notnews ganivi3 

    რუსა ხავთასი

     „მოქალაქეების“ ლიდერმა ალეკო ელისაშვილმა, გუშინდელი ჩაშლილი შეთანხმების შესახებ გააკეთა ჟურნალისტებთან კომენტარი.  მისი თქმით, იყო კონკრეტული მომენტი, როცა შეთანხმებასთან ორივე მხარე ახლოს იყო, ოდნავ რომ უკან დაეხია ორივე მხარეს, როგორც რურუას, ასევე ვადამდელ არჩევნებთან დაკავშირებით:

    „ვადამდელი არჩევნები რომ დაეთმო ოპოზიციას, რომელიც ჰაერშია გამოკიდებული და რურუას დაუყოვნებელი გამოშვების საკითხი „ქართულ ოცნებას“, კომპრომისი და შეთანხმება შედგებოდა. რაზეც განსაკუთრებით გავცოფდი და გული მწყდება, არის ის, რომ გუშინ ხელი ჰკრეს და მაგიდიდან გადააგდეს შეთანხმება, სადაც საარჩევნო რეფორმასთან ერთად, მართლმსაჯულების რეფორმა ანუ ამ ქვეყნის მომავალი ეწერა, მაგრამ ვიღაცებისთვის, როგორც ჩანს, კონკრეტული პარტიული დღის წესრიგი უფრო მნიშვნელოვანია, ვიდრე მართლმსაჯულების რეფორმა ან კონკრეტულ პატიმრებზე ლაპარაკი ურჩევნიათ, თითქოს ხელისუფლებას არ რჩება ბერკეტი, რომ მერე კიდევ სხვა დააპატიმროს“, - განაცხადა ელისაშვილმა.

    81 წლის ასაკში ანსამბლ „რუსთავის“ დამფუძნებელი ანზორ ერქომაიშვილი გარდაიცვალა. ის კორონავირუსის დიაგნოზით თბილისის საუნივერსიტეტო კლინიკაში იყო მოთავსებული. ის მართვით სუნთქვაზე იმყოფებოდა.

    მუსიკოსი, ფოლკლორისტი და საქართველოს ხელოვნების დამსახურებული მოღვაწე ანზორ ერქომაიშვილი ვოკალურ ანსამბლ „რუსთავს“ 1968 წლიდან ხელმძღვანელობდა. გამოცემული აქვს მის მიერვე ჩაწერილი 7 ქართული (გურული) ხალხური სიმღერა. 2008 წელს გახდა საქართველოს პარლამენტის წევრი ოზურგეთის საარჩევნო ოლქიდან "ერთიანი ნაციონალური მოძრაობის" წარდგინებით. 2009 წლიდან შეწყვიტა საკანონმდებლო საქმიანობა და გახდა ფოლკლორის ეროვნული ცენტრის ხელმძღვანელი.

    დაჯილდოებულია ბრწყინვალების საპრეზიდენტო ორდენით.

     ევროპული საბჭოს პრეზიდენტის პირად წარმომადგენელთან, კრისტიან დანიელსონთან შეხვედრის შემდეგ „ქართული ოცნების“ თავმჯდომარემ, ირაკლი კობახიძემ ნიკა მელიას შესახებ გააკეთა კომენტარი:

