მართლმადიდებელი ეკლესია დღეს წმინდა დიდმოწამე ბარბარეს იხსენებს, რომელიც ქრისტიანობისთვის მე-4 საუკუნის დასაწყისში ეწამა.

ქალწულმოწამე ბარბარე მე-3 საუკუნის მეორე ნახევარში ფინიკიის ქალაქ ილიოპოლისში დაიბადა. ერთადერთ შვილს მამა ზრდიდა, რომელიც კერპთაყვანისმცემელი იყო. მას შემდეგ, რაც ბარბარეს ჩუმად მონათვლის ამბავი შეიტყო, მამამ ის ქვეყნის მმართველ მარკიანესთან მიიყვანა. რამდენიმედღიანი წამების შემდეგ, წმინდა ბარბარეს თავი თავად მამამისმა მოკვეთა.

წმინდა ბარბარე ბავშვების განსაკუთრებულ მფარველად ითვლება. ბარბარობის დღესასწაულზე ტაძრებში საზიარებლად განსაკუთრებით ბევრი პატარა მიყავთ.

დღესასწაულთან დაკავშირებით, ყველა მოქმედ ტაძარში საღმრთო ლიტურგია ჩატარდება.

ბარბარობა ქართველების ერთ-ერთი უძველეს საახალწლო დღესასწაულად ითვლება. ქართველები ბარბოლს, ბარბლაშის (სვანეთი) და ბარბალეს სახით თაყვანს სცემდნენ ამავე სახელწოდების წინაქრისტიანული მზის ადგილობრივ ღვთაებას, რომლის ატრიბუტებს წარმოადგენდა წრიული საგნები და სხვადასხვა სოლარული ემბლემები (რკინისა თუ მწვანე რტოებით დამზადებული წრეები, კვირისტავები, გვერგვი, კალპი, გვირვინი და სხვა). მორწმუნე ქართველებს იგი წარმოდგენილი ჰყავდათ როგორც ქალების, ფურების და საერთოდ ბუნების ნაყოფიერების დედური ძალების მფარველი ასტრალური ქალღვთაება.

ბარბარობასთან დაკავშირებული იყო სხვადასხვა რიტუალური ლოცვა-ვედრება, შესაწირავები: რძის ფაფა, ხაჭაპურები (სვანეთში), ლობიოს და ნიგვზისგულიანი ჯვარდასახული ტაბლები, ე. წ. საბარბალო ტაბლები (ლეჩხუმში) და სხვა. ბარბარობის ერთ-ერთი უმნიშვნელოვანესი რიტუალი იყო – მეკვლეობა. ეს რიტუალი დღესაც აქტუალურია და გამოიხატება მეკვლის (მეფეხის) მიერ კარმიდამოში ან ოჯახში მარცვლეულის მობნევის სახით. დროთა განმავლობაში მეკვლეობამ კვლის გამვლების თავდაპირველი ფუნქცია დაკარგა და იგი მხოლოდ „ფეხბედნიერი“ მომლოცველის ანუ „მეფეხის“ მნიშვნელობით შემორჩა.

მისი წმიდა ნაწილები ასვენია ქ. კიევში, წმიდა ვლადიმერის სახელობის საკათედრო ტაძარში, ეკვდერის შუაში, შემაღლებულ ადგილას. მის წმიდა ნაწილებთან მრავალი სასწაულია დაკავშირებული. წმიდა ბარბარეს განსაკუთრებით ევედრებიან ყრმათა კურნებისათვის, შვილიერებისათვის და მოულოდნელი, უზიარებელი სიკვდილისაგან დაცვისათვის.

შინაგან საქმეთა სამინისტრომ ელექტროსკუტერების მონაწილეობით მომხდარი საგზაო შემთხვევების სტატისტიკის გამოქვეყნება დაიწყო. უწყების ინფორმაციით, 2025 წლის 9 თვეში აღირიცხა სულ 66 შემთხვევა, ელექტროსკუტერის მონაწილეობით, რასაც ადამიანის ჯანმრთელობის დაზიანება მოჰყვა. ამასთან, შსს-ს მონაცემებით, პერიოდის განმავლობაში სკუტერის მონაწილეობით ლეტალური ავტოსაგზაო შემთხვევა არ დაფიქსირებულა.

