სასამართლომ ჯანდაცვის მინისტრის ყოფილ მოადგილეს ილია ღუდუშაურს აღკვეთის ღონისძიების სახით 500 000-ლარიანი საპატიმრო გირაო შეუფარდა. საპატიმრო გირაო ნიშნავს, რომ ილია ღუდუშაური საპატიმრო დაწესებულებას თანხის გადახდის შემდეგ დატოვებს.
ამასთან, პროკურატურის მოთხოვნით, ღუდუშაურს ჩამოერთმევა პირადობის მოწმობა და პასპორტიც.
პროკურატურის შუამდგომლობას დაეთანხმა დაცვის მხარე და თავად ბრალდებული ილია ღუდუშაური.
მოსამართლე ნანა შამათავამ პროკურატურის შუამდგომლობა სრულად დააკმაყოფილა.
ილია ღუდუშაურს ბრალდება საქართველოს სისხლის სამართლის კოდექსის 332-ე მუხლის მეორე ნაწილით აქვს წარდგენილი, რაც სამსახურებრივი უფლებამოსილების ბოროტად გამოყენებას გულისხმობს. ღუდუშაური წარდგენილ ბრალდებას აღიარებს.