14 მარტს აზერბაიჯანის რესპუბლიკაში, ისტორიულ ქართულ კუთხეში - საინგილოში, ზაქათალის რაიონის დაბა ალიაბადში სამწუხარო ამბავი მოხდა - 23 წლის ინგილო ქართველმა ორხან რამაზანოვმა თავი ჩამოიხრო მისსავე სახლში. თვითმკვლელობამდე 2 დღით ადრე მას მეგობრებისვის უთქვამს - 2 დღეში ჩემს შესახებ რაღაცას გაიგებთო, თუმცა ამ სიტყვების მნიშვნელობას მეგობრები მხოლოდ ამ ტრაგიკული შემთხვევის შემდეგ მიხვდნენ. 
ორხანმა დაბა ალიაბადის #2 სკოლა დაამთავრა და გარდაცვალებამდე ბაქო-ზაქათალა-ბაქოს ავტობუსის რეისზე მუშაობდა. 
აზერბაიჯანული მედიის ინფორმაციით, სუიციდის ფაქტზე ზაქათალის პოლიციამ გამოძიება დაიწყო. გარდაცვლილი ინგილო ახალგაზრდა დაბა ალიაბადის ასუსტიანის უბნის სამაროვანზე (საინგილოში სასაფლაოს დღემდე სამაროვანს უწოდებენ) დაკრძალეს.
დაბა ალიაბადი (ისტორიული ელისენი) რეგიონში ყველაზე დიდი და მრავალრიცხოვანი დასახლებაა ქალაქების შემდეგ. ალიაბადის მოსახლეობა დაახლოებით 11 ათასზე მეტია (მოსახლეობის 99 % ეთნიკური ქართველია და ისინი ქართული ენის ინგილოური დიალექტის ალიაბათურ კილოზე საუბრობენ).

ავტორი: სერგო კერესელიძე, საინგილოს მკვლევარი, ჟურნალისტი