Starring Georgia მუსიკის მოყვარულებს „კომბო“ შეთავაზების ფარგლებში Guns N’ Roses-ისა და Empire Of The Sun-ის ბილეთებს ერთობლივად, ფასდაკლებით  სთავაზობს.

ღონისძიების ორგანიზატორების ცნობით, Star Ring-ის კატეგორიის ორივე ბილეთის ფასი, 460 ლარის ნაცვლად, 340 ლარი იქნება.

„მელომანებისთვის განსაკუთრებით სასიამოვნო სიახლეა! კიდევ უფრო ვარსკვლავური ზაფხულისთვის Starring Georgia ყველაზე ვარსკვლავურ „კომბოებს“ გთავაზობთ. „კომბო“ შეთავაზების ფარგლებში Guns N’ Roses-ისა და Empire Of The Sun-ის ბილეთებს, ერთობლივად, ფასდაკლებით შეიძენთ. შესაბამისად, Star Ring-ის კატეგორიის ორივე ბილეთში, 460 ლარის ნაცვლად, 340 ლარს გადაიხდით. ამით Starring Georgia-ს სურს, ხელი შეუწყოს მუსიკის მოყვარულებს, რომელთაც ორივე კონცერტზე დასწრება სურთ.

აღსანიშნავია, რომ 2025 წლის 30 მაისს საქართველოში საზაფხულო საკონცერტო სეზონი გრანდიოზულად გაიხსნება – ციცინათელას პარკში 40 000 მაყურებლის წინაშე ლეგენდარული Guns N’ Roses-ი წარდგება. ვიდრე სცენაზე როკის ცოცხალი ლეგენდები გამოვლენ, ე.წ. საფორთ ბენდის რანგში, კონცერტს გახსნის Rival Sons-ი, რომლის ჩამოყვანაც უშუალოდ Guns N’ Roses-ის მოთხოვნაა. ასეთი რამ საქართველოში პირველად ხდება. ასე რომ, მსმენელს სამ საათზე მეტი დროის განმავლობაში საშუალება ექნება, ისიამოვნოს ერთობლივად ორი კონცერტით და მიიღოს დაუვიწყარი გამოცდილება.

რაც შეეხება Empire Of The Sun-ს, პოპულარული ავსტრალიური ბენდის კონცერტს 27 აგვისტოს Black Sea Arena-ს Front Stage უმნასპინძლებს. Luke Steele-სა და Nick Littlemore-ის მიერ შექმნილი დუეტი პირველად 2008 წელს სადებიუტო ალბომით  – Walking on a Dream – გამოჩნდა და მსმენელთა გულები მაშინვე დაიპყრო. კომპოზიციები: Walking on a Dream და We Are the People მათი წარმატების მხოლოდ საწყისი აღმოჩნდა; თეატრალური წარმოდგენებითა და სხვადასხვა მუსიკალური ჟანრის საინტერესო შეზავებით Empire of the Sun-ი აქტუალურობას დღემდე არ კარგავს“, –  აღნიშნულია ღონისძიების ორგანიზატორების ინფორმაციაში.