ალეკო ელისაშვილს ტერორიზმის ბრალდებით, 10-დან 15 წლამდე პატიმრობა ემუქრება

ადვოკატის განცხადებით, ალეკო ელისაშვილს გამოძიება ტერორისტული აქტის მცდელობას ედავება. მას ბრალდება სისხლის სამართლის კოდექსის 19-323-ე მუხლის პირველი ნაწილით წარედგინა. ადვოკატის განცხადებითვე, ელისაშვილი ბრალს არ აღიარებს.

 „მოგვეცა საშუალება გავცნობოდით ბრალის დადგენილებას, როგორც ჩვენთვის გახდა ცნობილი, ალექსანდრე ელისაშვილს ედავებიან ტერორიზმს, ეს არის სისხლის სამართლის დანაშაული, 19-323-ე მუხლის პირველი ნაწილი, რომელიც ითვალისწინებს 10-დან 15 წლამდე პატიმრობას. 
რა თქმა უნდა, ალექსანდრე ელისაშვილი არ აღიარებს ბრალს. ის აღიარებს ქმედებას და არა თუ ბრალს და არა თუ იმ დანაშაულს. [...] ეს იყო უბრალოდ პროტესტის გამოხატვის ფორმა, რაც შეეხება ტერორიზმს, ეს არის აბსურდული. მანამდე იყო დაწყებული 187-ე მუხლის მეორე ნაწილს „ა“ ქვეპუნქტით, რომელიც ითვალისწინებდა 3-დან 6 წლამდე [პატიმრობას] თუმცა როგორც ჩანს არ ეყოთ ეს სანქცია და გადაუკვალიფიცირეს ტერორიზმის მუხლით“, - ამბობს ადვოკატი, გიორგი რეხვიაშვილი.