საქართველოს მთავრობის ადმინისტრაციის ხელმძღვანელი ლევან ჟორჟოლიანი საქართველოში წმინდა საყდრის დესპანს, არქიეპისკოპოს ანტე იოზიჩის შეხვდა.
საქართველოს მთავრობის ადმინისტრაციის ინფორმაციით, შეხვედრაზე საქართველოსა და ვატიკანს შორის ურთიერთობები განიხილეს. მათივე ცნობით, ხაზი გაესვა ურთიერთპატივისცემაზე დაფუძნებული პარტნიორობის მნიშვნელობას.
„ყურადღება დაეთმო განათლებისა და კულტურის სფეროებში თანამშრომლობას. ასევე საუბარი შეეხო საქართველოს მთავრობასა და წმინდა საყდრის ჰუმანიტარულ ორგანიზაციებს შორის მჭიდრო კოორდინაციის მნიშვნელობას. შეხვედრაზე ისაუბრეს „გრანტების შესახებ“ საქართველოს კანონზე. მთავრობის ადმინისტრაციის უფროსმა წმინდა საყდრის დესპანს კანონით გათვალისწინებული პროცედურების შესახებ მიაწოდა ინფორმაცია და აღნიშნა, რომ კანონი უცხოური დაფინანსების გამჭვირვალობას ისახავს მიზნად“, – ნათქვამია საქართველოს მთავრობის ადმინისტრაციის ინფორმაციაში.