    „ნიკანორ მელიასთან დაკავშირებით საქმე აღძრულია კონკრეტულ მძიმე დანაშაულზე, ეს იყო პარლამენტში შეჭრის მცდელობა, რასაც მოჰყვა ძალიან მძიმე შედეგები და ამისათვის გათვალისწინებულია კონკრეტული სასჯელი. ნიკანორ მელიას ევალებოდა ერთადერთი რამ, ელექტრონული სამაჯურის ტარება, თუმცა მან გასული წლის ნოემბერში, გადააგდო ეს სამაჯური. ეს იყო შეურაცხყოფის მიყენება სახელმწიფოსთვის. ამის მიუხედავად პროკურატურამ გადადგა მაქსიმალურად რბილი ნაბიჯი, მოითხოვა გირაოს გადახდა. მიუხედავად ასეთი შეურაცხყოფისა, ეს იყო მაქსიმალურად რბილი ზომა. გავიდა გირაოს გადახდის 35 დღიანი ვადა, კიდევ ორი კვირა აცადეს ნიკანორ მელიას, შემდეგ მისცეს ერთ კვირიანი ვადა და ამ ვადის ამოწურვის შემდეგაც, რჩებოდა ნიკა მელიას იმის საშუალება, რომ გადაეხადა გირაო. ნიკა მელიამ ამაზე თქვა უარი, უფრო მეტიც, გამოვიდა მძიმედ შეურაცხმყოფელი განცხადებით და ერთადერთი შანსი დაუტოვა სახელმწიფოს, რომ ემოქმედა კანონის შესაბამისად. მელიას დაპატიმრება მოჰყვა მის ნაბიჯებს, მან საკუთარი თავი თვითონ დაიპატიმრა. საუბარი, რომ ვიღაცამ ნიკა მელია დააპატიმრა და შემდეგ ამით ვაჭრობა დაიწყო, არის წმინდა წყლის სპეკულაცია“

    "ქართული ოცნების“ თავმჯდომარის, ირაკლი კობახიძის განცხადებით, კრისტიან დანიელსონის მიერ შეთავაზებული დოკუმენტი არ შეიცავდა არავითარ პირობას ვადამდელი არჩევნების შესახებ და ეს კიდევ ერთი დასტურია იმისა, რომ დასავლეთი 2020 წლის საპარლამენტო არჩევნების შედეგების ლეგიტიმურობას კითხვის ნიშნის ქვეშ არ აყენებს:

    "ხაზგასმით მინდა აღვნიშნო, რომ დოკუმენტი არ შეიცავდა არავითარ პირობას რიგგარეშე არჩევნებზე და მისი ჩატარების რაიმე პირდაპირ თუ არაპირდაპირ შესაძლებლობაზე,"

    კრისტიან დანიელსონი აქვეყნებს დოკუმენტს, რომელიც საქართველოს მოლაპარაკებებში ჩართულ  პოლიტიკურ პარტიებს შესთავაზა.

    ჩვენ, წინამდებარე შეთანხმებაზე ხელმომწერი პარტიები, ვითვალისწინებთ რა საერთო ინტერესებს იმისთვის, რომ:

    დასრულდეს არსებული პოლიტიკური უთანხმოება და წინ წაიწიოს საქართველოს დემოკრატიული და კანონის უზენაესობის დღის წესრიგმა პოლიტიკური, მართლმსაჯულებისა და ანტიკორუფციული რეფორმების გატარების გზით;

    შესაძლებლობა მიეცეს ჩვენს ქვეყანას, იყოს ძლიერი და ერთიანი კორონავირუსის პანდემიით გამოწვეული ჯანდაცვისა და ეკონომიკურ გამოწვევებთან გასამკლავებლად; უზრუნველყოფილი იყოს საქართველოს უსაფრთხოებისა და სტაბილურობის ინტერესები რეგიონალური გამოწვევების პირობებში;

    ვიმოქმედოთ მიზანდასახულად საქართველოს ევროპული და ევროატლანტიკური მისწრაფებების განსახორციელებლად;

    ვაღიარებთ რა ევროპული საბჭოს პრეზიდენტის შარლ მიშელის მხარდაჭერას, ვთანხმდებით, რომ: ამ შეთანხმების ხელმოწერისთანავე შევალთ პარლამენტში და სრულად მივიღებთ მონაწილეობას საპარლამენტო საქმიანობაში;

    მომდევნო საპარლამენტო არჩევნებამდე შევასრულებთ ჩვენს მოვალეობებს ურთიერთპატივისცემით და იმის აღიარებით, რომ საქართველოს სტაბილურობას ერთიანობა სჭირდება.

