notnews ganivi3 

    რუსა ხავთასი

    ყოფილი პრემიერ-მინისტრი გიორგი კვირიკაშვილი რუსი ჟურნალისტის ვლადიმირ პოზნერის თბილისში ვიზიტს სოციალურ ქსელში ეხმაურება:

    "პოზნერის ვიზიტზე - თავშივე ვიტყვი: ჩემთვისაც, როგორც საქართველოს მოქალაქისთვის, ქვეყნის ტერიტორიული მთლიანობა და გადაწყვეტილების სუვერენულად მიღების უფლება ხელშეუხებელი ფასეულობაა, შესაბამისად, ნებისმიერი ადამიანის შეხედულება თუ გამონათქვამი, რომელიც პროპაგანდირებს საპირისპიროს, მიუღებელია და ისევე აღმაშფოთებელი, როგორც ყველა ქართველი პატრიოტისთვის. ასევე შეუძლებელია მოიწონო ანტიპანდემიური წესების დემონსტრატიულად დარღვევა.

    ახლა ცოტა მეტი პრაგმატიზმით შევხედოთ ამ მოვლენას:

    არაეკონომისტებისათვის ზედმეტად გავამარტივებ და მიზეზებზე არ შევჩერდები, ვინაიდან პოლიტიზირება შორს წაგვიყვანს - ქართული ვალუტის კურსი ძირითადად იმ 4 მატერიალურ ფაქტორს უჭირავს, რომელიც ქვეყანაში უცხოური ვალუტის შემოსვლას განაპირობებს:

    1. ექსპორტი
    2. უცხოური ინვესტიციები
    3. ფულადი გზავნილები
    4. ტურიზმი

    მეხუთე - არამატერიალური ფაქტორი - რომელიც განაპირობებს სრული დოლარიზაციისგან თავის შეკავებას და ანაბრების მნიშვნელოვანი მასის ეროვნულ ვალუტაში შენახვას, გახლავთ ადამიანების მოლოდინები და ზოგადი ოპტიმიზმის დონე. 

    უცხოურ ინვესტიციებში არსებული მნიშვნელოვანი ჩავარდნის ნაწილობრივ მაინც დასაკომპენსირებლად მთავრობას გააჩნია ერთადერთი მოკლევადიანი ინსტრუმენტი - ტურიზმი, ვინაიდან ექსპორტზე ზეგავლენა მოკლე ვადაში პრაქტიკულად შეუძლებელია, ხოლო ფულადი გზავნილების რაოდენობაზე მთავრობას არანაირი ბერკეტი არ გააჩნია. პრივატიზაციის გზით ინვესტიციების მიღებაც არსებულ სიტუაციაში ურთულესი ამოცანაა. მეხუთე, არამატერიალურ ფაქტორს რაც შეეხება, მოსახლეობის ოპტიმიზმშიც ვერ გვაქვს საქმე კარგად.

    დარჩა ტურიზმი, რომლის დაბრუნებაც პანდემიამდელ მაჩვენებელზე გლობალური გამოწვევაა; იმ მწირი დებატიდან, რაც საქართველოს ტურიზმში შემორჩა, ყველაზე მნიშვნელოვანი ეფექტის მიღება შეიძლება მხოლოდ იმ ქვეყნებიდან, ვისთანაც სახმელეთო საზღვარი გაგვაჩნია. ამ ოთხი ქვეყნიდან შემოსულ ვიზიტორთაგან ტურისტის პროპორციული შემადგენელი ყველაზე მაღალი რუსეთიდან გვაქვს. ეს ყველაფერი მშრალი ფაქტებია.

    შესაბამისად, წუხანდელი საღამო და ის ზღვარგადასული რეაქცია, რაც ვიხილეთ, გარდაუვალად დააზიანებს დარჩენილთა შორის ვალუტის შემოდინების იმ უმსხვილეს უცხოური ვალუტის ნაკადს, რაც შეიძლებოდა მიგვეღო რუსეთიდან უმეტესად სახმელეთო, და ასევე საჰაერო გზით შემოსული ტურისტებისგან.

