იუნისეფმა“ უკვე მიიღო დასტური „ასტრაზენეკასგან“ პირველი დოზების მოწოდებაზე, ანუ ის ნაწილი ალოკაციის, რომელიც საქართველოსთვის არის განკუთვნილი, 129 600 დოზა, მაისის ბოლომდე უნდა მივიღოთ. პირველი ნაწილი ჩამოვა მარტის ბოლომდე და ესეც მოსალოდნელია, რომ 22 მარტის კვირაში მივა „იუნისეფთან“ და შემდეგ გამოიგზავნება საქართველოში ამსტერდამის განაწილების ცენტრისგან. მოლოდინი გვაქვს, რომ ვაქცინაცია ქვეყანაში მარტის ბოლოს უნდა დაიწყოს. ყველა ინფორმაცია, რომელიც „ფაიზერს“ სჭირდება ვაქცინაციის გამოშვებისთვის აქვს. ასევე აქვს ვაქცინის დოზების ის რაოდენობა, რომელიც ქვეყანამ უნდა მიიღოს. ვაქცინები დღევანდელი ინფორმაციით, შემოვა ქვეყანაში 22 მარტის კვირაში. „ფაიზერის“ დოზა არის 29 250, როგორც ეს იყო დაანონსებული. „ასტრაზენეკას“ ვაქცინა, რომელსაც ჩვენ ველოდებით, არის „კოვაქსის“ პლატფორმიდან მოწოდებული ვაქცინა. ჩვენი ინფორმაციით, ეს იქნება კორეაში წარმოებული ვაქცინა, რომელსაც ჩვენი ქვეყანა მიიღებს“, – განაცხადა თამარ გაბუნიამ.

ამასთან, მისივე თქმით, კორონავირუსის საწინააღმდეგო ვაქცინით პირველ რიგში მედპერსონალი აიცრება.

გაბუნია აცხადებს, რომ მედპერსონალის ჯგუფში არის 57 ათასი ადამიანი.

„ამ ეტაპზე, ვაქცინას რასაც მივიღებთ, ეს გასწვდება მედპერსონალს. მედპერსონალის ჯგუფში არის 57 ათასი ადამიანი, რომლის ვაქცინაცია იგეგმება პირველ ეტაპზე. ამიტომ, ეს პირველი მოწოდება განკუთვნილი იქნება სამედიცინო პერსონალისთვის და დაფარავს მათ საჭიროებებს. თუმცა, მალევე, აპრილში ველოდებით დამატებით დოზებს, რაც მოგვცემს საშუალებას, გადავიდეთ შემდეგ ჯგუფზეც. რა თქმა უნდა, ის ეტაპობრიობა, რაც გეგმაში გვაქვს, მაქსიმალურად შენარჩუნებული იქნება“, – განაცხადა თამარ გაბუნიამ.

ერგნეთში ინციდენტების პრევენციისა და მათზე რეაგირების მექანიზმის სამუშაო ჯგუფის რიგით 98-ე შეხვედრა დასრულდა.

როგორც სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ ირაკლი ანთაძემ შეხვედრის დასრულების შემდეგ განმარტა, საქართველოს მოქალაქეების გათავისუფლების მიზნით, ერგნეთში შეხვედრები გაგრძელდება.

„ამ ეტაპზე თარიღებზე ვერ ვისაუბრებ, თუმცა, გაგრძელდება კონსულტაციები უკანონოდ დაკავებული საქართველოს მოქალაქეების გასათავისუფლებლად. უნდა აღნიშნოს, რომ მათი მხრიდან ამ საკითხის გადაწყვეტის სანაცვლოდ არაფერი ყოფილა მოთხოვნილი.
განვიხილეთ ასევე ოკუპირებულ რეგიონში და მიმდებარე ტერიტორიაზე დაფიქსირებული ყველა მნიშვნელოვანი ინციდენტი. მნიშვნელოვან პრობლემად რჩება აგრეთვე ე.წ. უკანონო ბორდერიზაცია. რაც შეეხება ჩორჩანასთან გაჟღერებულ კითხვას, რა თქმა უნდა, ამაზე საუბარი შედგა. ქართული მხარის პოზიცია უცვლელია, რომ იქ არსებული პოლიციის პოსტი არის კანონიერი და ემსახურება მშვიდობის შენარჩუნებას“, - აღნიშნა ირაკლი ანთაძემ.

ირაკლი ანთაძის განცხადებით, შეხვედრაზე საუბარი შეეხო ასევე უკანონო წვრთნებისა და საქართველოს მოქალაქეების თავისუფლად გადაადგილების პრობლემას.