    შესაბამისად, ვიღებთ ვალდებულებას, რომ სწრაფად და კეთილსინდისიერად განვახორციელებთ შემდგომში მოცემულ ყველა საკითხს:

    1. პოლიტიზებულ მართლმსაჯულებად აღქმულ საკითხებზე რეაგირება

    - საქართველოს პოლიტიკური სტაბილურობის ინტერესებიდან გამომდინარე და ამ შეთანხმების შესრულების მიზნით, ხელისმომწერები ვალდებულებას იღებენ, რეაგირება მოახდინონ პოლიტიზებულ მართლმსაჯულებად აღქმულ ორ საკითხზე. კერძოდ, ამ შეთანხმების ხელმოწერიდან ერთი კვირის განმავლობაში, პარლამენტში წარმოდგენილმა პარტიამ უნდა მოახდინოს ინიცირება კანონისა ამნისტიის შესახებ, რომელიც 2019 წლის 19 – 21 ივნისის პროტესტებთან დაკავშირებულ ყველა დარღვევასა და დაკავებას შეეხება.

    - გარდა ამისა, პარლამენტმა რეაგირება უნდა მოახდინოს პოლიტიზებულ მართლმსაჯულებად აღქმულ საკითხებზე კანონმდებლობის საშუალებით და (საჭიროების შემთხვევაში) შეიტანოს შესაბამისი ცვლილებები რეგლამენტში, რომ პარლამენტის წევრის სადეპუტატო იმუნიტეტის მოსახსნელად საჭირო იყოს უბრალო უმრავლესობაზე მეტი ხმა.

    ვადები:

    1. ხელმოწერიდან ერთი კვირის განმავლობაში უნდა განხორციელდეს ამ დებულების შესასრულებლად საჭირო ქმედებები.

    2. ყველა ხელმომწერი შედის პარლამენტში, რომ კენჭი უყაროს საკანონმდებლო და რეგლამენტის ცვლილებებს.

    2. ამბიციური საარჩევნო რეფორმა

    - მომავალი საპარლამენტო არჩევნები იქნება სრულად პროპორციული. შემდეგი ორი საპარლამენტო არჩევნებისთვის ბარიერი იქნება ბუნებრივიდან 2%-მდე.

    - პარლამენტის არანაკლებ 4 წევრისგან შემდგარი ჯგუფი შეძლებს შექმნას საპარლამენტო ფრაქცია, რომელშიც შესაძლებელი იქნება დეპუტატების ჩართვა სხვა პარტიებიდან.

    - პარტიები მხარს დაუჭერენ 2 მარტს პარლამენტში წარდგენილ კანონპროექტს შემდეგი დამატებებით ან შესწორებებით:

    - ადგილობრივი არჩევნები: პროპორციული და მაჟორიტარული მანდატების 4/1 პროპორცია ხუთ დიდ ქალაქში და 2/1 პროპორცია ყველა დანარჩენში. 2.5% ბარიერი თბილისში, 3% ბარიერი ყველგან თბილისს გარეთ.

    - ცენტრალური საარჩევნო კომისია: 8 პროფესიული და 9 პარტიული წევრი. პროფესიული წევრები აირჩევა პარლამენტის სრული შემადგენლობის ხმების 2/3- ით. ცესკოს თავმჯდომარის მოადგილე უნდა იყოს ოპოზიციური პარტიის წარმომადგენელი.

    - საოლქო საარჩევნო კომისია იგივე პროპორციით დაკომპლექტდება და პროფესიული წევრების ასარჩევად საჭირო იქნება ცესკოში ხმების 2/3.

    - საუბნო საარჩევნო კომისია იგივე პროპორციით დაკომპლექტდება, მას შემდეგ, რაც მოხდება საპარლამენტო განხილვა მიზანშეწონილობის შესახებ. პროფესიული წევრები ინიშნება საოლქო საარჩევნო კომისიების უბრალო უმრავლესობას +1 ხმით. საუბნო საარჩევნო კომისიის ოქმებს ხელს მოაწერს მინიმუმ 5 პროფესიული წევრი +1 პოლიტიკური პარტიის წევრი.

    - ცესკოს თავმჯდომარეს პარლამენტი ირჩევს ხმების 2/3-ით.

