"ოცნების" მთავრობამ სტიქიის შედეგების სალიკვიდაციო ღონისძიებისთვის გამოყოფილი თანხა 9-ჯერ გაზარდა და მუნიციპალიტეტების ჩამონათვალი გააფართოვა.

28 თებერვალს გამოქვეყნებული განკარგულებით, რომელსაც ხელს ირაკლი კობახიძე აწერს, ცვლილება შევიდა საქართველოს მთავრობის 2025 წლის 30 იანვრის 186-ე განკარგულებაში. იანვრის ბოლოსთვის მთავრობამ მხოლოდ 8 მუნიციპალიტეტისთვის რეგიონებში განსახორციელებელი პროექტების ფონდიდან სტიქიური მოვლენების სალიკვიდაციო ღონისძიებებისთვის 6 400 000 ლარი გამოყო.

მთავრობის 2025 წლის 28 თებერვლის 383-ე განკარგულებით კი ფინანსთა სამინისტრო, 37 მუნიციპალიტეტს, საქართველოს რეგიონებში განსახორციელებელი ფონდიდან 58 517 000 ლარს გამოუყოფს. ამასთან, ის თანხა რაც მუნიციპალიტეტებს სტიქიის სალიკვიდაციო ღონისძიებებიდან მორჩებათ, სხვა სტიქიური მოვლენების შედეგების სალიკვიდაციო ღონისძიებებისთვის უნდა მიმართონ.

განსხვავებული მოცულობის თანხები გაწერილია ზუგდიდის, ხარაგაულის, გურჯაანის, სიღნაღის, ახალციხის, საგარეჯოს, ბორჯომის, ახმეტის, სენაკის, ხონის, ბაღდათის, გორის, თიანეთის, თერჯოლის, წალენჯიხის, კასპის, ლანჩხუთის, ოზურგეთის, ლენტეხის, მარნეულის, ლაგოდეხის. ყვარლის, ჩოხატაურის, ვანის, მარტვილის, ჩხოროწყუს, ცაგერის, ქუთაისის, თეთრიწყაროს, ამბროლაურის, საჩხერის, ხაშურის, ზესტაფონის, თელავის, ადიგენის, დედოფლისწყაროს, გარდაბნის მუნიციპალიტეტებისთვის.