„უკანონო წვრთნების საკითხი რა თქმა უნდა დაისვა. ეს არის ქმედება, რომელიც მუდმივ საფრთხეში ამყოფებს მშვიდობიან მოსახლეობას, ჩვენ დავაფიქსირეთ, პოზიცია, რომ ვართ შეურიგებლები ამ საკითხთან მიმართებაში.

მათ ციტირებას არ მოვახდენ, თუმცა პოზიცია, რაც ჩვენ მოვისმინეთ, არ იყო რაციონალური, რაც შეეხება თავისუფლად გადაადგილებას, ეს ყოველთვის იყო ხელისუფლების მთავარი პრიორიტეტი და ამ მიმართულების მუშაობა გაგრძელდება“, - განაცხადა ირაკლი ანთაძემ.

მისი თქმით, ერგნეთში მომდევნო შეხვედრა მიმდინარე წლის 23 აპრილს გაიმართება.

თურქეთის აღმოსავლეთ ნაწილში სამხედრო ვერტმფრენმა კატასტროფა განიცადა. მის ბორტზე მყოფი 11 ადამიანი დაიღუპა. 2-მა გადარჩენა მოახერხა. ამის შესახებ „ანადოლუ“ იუწყება.

თურქი სამხედროების ინფორმაციით, კატასტროფა ცუდი ამინდის გამო მოხდა. კატასტროფის ზუსტი მიზეზის დასადგენად გამოძიება ჩატარდება.

ვერტმფრენის ჩამოვარდნის დროს გადარჩენილი სამხედროები საავადმყოფოში იმყოფებიან და მათ სიცოცხლეს საფრთხე არ ემუქრება.

Cougar-ის ტიპის ვერტმფრენი ბითლისის პროვინციაში ქალაქ ბინგოლადან ტატვანში მიფრინავდა.

სან-დიეგოს ზოოპარკში რამდენიმე დიდ პრიმატს კორონავირუსის ექსპერიმენტული ვაქცინა გაუკეთეს. ვეტერინალურ-ფარმაცევტული ფირმა Zoetis-ის ვაქცინის ორი დოზა 4 ორანგუტანგს და 5 ბონობოს გაუკეთეს. ამის შესახებ ინფორმაციას BBC ავრცელებს. აქვე შეგახსენებთ, რომ ამ დრომდე უცნობია ზუსტი თარიღი, როდის შემოვა საქართველოში კორონავირუსის ვაქცინა.

ზოოპარკმა პრიმატების აცრის გადაწყვეტილება მას შემდეგ მიიღო, რაც იქ გორილებს შორის კორონავირუსის აფეთქება მოხდა. იანვრის თვეში 8 გორილა გახდა პირველი დიდი პრიმატი მსოფლიოში, რომლებსაც კორონავირუსი დაუდასტურდათ, ისინი ამჟამად გამოჯანმრთელებულები არიან.

აცრილ ცხოველებს შორის არის ორანგუტანგი კარენი, რომელიც პირველი იყო ვინც 1994 წელს გულის ღია ოპერაცია გაიკეთა.

ბუნებისდამცველები გორილებში კორონავირუსის მკურნალობასთან დაკავშირებით შეშფოთებას გამოთქვამენ, განსაკუთრებით იმ სახეობების გამო, რომელბიც წითელ წიგნში არიან შეტანილნი.

სან-დიეგოს ზოოპარკი აცხადებს, რომ აცრილ პრიმატებს შორის არცერთს არანაირი უარყოფითი რეაქცია არ ჰქონიათ და მათ მალევე ჩაუტარდებათ ანტისხეულების შემოწმება, რათა გარიკევს რამდენად ეფექტური იყო ვაქცინა.

საქართველოში ბოლო 24 საათის განმავლობაში კოვიდინფიცირების 390 ახალი შემთხვევა დადასტურდა, ხოლო 172 ადამიანი გამოჯანმრთელდა. მონაცემები მთავრობის მიერ შექმნილ სპეციალურ ვებგვერდზე stopcov.ge-ზე განახლდა.

ამავე მონაცემების თანახმად, ქვეყანაში კორონავირუსის დადასტურებული შემთხვევების რაოდენობა 272 262-ს შეადგენს, ხოლო სულ გამოჯანმრთელებულია 266 253 პირი.

რაც შეეხება დადებითობის მაჩვენებელს, 5 მარტის მდგომარეობით, დღიური დადებითობის მაჩვენებელი - 1,77%, ბოლო 14 დღის - 1,62%, ბოლო 7 დღის - 1,31%-ია.