    - უნდა განისაზღვროს მკაფიო კრიტერიუმები ბიულეტენების გადასათვლელად. ქვეყნის მასშტაბით უბნების 10%-ის ავტომატური გადათვლის წესი ძალაში რჩება.

    - ცესკოს უფლებამოსილების ქვეშ შეიქმნება მიზნობრივი ჯგუფი, რომელშიც შევლენ სახალხო დამცველის ოფისისა და მოწვეული, სანდო, მიუკერძოებელი არჩევნებზე სადამკვირვებლო ორგანიზაციების წარმომადგენლები, და ასევე სანდო ადგილობრივი და საერთაშორისო ექსპერტები, დავების განხილვის პროცესისითვის და ცესკოსთვის დროული რეკომენდაციების წარსადგენად. შესაძლებელია, რომ ამ ჯგუფს მიენიჭოს დამატებითი ფუნქციები, როგორიცაა გადათვლის პროცესში ჩართვა.

    - ვენეციის კომისიის და ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) 2021 წლის 20 მარტის ერთობლივი დასკვნის შესაბამისად, რომელიც შეეხება 2021 წლის იანვარში ინიცირებულ ორ კანონპროექტს (საკანონმდებლო ცვლილებებს პარტიების რეგისტრაციისა და დაფინანსების შესახებ) და შეთავაზებული ცვლილებები უნდა გადაიხედოს.

    ვადები:

    1. საარჩევნო კანონპროექტის განხილვა სამუშაო ჯგუფში განახლდება სხვა ოპოზიციური პარტიების პარლამენტში შესვლის შემდეგ.

    2. შეთანხმების მიღწევიდან ორი კვირის განმავლობაში შეცვლილი კანონპროექტი, რომელიც ამ შეთანხმებას სრულად ასახავს, გაიგზავნება ეუთოს დემოკრატიული ინსტიტუტებისა და ადამიანის უფლებების ოფისში (OSCE/ODIHR) დასკვნის მისაღებად.

    3. ყველა საჭირო ცვლილება დროულად უნდა იყოს მიღებული პარლამენტის მიერ 2021 წლის ადგილობრივი თვითმმართველობის არჩევნებამდე

    3. კანონის უზენაესობა/სასამართლო რეფორმა

    ამ საპარლამენტო ვადაში, ფართომასშტაბიანი, ინკლუზიური და ყველა პარტიის მონაწილეობით შემუშავებული რეფორმების გზაზე პირველი ნაბიჯის გადადგის ნიშნად, პარლამენტმა უნდა დაამტკიცოს ამბიციური სასამართლო რეფორმა, შემდეგი პუნქტების ჩათვლით:

    - სასამართლო სისტემის დამოუკიდებლობის, ანგარიშვალდებულების და ხარისხის გასაზრდელად, საქართველოს ხელისუფლებამ, 2017 და 2019 წლებში მიღებული მართლმსაჯულების რეფორმების ორი პაკეტის შესაბამისად: ა) პირველი ინსტანციის და სააპელაციო სასამართლოებში მოსამართლეების დანიშვნისას უნდა გაზარდოს გამჭვირვალობა და დამსახურებაზე დაფუძნებული შერჩევა, განსაკუთრებით მოსამართლეების დასანიშნად კეთილსინდისიერებასა და კომპეტენციის კრიტერიუმებზე დაფუძნებული წერილობითი დასაბუთების გამოქვეყნების გზით; ბ) პარლამენტს უნდა წარუდგინოს კანონპროექტი უზენაეს სასამართლოში დანიშვნებთან დაკავშირებით, ვენეციის კომისიის 2019 წლის 24 ივნისის #949/2019 დასკვნის გათვალისწინებით, განსაკუთრებით, რაც ეხება დანიშვნებისადმი ეტაპობრივ მიდგომას, იუსტიციის უმაღლეს საბჭოში ღია კენჭისყრას და საბჭოს მიერ წარდგენების დასაბუთების საჭიროებას; გ) უზენაეს სასამართლოში არსებული წესებით დანიშვნებისგან თავი უნდა შეიკავოს; დ) მიიღოს საქართველოს საკონსტიტუციო სასამართლოს მიერ 2019 წლის ივნისში მიღებული გადაწყვეტილების აღმსრულებელი კანონმდებლობა, სასამართლოს გადაწყვეტილებების გამოსაქვეყნებლად წესების დადგენის გზით.

