ყველაფერი გაკეთდება იმისათვის, რომ წავახალისოთ ეკონომიკის ზრდა, ეს არის მთავარი, რათა ჩვენ გავაუმჯობესოთ ჩვენი მოსახლეობის სოციალური მდგომარეობა, კიდევ უფრო მეტად განვამტკიცოთ ჩვენი პოლიტიკური სისტემა და გავიმყაროთ კიდევ უფრო მეტად ჩვენი საერთაშორისო პოზიციები, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

როგორც მთავრობის მეთაურმა აღნიშნა, სავალუტო ფონდმაც წლიური პროგნოზი გაზარდა 7,2 პროცენტამდე და პირველი ხუთი თვის მაჩვენებელი არის ამაზე მაღალი. 

„ჩვენთვის მნიშვნელოვანი იყო, რომ წელსაც შეგვენარჩუნებინა ეკონომიკური ზრდის მაღალი ტემპი და ხედავთ, რომ ზუსტად ასეთი მაჩვენებელი გვაქვს, სავალუტო ფონდმაც წლიური პროგნოზი გაზარდა 7,2 პროცენტამდე და აქამდე პირველი ხუთი თვის მაჩვენებელი არის ამაზე მაღალი. ჩვენი სურვილია, რომ ეს წელი დავხუროთ სავალუტო ფონდის პროგნოზზე მაღალი მაჩვენებლით და ყველაფერი აქეთკენ მიდის. ყველაფერი გაკეთდება იმისათვის, რომ წავახალისოთ ეკონომიკის ზრდა, ეს არის მთავარი იმისათვის, რომ ჩვენ გავაუმჯობესოთ ჩვენი მოსახლეობის სოციალური მდგომარეობა, კიდევ უფრო მეტად განვამტკიცოთ ჩვენი პოლიტიკური სისტემა და გავიმყაროთ კიდევ უფრო მეტად ჩვენი საერთაშორისო პოზიციები“, - განაცხადა ირაკლი კობახიძემ.

მთავრობის მეთაურის თქმით, იქნება მკაფიოდ განსაზღვრული კანონმდებლობა და მოწესრიგდება როგორც შრომითი, ისე საზღვრის კვეთის საკითხები.

„რეალურად, მივდივართ გამკაცრების მიმართულებით. ბევრი რამ იყო მოსაწესრიგებელი მიგრაციის ნაწილში და მოწესრიგდება როგორც შრომითი საკითხები, ასევე საზღვრის კვეთის საკითხები. ყველა მიმართულებით გვექნება მკაფიოდ განსაზღვრული კანონმდებლობა იმისათვის, რომ ეს საკითხი ერთხელ და სამუდამოდ სწორად მოწესრიგდეს,“- განაცხადა ირაკლი კობახიძემ.