"ქართული ოცნების" დარგობრივი ეკონომიკისა და ეკონომიკური პოლიტიკის კომიტეტმა სისხლის სამართლის კოდექსში ცვლილებები განიხილა, რომლითაც ხე-ტყით უკანონო სარგებლობისთვის სახდელები მძიმდება. საკანონმდებლო ცვლილებათა პროექტი საქართველოს გარემოს დაცვისა და სოფლის მეურნეობის მინისტრის პირველმა მოადგილემ ნინო თანდილაშვილმა წარადგინა. კომიტეტმა კი მხარი დაუჭირა.

კანონის პროექტის მიხედვით, კოდექსს ემატება ახალი მუხლი, რომელიც სასჯელის სახით ითვალისწინებს ჯარიმას თავისუფლების აღკვეთასთან ერთად.

ჯარიმის მინიმალური ოდენობა 2000 ლარი იქნება, ხოლო თუ სასჯელის სახით გათვალისწინებული იქნება თავისუფლების აღკვეთაც სამ წლამდე ვადით ჯარიმის მინიმალური ოდენობა არ უნდა იყოს 500 ლარზე ნაკლები.

ახალი მუხლით, თუ სასჯელის სახით გათვალისწინებულია თავისუფლების აღკვეთით ვადით ერთიდან სამ წლამდე, შესაბამისად ჯარიმის მინიმალური ოდენობა იქნება 500 ლარი. ამავე მუხლის მეორე ნაწილით სასჯელის სახით გათვალისწინებულია თავისუფლების აღკვეთით ვადით სამიდან ხუთ წლამდე, შესაბამისად მეორე ნაწილისთვის ჯარიმის მინიმალური ოდენობაა 2000 ლარი.

პროექტით დგინდება სისხლის სამართლის პასუხისმგებლობა ხე-ტყის დიდი ოდენობით უკანონო დამზადებისთვის, ხოლო ამავე მუხლის მიზნებისათვის, ხე-ტყის დიდი ოდენობით უკანონო დამზადებაში იგულისხმება შემთხვევა, როდესაც ხე-ტყის უკანონო დამზადების შედეგად გარემოსთვის მიყენებული ზიანი შეადგენს 3 000 ლარს ან მეტს.

სახელმწიფო ელოდება, რომ კანონის ცვლილება გაზრდის პატიმრების რაოდენობას და შესაბამისად ბიუჯეტის ხარჯს, რომელიც მათი ცნობით ერთ პატიმარზე წლიურად 21 604 ლარია.

დოკუმენტი კომიტეტს "ოცნების" გარემოს დაცვის და სოფლის მეურნეობის მინისტრის პირველმა მოადგილემ, ნინო თანდილაშვილმა წარუდგინა. მანვე ისაუბრა ბოლო წლებში, ხე-ტყის უკანონო მოპოვების სტატისტიკაზე.

სახერხი საამქროს რეგისტრაციის მოთხოვნათა დარღვევა:

2022 - 87 ფაქტი;
2023 - 76 ფაქტი;
2024 - 51 ფაქტი.
ხე-ტყის უკანონო ჭრის ფაქტები:

2022 - 2 855 ფაქტი;
2023 - 2 633 ფაქტი.
უკანონოდ მოპოვებული ხე-ტყის მოცულობა კუბურ მეტრებში:

2022 - 10 713,66;
2023 - 8 733,74.