    სამწუხაროდ, შედეგი სავალალო იქნება: საქართველოს გაჭირვებული მოსახლეობისთვის (არა მარტო მათთვის, ვინც ტურიზმით პირდაპირ თუ ირიბად სარგებლობს) ისედაც მძიმე მდგომარეობის კიდევ უფრო დამძიმება," 

    სოციალურ ქსელში კულტურის პალატის ხელმძღვანელი, დავით ოქიტაშვილი გრიბოედოვის ძეგლზე დაწერილი წარწერების შესახებ წერს:
     
    „ ნაც-ფაშისტები ისეთ საშიშ თამაშს თამაშობენ, ტურიზმს ხომ ანგრევენ, ქვეყანას ხომ აფეთქებენ, საბოტაჟი და ყველაფერი უბედურება, მაგრამ, ეს არახალია.
    ხალხო, გაოგნებული ვარ! მრავალსაუკუნოვანი კულტურის მქონე ერს გვიბიძგებენ რუსოფობიისკენ!! უკვე მწერლების ძეგლებს მიწვდნენ!! ეს უფრო შორს მიმავალი ბოროტება მგონია.!!“
     

    დაავადებათა კონტროლის ეროვნული ცენტრის ხელმძღვანელის მოადგილის პაატა იმნაძის განცხადებით, გადაადგილებაზე შეზღუდვა ეფექტური საშუალებაა, რომ მობილობა შემცირდეს:

    „კიდევ ერთხელ ხაზი უნდა გაესვას, რომ ხანდახან ადამიანები კითხულობენ, რომ ცხრა საათის შემდეგ კორონა აღარ დადის? გამიკვირდება ხოლმე. მესმის, როცა ამას ამბობენ, ჩვენდამი განსაკუთრებული დამოკიდებულებით არ გამოირჩევიან. მაგრამ ხანდახან ისეთი ადამიანებიც ამბობენ, რომ მართლა მიკვირს. ლაპარაკია ძალიან მარტივ რამეზე, ერთი ოჯახის წარმომადგენელი მეორე ოჯახისას არ შეხვდეს არასაჭირო, არააუცილებელი საქმისთვის. ვისაც საქმე აქვს, რა თქმა უნდა, მათ არ ეხებათ. ექიმი დადის სამსახურში ღამის ცვლაშიც, ქარხნებიც მუშაობს. ლაპარაკია, რომ არ იყოს თავისუფალი გადაადგილება, რადგან გადაადგილების შეზღუდვა მობილობის დაგდების ერთ-ერთი ყველაზე ეფექტური მეთოდია. დღეს ერთადერთი ეს ბერკეტია დარჩენილი. სამწუხაროდ, პირბადის ტარება იქნება თუ დისტანციის დაცვა, არ ვასრულებთ. ამ ფონზე, ეს შეზღუდვაც რომ არ იყოს, ზუსტად ორ-სამ კვირაში ნოემბრის მონაცემებზე დავბრუნდებით“

    სასულიერო პირებს შორის, მიწის გამო დაწყებული დაპირისპირება ფიზიკურ ანგარიშსწორებაში გადაიზარდა - ძამას ხეობაში, მამები ერთმანეთს სასტიკად გაუსწორდნენ.

    ვითარება ხეობაში გუშინ, 31 მარტს საღამოს დაიძაბა, შეხლა-შემოხლის დროს დაშავდა და დაიჭრა რამდენიმე პირი. ფაქტის ამსახველი ვიდეო კი "მთავარმა" ექსკლუზიურად მოიპოვა.  

    დაპირისპირების მიზეზი მიწაა, სადაც დგას სახლი, რომელშიც მღვდელი პაესი ცხოვრობს. მან სასჯელაღსრულების დაწესებულება ცოტა ხნის წინ დატოვა, ის ძალადობისთვისაა ნასამართლევი. მღვდელ პაეს ცოტა ხნის წინ შატბერის მონასტრის წინამძღვარმა, მამა დამიანემ მოსთხოვა, რომ მონასტერი დატოვეს, რადგან ის საეკლესიო წესებს არ ემორჩილებოდა. ამაზე მამა პაესმა უარი განაცხადა, კონფლიქტის დროს 2 მათგანი დაშავდა.

    ფაქტის ამსახველი ვიდეო "მთავარ არხის" მონასტრიდან წყარომ მიაწოდა.

    "არ ყოფილა [ფიზიკური დაპირისპირება] არაფერ მიწასთან არ არის, მამა პაესს აქ არაფერი მიწა არ ეკუთვნის. დაპირისპირება არ ყოფილა, არ ემორჩილება მონასტრის წეს-განგებას, არ დადის ლოცვებზე, მივიღე გადაწყვეტილება, რომ დავატოვებინო მონასტერი. აქ მიწასთან დაკავშირებით არანაირი დავა არ არის", - თქვა მამა დამიანემ.

    "მთავარ არხთან" სატელეფონო საუბრისას მამა პაისმა ჩვენ ჟურნალისტსა და ტელევიზიას შეურაცხყოფა მიაყენა:

    "მთავარი არხის" ჟურნალისტები ხართ თქვენ პატრიარქის წინააღმდეგ არხი, დედა ეკლესიის წინააღმდეგ, თქვენ ხართ ჯამბაზები, გადაცმული კლოუნები, ნაცსექტა, რომლებიც ეწინააღმდეგებით ქრისტიანობას", - თქვა მამა პაიესი.

