ინფრასტრუქტურის სამინისტროს, საავტომობილო გზების დეპარტამენტის ინფორმაციით, საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის 31-ე კილომეტრზე (ჟინვალი-ანანურის მონაკვეთზე) მიმდინარე წლის 28 იანვარს მომხდარ ავტოსაგზაო შემთხვევასთან დაკავშირებით დაგეგმილი სამუშაოების გამო, კერძოდ ავტოსაგზაო შემთხვევაში მონაწილე სატვირთო ავტომობილის მიმდებარე ტერიტორიიდან გადატანის მიზნით, უსაფრთხოების ნორმებიდან გამომდინარე, დროებით აიკრძალება ყველა სახის ავტოტრანსპორტის მოძრაობა 30 იანვარს, 00:00 საათიდან 03:00 საათამდე.

თბილისის სახელმწიფო უნივერსიტეტი და საქართველოს ტექნიკური უნივერსიტეტი გაერთიანდება, გაერთიანებული უმაღლესი სასწავლებლების სახელწოდებად თბილისის ივანე ჯავახიშვილის სახელობის სახელმწიფო უნივერსიტეტი დარჩება.

ამის შესახებ საქართველოს განათლების, მეცნიერებისა და ახალგაზრდობის მინისტრმა, გივი მიქანაძემ დღევანდელ ბრიფინგზე განაცხადა.

მისივე თქმით, გადაწყვეტილება რექტორებთან წინასწარი კონსულტაციის საფუძველზე იქნა მიღებული.

„უმაღლესი განათლების სისტემაში მნიშვნელოვანი რეფორმის დაწყება ეფუძნება სიღრმისეულ ანალიზს, საერთაშორისო პრაქტიკას და ქვეყნის განვითარების გრძელვადიან ინტერესებს. ბოლო პერიოდში განხორციელდა სახელმწიფო უნივერსიტეტების აკადემიური პროგრამების, კვლევითი მიმართულებებისა და ინფრასტრუქტურის შედარებითი ანალიზი. ამ პროცესისა და რექტორებთან წინასწარი კონსულტაციის საფუძველზე მივიღეთ გადაწყვეტილება თბილისის სახელმწიფო უნივერსიტეტისა და საქართველოს ტექნიკური უნივერსიტეტის გაერთიანების შესახებ. ეს იქნება საწინდარი, რომ ივანე ჯავახიშვილის სახელობის თბილისის სახელმწიფო უნივერსიტეტი გახდება რეგიონში აკადემიური და სამეცნიერო განვითარების წამყვანი ცენტრი და მნიშვნელოვნად გაიუმჯობესოს საერთაშორისო რეიტინგები“, – აღნიშნა გივი მიქანაძემ.

როგორც გივი მიქანაძემ განაცხადა, უნივერსიტეტების გაერთიანების მიზნით, მინისტრის ბრძანებით, შეიქმნება მართვის დროებითი ორგანო „საბჭო“ და დაინიშნება რექტორისა და რექტორის მოადგილეების მოვალეობის შემსრულებლები, რომლებიც რეორგანიზაციის პროცესის წარმართვას უზრუნველყოფენ.

მინისტრის თქმით, უმაღლესი განათლების სისტემის რეფორმის ფარგლებში, დამატებით შეიქმნება წამყვანი პროფესორის აკადემიური თანამდებობა და ამ თანამდებობაზე კონკურსის წესით შერჩეული პირები უზრუნველყოფენ სასწავლო და კვლევითი საქმიანობის სტრატეგიულ ხელმძღვანელობას, ხარისხის ზრდასა და ახალგაზრდა აკადემიური პერსონალის განვითარებას.

სოციალურ ქსელში დარეგისტრირებული გვერდი Astrologia.ge-ი „მერკურის რიტუალის“ შესახებ გვიზიარებს ინფორმაციას, რომელიც ოთხშაბათს უნდა გააკეთოთ:

„მერკურის რიტუალი: „აზრისა და გულის ჰარმონია“ ოთხშაბათია და მთვარე კირჩხიბშია, გირჩევთ: დაუწერეთ წერილი (თუნდაც არ გაგზავნოთ) იმ ადამიანს, ვის მიმართაც მადლიერებას გრძნობთ. მერკური დაგეხმარებათ სიტყვების პოვნაში, კირჩხიბის მთვარე კი მას გულწრფელობით აავსებს.

• რატომ მუშაობს: მერკური მართავს კომუნიკაციას, კირჩხიბი კი — გულს. მათი სინთეზი დღეს გვეხმარება ემოციური ბლოკების მოხსნაში და ურთიერთობების გაჯანსაღებაში“, - ვკითხულობთ გავრცელებულ პოსტში.

დაწყებით საფეხურზე სწავლის დაწყების ასაკი განისაზღვრება 6 წლით. როგორც „ოცნების“ მთავრობის მიერ დამტკიცებულ ზოგადი განათლების რეფორმის კონცეფციაში წერია, ცვლილება გულისხმობს მოსწავლის სკოლაში ჩარიცხვას მხოლოდ იმ შემთხვევაში, თუ მას 15 სექტემბრის ჩათვლით შეუსრულდება 6 წელი.

„ერთ-ერთ გამოწვევას წარმოადგენს ის ფაქტი, რომ სკოლაში სწავლას იწყებენ 6 წლამდე ასაკის ბავშვები, რომელთაც შესაძლოა, არ ჰქონდეთ საკმარისი სოციო-ემოციური და ყურადღების კონცენტრაციის სათანადო დონეზე განვითარებული უნარები“, - წერია დოკუმენტში, რომელსაც ხელი ირაკლი კობახიძემ 26 იანვარს მოაწერა.

ასევე დამატებითი ცვლილება იქნება პირველკლასელთა რეგისტრაციის პროცესში. კერძოდ, საყოველთაო რეგისტრაციის ეტაპის დაწყებამდე, ბავშვის ჩარიცხვა მოხდება სარეგისტრაციო მისამართის მიხედვით. თუმცა, ეს ცვლილება 2026-2027 სასწავლო წელს, მხოლოდ დიდ ქალაქებს შეეხება.

„2026-2027 წლის პირველკლასელთა რეგისტრაციისას აღნიშნული დამატებითი ეტაპი მხოლოდ დიდ ქალაქებს შეეხება, ხოლო მომდევნო პერიოდებიდან ყველა სკოლას მოიცავს“, - წერია კონცეფციაში.

სხვა დეტალები, ჯერჯერობით უცნობია.