსენებთ, რომ დრონებით BYD-ში ამ დრომდეც ერთობოდნენ. პირველი ავტომობილი, რომელშიც BYD-მ დრონი ჩააინტეგრირა დიდი ზომის ყველგანმავალი U8 SUV იყო, მაგრამ მის შემთხვევაში სისტემა გაცილებით დიდი და მოუქნელი იყო, ვიდრე თანამედროვე ვარიანტი, რომელიც ჩინურმა კომპანიამ ახლა წარმოადგინა. ცოტა ხნის წინ, მსგავსი ფუნქციონალი კიდევ ერთმა კომპანიამ, აგრეთვე ჩინურმა XPENG-მა წარმოადგინა, მაგრამ ამ ავტომობილში დრონი უფრო დიდი ზომისაა და ის საბარგულიდან ამოდის.