    მომხდარი ინციდენტის შემდეგ სასულიერო პირებს საგამოძიებო უწყებისთვის ან სამედიცინო დაწესებულებისთვის არ მიუმართავთ. წყარო "მთავარ არხთან" ამბობს, რომ დღეს ხეობაში მოვლენების კიდევ უფრო მძიმე განვითარებას ელოდებიან.

     

     

    მთავარი არხი

    ურნალისტი ნანუკა ჟორჟოლიანი სოციალურ ქსლეში პოზდნერის ჩამოსვლას ეხმაურება:

    პოზდნერმა ერთ-ერთ ინტერვიუში თქვა, ქართველებს ეზიზღებოდათ აფხაზები, ისინი მათ მაიმუნებად თვლიდნენ და აფხაზებს ერთი სული ჰქონდათ როდის იცხოვრებდნენ ქართველების გარეშეო.

    აი, ამის მთქმელს მოუნდა ყველა რეგულაციის და კანონის დარღვევით, საქართველოს დედაქალაქში პომპეზური დაბადების დღის გადახდა. პუტინის მეგობარს საქართველო მარტო ელარჯი რომ ჰგონია, ამიტომაც შეაზილეს სახეში.

     მე იმაზე მეშლება ნერვები, რუსების საქართველოში ბლტაობას მარათონი რომ შეეწირა. ასმაგად გაბრაზებული ვარ“

    პარტია „მოქალაქეების“ ლიდერი ალეკო ელისაშვილმა ჟურნალისტებთან განაცხადა, რომ სოლიდარულია გუშინდელი პროტესტის მიმართ, რომელიც რუსი ჟურნალისტის, ვლადიმირ პოზნერის საქართველოში ჩამოსვლას მოჰყვა:

    „ძალიან კარგია, ყოჩაღ და მადლობა თითოეულ იმ ადამიანს, რომელმაც ანგელოზები დაუფეთა პოზნერს და პირიდან ლუკმა გააგდებინა. მე პირადად არ ვყოფილვარ აქციაზე, რადგან დანიელსონთან შეხვედრის შემდეგ ძალიან მძიმე ღამე მქონდა ემოციურად, ვერ ვინელებ იმ უპასუხისმგებლობას და გუშინ ძალიან ცუდად ვიყავი ფიზიკურად, მაგრამ აბსოლუტურად სოლიდარული ვარ იმ პროტესტის მიმართ, რაც გუშინ გაიმართა. ჯერ კიდევ ანდროპოვს ჰქონდა დამოკიდებულება და საქართველოს ეძახდა „იუჟნაია შაშლიჩნაიას“, სახელმწიფოდ არ აღიქვამდა მაშინ საბჭოთა საქართველოს და მიაჩნდა და დღემდე მიაჩნიათ რუსებს, როგორც ჩანს, რომ შეიძლება აკადრო ქართულ სახელმწიფოს ნებისმიერი რამ. დააბრალო მაგალითად, ომის დაწყება, შემდეგ სინანული გამოთქვა, რომ ტანკები გაჩერდნენ შუა გზაზე და თბილისამდე ვერ მოვიდნენ, ამის შემდეგ ჩამოხვიდე „იუჟნაია შაშლიჩნაიაში“, როგორც ისინი ჩვენ აღგვიქვამენ და გემრიელად მოილხინო“,

    პარტია "გირჩის"  ერთ-ერთი ლიდერი ვახო მეგრელიშვილმა პოზნერის ვიზიტთან დაკავშირებით TV პირველის ეთერში გააკეთა კომენტარი:

    „პროტესტს ხომ აქვს თავისი ხარისხი? ნუთუ, ახლა პოზნერი იმსახურებს ამ სახის პროტესტს? ჩვენ ამაზე დიდი გასაპროტესტებელი როგორ არა გვაქვს, როგორც პოზნერის საღამოს ვახშამი? ზურაბ ჯაფარიძესთან რომ მიდიოდა პოლიცია და კეტავდა ბარს, აქაც ხომ იგივე სიტუაციაა? მე არ მომწონს ეს რაც ხდება, არ მომწონს ბევრი მიზეზის გამო, არ მომწონს იმიტომ, რომ ადამიანი ჩამოვიდა და მივუვარდით. იქ ყველანი არიან ანგაჟირებული ადამიანები".