სტატისტიკის თანახმად, სკუტერის, ველოსიპედის, მოპედისა და მოტოციკლის მონაწილეობით მომხდარი ავტოსაგზაო შემთხვევები 2025 წლის 9 თვეში ასე ნაწილდება:

საგზაო-სატრანსპორტო შემთხვევა ელექტრო თვითგორიალას (სქროლი) მონაწილეობით - 66 შემთხვევა, 66 დაზარალებული ჯანმრთელობის დაზიანებით, ლეტალური - 0;
საგზაო-სატრანსპორტო შემთხვევა ველოსიპედის მონაწილეობით - 27 შემთხვევა, 23 დაზარალებული ჯანმრთელობის დაზიანებით, ლეტალური - 2;
საგზაო-სატრანსპორტო შემთხვევა მოპედის მონაწილეობით - 34 შემთხვევა, 39 დაზარალებული ჯანმრთელობის დაზიანებით, ლეტალური - 0;
საგზაო-სატრანსპორტო შემთხვევა მოტოციკლეტის მონაწილეობით - 748 შემთხვევა, 713 დაზარალებული ჯანმრთელობის დაზიანებით, ლეტალური - 20.
იქიდან გამომდინარე, რომ ელექტროსკუტერებით პირები ძირითადად ტროტუარებზე და ველობილიკებზე გადაადგილდებიან, მათი მონაწილეობით მომხდარ შემთხვევების აღრიცხვა თუკი აღნიშნულში ავტომობილი ან სხვა ქვეითი არ მონაწილეობდა რთულია და უმეტეს შემთხვევაში, შესაძლოა, დაშავებულთა მხრიდან მომხდარის შესახებ შეტყობინება არ ხდებოდეს.

საპატრიარქო არქიმანდრიტ დოროთე ყურაშვილთან დაკავშირებით განცხადებას ავრცელებს.

განცხადების თანახმად, საქართველოს კათოლიკოს-პატრიარქმა, ილია II-მ დააკმაყოფილა შუამდგომლობა არქიმანდრიტ დოროთესთვის მღვდელმოქმედების შეჩერების თაობაზე.

„საზოგადოებისთვის როგორც ცნობილია, არქიმანდრიტი დოროთე (ყურაშვილი) ბოლო პერიოდში, მასმედიის საშუალებით თუ ამბიონიდან ქადაგებებისას გამუდმებით გამოთქვამდა საქართველოს ეკლესიის სინოდის წევრების თუ ცალკეული სასულიერო პირების მისამართით უსამართლო ბრალდებებს და აკეთებდა შეურაცხმყოფელ განცხადებებს. აღნიშნულის გამო, ამა წლის 16 სექტემბერს მასთან შედგა გასაუბრება, სადაც მან განაცხადა, რომ გაითვალისწინებდა და შეწყვეტდა მსგავს განცხადებებს, თუმცა ეს პირობა 28 სექტემბერს დაარღვია.

ამის შემდეგ იგი ორგზის იქნა დაბარებული ეპარქიულ კომისიაზეც, რომელზეც არასაპატიო მიზეზით გამოუცხადებლობისთვის ერთხელ საყვედური გამოეცხადა, ხოლო მეორედ ბეთლემის მაცხოვრის შობის სახელობის ტაძრის წინამძღვრობიდან გათავისუფლდა. შემდეგ, მიმდინარე წლის 26 ნოემბერს, არქიმანდრიტ დოროთეს კომისიის სახელით გაეგზავნა წერილი, რომელშიც იყო შეგონება და ქრისტესმიერ ძმობაში დაბრუნებისკენ მოწოდება (რომელსაც ვასაჯაროვებთ). თუმცაღა, მიუხედავად ზემოაღნიშნული ღონისძიებებისა, არქიმანდრიტმა დოროთემ კვლავ გააგრძელა უსაფუძვლო და შეურაცხმყოფელი განცხადებები საეკლესიო იერარქების მიმართ, რის გამოც, იგი ისევ იქნა დაბარებული ეპარქიულ კომისიაზე მიმდინარე წლის 16 დეკემბერს.

გამომდინარე იქიდან, რომ არქიმანდრიტმა დოროთემ კომისიაზე დაბარების ცნობის მიღების შემდეგ, ქადაგებისას და, ასევე, სატელევიზიო გამოსვლებისას კვლავ გამოთქვა ეკლესიის იერარქების მისამართით  შეურაცხყოფა და უსამართლო ბრალდებები, აღნიშნულის საფუძველზე, 15 დეკემბერს, ქორეპისკოპოსების, სინოდალური კომისიის წევრი მღვდელმთავრების, აგრეთვე ცალკეული სასულიერო პირების – საქართველოს ეკლესიის პროტოპრესვიტერისა და პატრიარქის მდივნის მიერ გადაწყდა, შუამდგომლობით მიემართათ სრულიად საქართველოს კათოლიკოს-პატრიარქისათვის არქიმანდრიტ დოროთესთვის (ყურაშვილი) მღვდელმოქმედების შეჩერების თაობაზე. მისმა უწმინდესობამ შუამდგომლობა დააკმაყოფილა“, – ნათქვამია საპატრიარქოს გავრცელებულ განცხადებაში.

საქართველოში მიწისძვრა მოხდა.

დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის ცნობით, მიწისძვრის ეპიცენტრი ქალაქ გურჯაანიდან დასავლეთით 10კმ-ში, სოფელ ჭერემთან დაფიქსირდა.

ბიძგები თბილისის დროით 16:39 საათზე დაფიქსირდა. მიწისძვრის სიმძლავრემ 3 (ML) მაგნიტუდა შეადგინა.