გიორგი მიქაუტაძემ საფრანგეთის ლიგა 1-ში მორიგი გოლი გაიტანა, თუმცა „ლიონმა“ სტუმრად კონკურენტ „სტრასბურგთან“ 2:4 წააგო და ხუთმატჩიანი დაუმარცხებელი სერია შეწყვიტა.

ლიგა 1-ის 27-ე ტურის შეხვედრაში საქართველოს ნაკრების თავდამსხმელი „ლიონის“ ძირითად შემადგენლობაში იყო. პირველ ტაიმში მან რამდენიმე სახიფათო მომენტი შექმნა – ერთხელ ბურთი ძელს მოარტყა და მისი პასით გოლის გატანა ჯორდან ვერეტუსაც შეეძლო.

55-ე წუთზე ანდრეი სანტოსმა „სტრასბურგი“ დააწინაურა, ხუთ წუთში კი მასპინძელთა უპირატესობა ორბურთიანი დილან ბაკვამ გახადა.

„ლიონმა“ სამი წუთის შემდეგ კორენტინ ტოლისოს გოლით სხვაობა მინიმუმამდე შეამცირა და თამაშის გადარჩენის იმედი გაუჩნდა. თუმცა 74-ე წუთზე ემანუელ ემეგამ გაიტანა. 89-ე წუთზე სამუელ ამო-ამეიავმა „ლიონის“ კარი მეოთხედ აიღო, ხოლო მიქაუტაძემ 90+7-ე წუთზე საბოლოო ანგარიში პენალტის ნიშნულიდან დააფიქსირა.

„ლიონი“ 45 ქულით მეექვსე ადგილზე დაქვეითდა. რაც შეეხება მიქაუტაძეს, მის ანგარიშზე ლიგა 1-ში რვა გოლი და ოთხი საგოლე გადაცემაა. მან ბოლო ხუთ შეხვედრაში, რომელიც კლუბსა და ნაკრებში ჩაატარა, ასევე რვა გატანილი გოლი დააგროვა.