კესარია აბრამიძის მკვლელობის საქმეზე განაჩენი 17 აპრილს გამოცხადდება. მკვლელობაში ბრალდებულ ბექა ჯაიანს 20 წლამდე ან უვადო პატიმრობა ემუქრება. ის დანაშაულს მხოლოდ ნაწილობრივ აღიარებს.
რა მტკიცებულებები აქვს პროკურატურას ბექა ჯაიანის წინააღმდეგ და რას ცვლის ბრალის ნაწილობრივი აღიარება? - ამ სტატიაში ვაჯამებთ გახმაურებული მკვლელობის ყველა მნიშვნელოვან დეტალს, რაც შეიძლება უკვე იცით ან პირველად ახლა გაიგებთ.
ტრანსგენდერი ქალის, კესარია აბრამიძის მკვლელობის საქმე შესაძლოა ბოლო საქმე იყოს, რომელსაც პროკურატურა გენდერული ნიშნით შეუწყნარებლობის მოტივით ჩადენილ დანაშაულად მიიჩნევს.
სტატია მომზადებულია ბრალდებისა და დაცვის მხარის „საბოლოო სიტყვაზე“ დაყრდნობით. მტკიცებულებების უმრავლესობა ბექა ჯაიანის ადვოკატებმა სადავო არ გახადეს. მოკლულისა და ბრალდებულის ცხოვრების სენსიტიური დეტალები, ამონარიდები ჩვენებებიდან, ვიდეო, აუდიო და ფოტომტკიცებულებები საჯარო მხოლოდ სასამართლო პროცესის დასკვნით ეტაპზე გახდა, მას შემდეგ, რაც პროკურორმა და ადვოკატებმა სხდომათა დარბაზში საბოლოო სიტყვა წარმოთქვეს.