ევროპაში ირანის უმსხვილესმა ავიაკომპანია Iran Air -მა ევროპაში ფრენა შეწყვიტა. მიზეზი ახალი სანქციებია, რომლებიც ირანს რუსეთისთვის ბალისტიკური რაკეტების მიწოდების გამო დაუწესეს.

ავიაკომპანიამ ფრენების შეწყვეტის შესახებ თავის მგზავრებს სანქციების გამოცხადების შემდეგ აცნობა, იტყობინება Euronews-ი.

Iran Air-ი სექტემბრამდე დაფრინავდა ვენაში, ჰამბურგში, ლონდონში, პარიზში, რომში, ფრანკფურტში და სხვა ქალაქებში. ირანში ფრენა შეაჩერეს ასევე ევროპის სხვა ავიაკომპანიებმა უსაფრთხოებისა და შესაძლო საომარი მოქმედების გამო.

ფრენები Iran Air-ისთვის ოფიციალურად არ აუკრძალავთ, მას გაუყინეს ანგარიშები და აქტივები და ავიაკომპანიასთან შეუძლებელი გახდა ყოველგვარი კომერციული თანამშრომლობა, რაც მის საქმიანობას შეუძლებელს ხდის.

შეგახსენებთ, რომ სანქციები ევროკავშირმა ირანს 14 ოქტომბერს დაუწესა.