დონალდ ტრამპმა აშშ-ში იმპორტირებულ თითქმის ყველა საქონელზე მინიმუმ 10%-იანი ტარიფი და ყველა იმპორტირებულ ავტომობილზე 25%-იანი ტარიფი დააწესა.

მან შედარებისთვის დიაგრამაც აჩვენა, რომელზეც სხვა ქვეყნების მიერ აშშ-ის მიმართ დაწესებული ტარიფებია ნაჩვენები და ამერიკულ ტარიფებთანაა შედარებული.

მაგალითად, ჩინეთს ამერიკულ საქონელზე 67%-იანი ტარიფი აქვს დაწესებული, ხოლო აშშ-ის მხრიდან ჩინეთს 34%-იანი ტარიფი დაუწესდება. ევროკავშირზე - 20%, ვიეტნამზე - 46%, ტაივანზე - 32%, იაპონიაზე - 24%, ინდოეთზე - 26%, სამხრეთ კორეაზე - 25%, ტაილანდზე - 36%, შვეიცარიაზე - 31%, ინდონეზიაზე - 32%, მალაიზიაზე - 24%, დიდ ბრიტანეთზე - 10%, ისრაელზე - 17%, სამხრეთ აფრიკაზე - 30%. საქართველოს, სომხეთის, აზერბაიჯანის, უკრაინის და თურქეთის მიმართ 10%-იანი ტარიფი იმოქმედებს.

ამასთან, ტრამპის თქმით, იმ კომპანიებისთვის, რომლებიც თავიანთ პროდუქტს აშშ-ში აწარმოებენ, ტარიფები არ დაწესდება. ტრამპმის თქმით, ეს გადაწყვეტილება აშშ-ის ეკონომიკის წინსვლას შეუწყობს ხელს.

საბაზისო 10%-იანი ტარიფები ძალაში 5 აპრილს შევა.

მოგვიანებით, თეთრ სახლში განმარტეს, თუ რატომ არ არის ტრამპის ტარიფების სიაში ისეთი ქვეყნები, როგორებიცაა რუსეთი, ბელარუსი და ჩრდილოეთ კორეა. თეთრი სახლის პრესმდივნის, კეროლაინ ლევიტის თქმით, რუსეთი არ არის სიაში, რადგან აშშ-ის მიერ დაწესებული სანქციები "რამე მნიშვნელოვან ვაჭრობას გამორიცხავს", გარდა ამისა, მათ მიმართ არსებული გადასახადები და სანქციები უკვე "ძალიან მაღალია".