საქსტატის თანახმად, 2025 წლის მარტში წლიური ინფლაცია ბოლო ორი წლის მაქსიმუმამდე - 3.5%-მდე გაიზარდა. შედარებისთვის, თებერვალში წლიური ინფლაცია 2.4%, იანვარში კი 2% იყო. ფასების წლიურ ზრდაზე ყველაზე დიდი გავლენა სურსათის ჯგუფში ფასების 6.6%-ით მატებამ განაპირობა. საქსტატი ინფლაციას სულ 305 დასახელების საქონლისა და მომსახურების ფასების ყოველთვიური გამოკვლევით ადგენს. ამ საქონელს შორის 2025 წლის მარტში წინა წლის ანალოგიურ პერიოდთან შედარებით ყველაზე მეტად 84%-ით, კომბოსტო იყო გაძვირებული. მეორე ადგილზე ფასების ზრდით კივია, მესამეზე კი ბადრიჯანი.

2025 წლის მარტში წინა წლის ანალოგიურ პერიოდთან შედარებით ყველაზე მეტად გაძვირებული საქონლის ჩამონათვალი:

#    დასახელება    ფასების ზრდა
1    კომბოსტო    84%
2    კივი    52%
3    ბადრიჯანი    46%
4    მწვანილი    42%
5    პომიდორი    35%
6    ქორწინების 958 სინჯის ოქროს ბეჭედი    30%
7    კიტრი    29%
8    მანდარინი    27%
9    ლიმონი    23%
10    საავადმყოფოს მომსახურება    23%
რაც შეეხება ყველაზე გაიაფებულ საქონელსა და მომსახურებას, მათ შორის პირველ ადგილზეა ინტერნეტის მომსახურების საფასური, რაც ჯერ კიდევ გასულ წელს, ინტერნეტ პროვაიდერების მიერ ფასის უცვლელად დატოვების პირობით ინტერნეტის სიჩქარის გაზრდის შესახებ მიღებულ გადაწყვეტილებას უკავშირდება. მეორე ადგილზეა ვაშლი, რომელიც 19%-ით არის გაიაფებული, მესამეზე ჭიქა, მეოთხე პოზიციას კი ატამი იკავებს.

#    დასახელება    ფასების კლება
1    ინტერნეტის გადასახდელი    -40%
2    ვაშლი    -19%
3    ჭიქა    -15%
4    ატამი    -14%
5    შპალერი    -13%
6    ყურძენი    -12%
7    თეფში    -12%
8    სიმინდის ფქვილი    -12%
9    ავტომობილის საბურავი    -11%
10    ბავშვის ქურთუკი    -11%