ოლიმპიური თამაშების დამოკიდებულება ელექტრონულ სპორტებთან მიმართებით გაუმჯობესდა, რადგან ცნობილი გახდა, რომ პირველი ოლიმპიური სპორტული თამაშები საუდის არაბეთში 2027 წელს გაიმართება. ეს შეთანხმება დიდი გამარჯვებაა Esports-ის მოყვარულთათვის, რომლებიც მრავალი წელია ითხოვენ ტურნირის ოლიმპიადის ციფრულ პლატფორმაზე განთავსებას.

აღსანიშნავია, რომ ახლო აღმოსავლეთის სამეფო მთლიანად ოლიმპიური თამაშების მასპინძლობაზე განაცხადის შეტანას 2036 ან 2040 წლისთვის გეგმავს. Esports-ის ოლიმპიური თამაშების ორგანიზება დიდი მიღწევაა თავად საერთაშორისო ოლიმპიური კომიტეტისთვისაც, რადგან ღონისძიებით ე.წ. “ტიკ ტოკის” ახალგაზრდა თაობასაც დააინტერესებენ:

“ახალგაზრდები ონლაინ გეიმინგში მთლიანად არიან გადასულები და ჩვენც გვჭირდება წავიდეთ იქით, საითკენაც ხალხი და ტენდენცია წაგვიყვანს. ვიცი, რომ ბევრი დაბრკოლებაა, მაგრამ მერწმუნეთ უფრო მეტი შესაძლებლობაა მსოფლიო კიდევ უფრო დიდ სპორტის ადგილად გადავაქციოთ”, - განაცხადა საერთაშორისო ოლიმპიური კომიტეტის Esports-ის კომისიის წევრმა დევიდ ლაპარტიემ.

საუდის არაბეთის მთავრობის განცხადებით, მათი ქვეყანა შეიძლება მსოფლიო კიბერ სპორტის უმთავრეს ჰაბად ჩაითვალოს, რადგან მათივე დათვლებით არაბეთის მოსახლეობის 67% ანუ 23 მილიონი ადამიანი საკუთარ თავს პროფესიონალ გეიმერად აიდენტიფიცირებს.

ხაზგასასმელი ფაქტია ისიც, რომ სოკ-მა საუდელებს ტურნირის მასპინძლის სტატუსი არა ერთჯერადად, არამედ 2037 წლამდე მიანიჭა, თუმცა ამ ეტაპზე უცნობია მონაწილეთა რაოდენობა და ის გეიმინგ დისციპლინები, რომელშიც კიბერ სპორტსმენები ერთმანეთს დაუპირისპირდებიან. სამაგიეროდ, ცნობილია ის ფაქტი, რომ ღონისძიებას ტრადიციული ოლიმპიადის მსგავსად ექნება: გახსნა/დახურვის ცერემონიალი, გამარჯვებულებს გადაეცემათ შესაბამისი სინჯის მედლები და აჟღერდება მათი ეროვნული ჰიმნი.