    - ამავდროულად, უზენაეს სასამართლოში ყველა მიმდინარე დანიშვნა უნდა შეჩერდეს და ხელახლა დაიწყოს განცხადებების მიღება ახალ კანდიდატებთან დაკავშირებითაც მას შემდეგ რაც, ახალი კანონი ძალაში შევა.

    - იუსტიციის უმაღლესი საბჭოს სიღრმისეული რეფორმა, რათა გაიზარდოს გამჭვირვალეობა, კეთილსინდისიერება და ანგარიშვალდებულება, მათ შორის განისაზღვროს დანიშვნის, შეფასების, დაწინაურების, გადაყვანის, დისციპლინური გადაწყვეტილებების და დავების საკითხები, რომელიც გაეგზავნა ვენეციის კომისიის და ეუთოს დემოკრატიული ინსტიტუტებისა და ადამიანის უფლებების ოფისს (OSCE/ODIHR) განსახილველად და მათი რეკომენდაციები სრულად უნდა იყოს შესრულებული.

    - რაც შეეხება მომავალ გენერალურ პროკურორებს, საკონსტიტუციო ცვლილებების განსახორციელებლად აუცილებელი პროცედურების შემდეგ, საჯარო დებატების ჩათვლით, მხარეები იღებენ ვალდებულებას, განაგრძონ საერთო პოლიტიკური პოზიციის გაზიარება, რომ შემდეგი გენერალური პროკურორების დანიშვნისთვის საჭირო იქნება პარლამენტის წევრთა კვალიფიციური უმრავლესობის ხმები, რაც ფართომასშტაბიან, ყველა პოლიტიკური პარტიის ჩართულობას და მხარდაჭერას უზრუნველყოფს; ეს დანიშვნები უნდა ჩატარდეს საუკეთესო საერთაშორისო პრაქტიკის შესაბამისად, გაჭვირვალე, მიუკერძოებელი, დამსახურებაზე დაფუძნებული დანიშვნების უზრუნველსაყოფად.

    - პარტიები იღებენ ვალდებულებას, განაგრძონ სასამართლო რეფორმა ინკლუზიური პროცესის საშუალებით, სასამართლო რეფორმის მესამე და მეოთხე ტალღის ეფექტიანობის შეფასების ჩათვლით. ამ რეფორმების განხორციელების პროცესში გამოყენებული იქნება საერთაშორისო ექსპერტების რჩევები და დახმარება, განსაკუთრებით დასანიშნი მოსამართლეების კეთილსინდისიერებასთან დაკავშირებით.

    ვადები:

    1. ამ შეთანხმების განხორციელებისა და შემდგომი რეფორმების შესახებ დისკუსია იწყება სხვა ოპოზიციური პარტიების პარლამენტში შესვლისთანავე. 2. პროექტი შედგენილია და 1 ივლისამდე იგზავნება ვენეციის კომისიაში დასკვნის მისაღებად. 3. პირველი კენჭისყრა პარლამენტის 2021 წლის საშემოდგომო სესიაზე ჩატარდება. 4. პარლამენტი სწრაფად დაამტკიცებს რეფორმებს, არა უგვიანეს 2022 წლის საგაზაფხულო სესიისა.

    "ქართულ ოცნებასა" და ოპოზიციას შორის შეხვედრა რამდენიმე წუთის წინ დასრულდა. შეხვედრა თითქმის 7 საათია მიმდინარეობდა.  ოპონენტებს შორის დიალოგის პროცესში მედიატორის ფუნქციით ევროსაბჭოს პრეზიდენტის სპეციალური წარმომადგენელი, კრისტიან დანიელსონია ჩართული. შეხვედრებს ასევე ესწრებოდა  ევროკავშირისა და აშშ-ს ელჩები საქართველოში - კარლ ჰარცელი და კელი დეგნანი. 