აშშ-ის ფლორიდის შტატში, ორმა ქალბატონმა, კორონავირუსის ვაქცინის მისაღებად, თავი მოხუცებად გაასაღეს. ვაქცინაციის ცენტრში ისინი მოხუცებივით ჩაცმულები მივიდნენ _ ქუდები, ხელთათმანები და სათვალეები ეკეთათ და თან, პირველი აცრის ბარათები ჰქონდათ. თუმცა ფანდი არ გაუვიდათ _ როცა მათი პირადობის მოწმობები და მართვის უფლებები შეამოწმეს, აღმოჩნდა, რომ ისინი 34 და 44 წლისები იყვნენ. როგორ მიიღეს ამ ქალბატონებმა ვაქცინის პირველი დოზა, გაუებარია. ცენტრის თანამშრომლებმა, სადაც 65 წელს გადაცილებულ ადამიანებს კორონავირუსის ვაქცინას უკეთებდნენ, პოლიცია გამოიძახეს. სამართალდამცველებმა ქალები გააფრთხილეს, რომ ვაქცინის ურიგოდ მიღების კიდევ ერთი მცდელობის შემთხვევაში, ისინი გისოსებს მიღმა აღმოჩნდებიან.

კუპირებული აფხაზეთის დე ფაქტო ლიდერის ყოფილი მრჩეველი ახრა ავიძბა სოხუმში დააკავეს. ის ე.წ. უშიშროების სამსახურში დაკითხვაზე იმყოფება. ინფორმაციას „ეხო კავკაზა“ ავრცელებს.

АМРА-life-ის ინფორმაციით, ავიძბას სახლში ჩხრეკა ჩატარდა. ე.წ. უშიშროების სამსახურის შენობასთან ავიძბას ახლობლები და ნათესავები შეიკრიბნენ.

ავიძბას ახლობლები მის დაკავებას პოლიტიკურ საქმიანობას უკავშირებენ. ახრა ავიძბამ რამდენიმე დღის წინ პოლიტიკური ორგანიზაცია „ახალი ხალხი“ შექმნა და 2 მარტს მონაწილეობა მიიღო ანტისამთავრობო აქციაში.
ახრა ავიძბა უკრაინის აღმოსავლეთ ნაწილში 2014-2015 წწ მიმდინარე საბრძოლო მოქმედებების მონაწილეა პრორუსი სეპარატისტების მხარეს. 2020 წლის ივნისში ის სოხუმის დე ფაქტო რეჟიმის ლიდერის მრჩეველად დაინიშნა. იმავე წლის 9 ნოემბერს ავიძბა თანამდებობიდან გადადგა, რადგანაც „საერთო საქმეში რწმენა დაკარგა".

უკრაინიაში ახრა ავიძბაზე ძებნაა გამოცხადებული.

პარტია „მოქალაქეების“ ვიცე-სპიკერის, ლევან იოსელიანის განცხადებით, პლებისციტი ხაფანგია და თუ მასში ოპოზიცია თავს გაყოფს, აუცილებლად დამარცხდება.

როგორც ლევან იოსელიანმა ჟურნალისტებთან საუბრისას განაცხადა, პარტია „მოქალაქეები“ რიგგარეშე არჩევნების ჩატარების თაობაზე პლებისციტის იდეას არ ემხრობა.

„პლებისციტთან დაკავშირებით ჩემი და ალეკოს პოზიცია იყო უარყოფითი. მიმაჩნია, რომ პლებისციტი ეს არის ხაფანგი, რომელშიც თუ ოპოზიცია გაყოფს თავს, აუცილებლად დამარცხდება. პლებისციტს არ ვემხრობი, ოპოზიციამ ეს კარგად იცის, ცუდი გამოსავალია ოპოზიციისთვის”, - აცხადებს იოსელიანი.

რაც შეეხება საქართველოს ყოფილი პრეზიდენტის, მიხეილ სააკაშვილის განცხადებას, რომ ქვეყანას სჭირდება არა პლებისციტი, არამედ რიგგარეშე არჩევნები, როგორც იოსელიანი ამბობს: „მე მგონი, ზოგადად, მიხეილ სააკაშვილს და „ნაციონალურ მოძრაობას“ არ უნდა შეთანხმება“.

ამასთან, როგორც იოსელიანი აცხადებს, მოლაპარაკებების პროცესში ხელისუფლებამ და ოპოზიციამ კომპრომისული ნაბიჯები უნდა გადადგას.

„პოლიტიკური კრიზისი რამენაირად უნდა იყოს დაძლეული. ამისთვის მოლაპარაკებები გარდაუვალია. იმედი მაქვს, ეს მოლაპარაკებები გაგრძელდება. ჩვენი პარტიული ინტერესი დღეს გვერდზე უნდა გადავდოთ. კომპრომისული ნაბიჯები უნდა გადავდგათ, ხელისუფლებამ და ოპოზიციამაც თავისი წილი პასუხისმგებლობა უნდა იკისროს“, - აცხადებს იოსელიანი.