     

    პენიტენციური სამსახურის მიერ გავრცელებული ინფორმაციით, კორონავირუსისგან გარდაცვლილი ლანჩხუთელი ექიმის ნანა ცინცაძის შვილმა, მას შემდეგ რაც დედის სიკვდილის ამბავი გაიგო, ქუთაისის N2 სასჯელაღსრულების დაწესებულებაში თავი მოიკლა:

    "N2 დაწესებულების ბრალდებული თ.ო. (დაბ: 1993 წ.) საქართველოს ს.ს.კ-ის 177-ე მუხლის მესამე ნაწილის “დ” ქვეპუნქტით (ქურდობა) გათვალისწინებული დანაშაულის ბრალდებით 2020 წლის 16 ნოემბერს მოთავსდა N8 დაწესებულების საკარანტინო სივრცეში. 2020 წლის 28 ნოემბერს იგი გადაყვანილი იქნა N2 პენიტენციურ დაწესებულებაში.

    2021 წლის 31 მარტს დაახლოებით 15:57 საათზე მისი თანამესაკნეები საკნიდან გაყვანილ იქნენ იმავე სართულზე არსებულ აბანოში, ხოლო ბრალდებული თ.ო. დარჩა საკანში. აბანოდან საკანში დაბრუნებისას თანამესაკნეებმა თ.ო. საკნის საპირფარეშოში უგონო მდგომარეობაში აღმოაჩინეს. მას ყელის არეში აღენიშნებოდა, სავარაუდოდ, ბასრი საგნით მიყენებული ჭრილობა.

    პირველადი სამედიცინო დახმარების გაწევის მიზნით, ბრალდებული ჩაყვანილ იქნა დაწესებულების სამედიცინო ნაწილში და გამოძახებულ იქნა სასწრაფო სამედიცინო დახმარების ბრიგადა, თუმცა მედპერსონალის მცდელობის მიუხედავად, თ.ო.-ს გადარჩენა ვერ მოხერხდა. მომხდარის შესახებ დადგენილი წესით დაუყოვნებლივ ეცნობა სახელმწიფო ინსპექტორის სამსახურს, რომელმაც დაიწყო გამოძიება.

    აღსანიშნავია, რომ თანამესაკნეების გადმოცემით თ.ო.-მ 31 მარტს შუადღის საათებში პენიტენციური დაწესებულებიდან განახორციელა სატელეფონო ზარი, რა დროსაც შეატყობინეს დედის გარდაცვალების ფაქტი,"

     პარლამენტის თავმჯდომარემ, არჩილ თალაკვაძე, თბილისის მერის ჯანმრთელობის შესახებ „რუსთავი 2“-ის ეთერში გააკეთა კომენტარი:

    „კახი კალაძე ჩვენი გუნდის გამორჩეული ლიდერია, ჩვენ მასთან ერთად არაერთი გამარჯვება გვაქვს მოპოვებული არჩევნებში და არაერთი მნიშვნელოვანი პირობა და მნიშვნელოვანი პროექტიც გვაქვს განხორციელებული ერთად. კახი კალაძე არ არის ის ლიდერი, რომელიც ტოვებს თამაშს ვადამდე, ტოვებს თამაშს ისე, რომ თავისი პირობები არ შეასრულოს. მე გარწმუნებთ, რომ ის თავის უფლებამოსილებას შეასრულებს ბოლომდე და ჩვენი გუნდი ერთად, მაქსიმალურად შევეცდებით, რომ თბილისელებისთვის მიცემული პირობებიც იყოს შესრულებული მაქსიმალურად, რის შესაძლებლობას ჩვენი ეკონომიკა და ჩვენი ქვეყნის შესაძლებლობები გვაძლევდა..“

    შინაგან საქმეთა სამინისტროს ინფორმაციით, რუსი ჟურნალისტი ვლადიმერ პოზნერი არის ამერიკის შეერთებული შტატების მოქალაქე და მას კანონი ოკუპაციის შესახებ დარღვეული არ აქვს და როგორც უწყებაში განმარტავენ, პოზნერი საქართველოში აქამდეც არაერთხელ იმყოფებოდა.

    „აღნიშნული პირი არის აშშ-ის მოქალაქე. მას არ დაურღვევია კანონი ოკუპაციის შესახებ, იგი არაერთხელ არის ნამყოფი საქართველოში. რაც შეეხებათ სხვა პირებს, ისინი მთავრობის დადგენილების შესაბამისად შემოვიდნენ ქვეყანაში, ნაწილს ჰქონდა კოვიდპასპორტი, ხოლო ნაწილს კი პისიარტესტის ცნობა“,- აცხადებენ შსს-ში.

     

    Please publish modules in offcanvas position.