    „სამწუხაროდ დღეს მაგიდასთან არ ყოფილა მზაობა, რომ მიღწეულიყო კომპრომისი. ახლა მოვახსენებ პრეზიდენტ მიშელს თუ რა ხდებოდა ამ კვირის განმავლობაში და ის გადაწყვეტს როგორი იქნება შემდეგი ნაბიჯები და როდის გადაიდგმება ისინი“ - განაცხადა დანიელსონმა

    20 ივნისს დაზარალებული მაკო გომური მედიაში გავრცელებულ იმ ინფორმაციას ეხმაურება, რომლის მიხედვითაც, კრისტიან დანიელსონმა მხარეებს 20 ივნისის საქმის მონაწილეების, როგორც აქტივისტების, ისე სამართალდამცავების ამნისტიის ინიციატივით მიმართა:

    „ახლა მე გეტყვით. ეგეთი პუნქტი თუ მართლა არსებობს და მაგაზე ხელს ვინმე მოაწერს, ფეხებზე მკიდია ყველა და ყველაფერი. 2 წელია თითქმის იმ იმედით ვარ რო დამნაშავე დაისჯება და ერთადერთი ეგ მაძლევს მოტივაციას და იმის განცდას, რომ ყველაფერი აზრს მოკლებული არაა და რამეს მაინც აქვს აზრი. რაის ამნისტია, არ მაინტერესებს საერთოდ სხვა დანარჩენი პუნქტები, რაის ამნისტია????

     ანუ ეგეთ რეალობას ქმნიან, რომ დამნაშავე არ დაისჯება როგორც ყოველთვის და მერე იმაზე უნდა გვქონდეს პრეტენზია რო უსამართლობა ხდება, როცა პირდაპირ გვეუბნებიან რო აი მაგ უსამართლობაზე თვალები დახუჭე ან რაც დაგრჩა ის დახუჭე.

     როგორც ზუკამ თქვა თაროზე შემოდებული საქმეები დაჭედდება იმ თაროზე. ხოდა აი ეგ რომ მოხდეს, ეგ პუნქტი რომ არსებობდეს და ვინმემ მაგაზე ხელი მოაწეროს, 3.14ზდეც მეგობრებო“.

    "ნაციონალური მოძრაობის" წევრის ზაალ უდუმაშვილის თქმით, დოკუმენტი თუკი იმ სახით იქნება წარმოდგენილი, როგორც მედიაში გავრცელდა, "ნაციონალური მოძრაობა" მას ხელს არ მოაწერს, რადგან მედიაში გავრცელებულ ვარიანტში ვადამდელი არჩევნების შესახებ საუბარი არ არის:

    "რთული პროცესია, ასეთი რთული პროცესი რომ 1-2 საათში არ გადაწყდება ყველასთვის ნათელია, მე არ გამოვრიცხავ რომ კიდევ ერთხელ მოუწიოს კრისტიან დანიელსონს საქართველოში ჩამოსვლა„

    საქართველოს საპატრიარქოს საზოგადოებასთან ურთიერთობის სამსახური სპეციალურ განცხადებას ავრცელებს:

     „ხვალ, 2021 წლის 31 მარტს, გაიმართება მცხეთა-თბილისის მუდმივმოქმედი ეპარქიული კომისიის სხდომა. სხდომაზე, სხვა მიმდინარე საკითხებთან ერთად, დღის წესრიგშია მღვდელ-მონაზონ ანდრიას (სარია) ბოლოდროინდელი საჯაროდ გაკეთებული განცხადებების შეფასებაც“

    „ფორმულა“ ავრცელებს ვიდეოს, რომელშიც ჩანს როგორ მუშაობენ და ელოდებიან სხვადასხვა ტელევიზიის ჟურნალისტები ხელისუფლებისა და ოპოზიციის შეთანხმების საბოლოო შედეგებს. ვიდეომ სოციალურ ქსელში საკმაოდ დიდი პოპულარობა დაიმსახურა.

     

    Please publish modules in offcanvas position.