ირანსა და აშშ-ს შორის მოლაპარაკებების მეხუთე რაუნდი დასრულდა. ინფორმაციას ამის შესახებ „ასოშიეთიდ პრესი“ ავრცელებს.

„გარკვეული, მაგრამ არა საბოლოო პროგრესი“, – განაცხადა ომანელმა მედიატორმა რომში გამართული შეხვედრის შეფასებისას.

როგორც „ასოშიეთიდ პრესი“ წერს, მიუხედავად იმისა, რომ პროცესი უკვე ყველაზე რთული გამოწვევის წინაშე დგას, მოლაპარაკებები ორ ქვეყანას შორის მაინც გაგრძელდება. მედიის ცნობით, სირთულეებში იგულისხმება ამერიკის მხარის მოთხოვნა ირანისადმი, შეწყვიტოს ურანის გამდიდრება.

„ეს მოლაპარაკებები ზედმეტად რთულია, რათა მხოლოდ ორი-სამი შეხვედრით მოგვარდეს“, – აღნიშნა ირანის საგარეო საქმეთა მინისტრმა, აბას არაღჩიმ.

მინისტრმა იმედი გამოთქვა, რომ შესაძლებელი იქნება ისეთი გადაწყვეტილების მიღება, რომელიც ხელს შეუწყობს მოლაპარაკებების წინსვლას.