ამერიკული კვლევითი ორგანიზაცია „ატლანტიკური საბჭო" განცხადებას ავრცელებს მისი ქართველი თანამშრომლების, ეთო ბუზიაშვილისა და სოფო გელავას სახლების ჩხრეკის გამო. განცხადებაში აქცენტი კეთდება ჩხრეკის ჩატარების დროზე - ორგანიზაცია მიიჩნევს, რომ არჩევნებამდე რამდენიმე დღით ადრე მოვლენების ამგვარი განვითარება შემაშფოთებელია. რუსულ დეზინფორმაციასთან მებრძოლი მკვლევრების სახლები საპარლამენტო არჩევნებამდე ორი დღით ადრე, 24 ოქტომბერს გაჩხრიკეს ფინანსური პოლიციის თანამშრომლებმა.

"ატლანტიკური საბჭო მოვლენების მსგავსი განვითარებით და საქართველოში არჩევნებამდე ცოტა ხნით ადრე მისი გავლენით ჩვენი თანამშრომლების მუშაობაზე ღრმად შეშფოთებულია. ჩვენი ქართველი კოლეგები, სოფო გელავა და ეთო ბუზიაშვილი, დამოუკიდებელ, უპარტიო საქმიანობას ეწევიან, რომელიც მიზნად ისახავს დემოკრატიის დაცვას და განმტკიცებას მათგან, ვინც ძირს უთხრის მას ონლაინ სივრცეებში. ეს მოიცავს უცხოური გავლენის მცდელობებთან დაკავშირებულ კვლევას, მარგინალიზებულ თემებზე ტარგეტირებასა და სხვა ონლაინ საფრთხეებს" - წერია განცხადებაში, რომელსაც ორგანიზაცია გრამ ბრუკის, ატლანტიკური საბჭოს ვიცე პრეზიდენტის სახელით ავრცელებს. ბრუკი არის პასუხისმგებელი ორგანიზაციის ტექნოლოგიურ პროგრამებსა და სტრატეგიებზე და ამავე დროს არის ხელმძღვანელი იმ პროგრამისა (Digital Forensic Research Lab (DFRLab), რომლისთვისაც ქართველი მკვლევრები მუშაობენ.

ატლანტიკური საბჭო საქართველოს ხელისუფლებისგან საქმეში მეტი სიცხადის შეტანას, მათი თანამშრომლების უსაფრთხოების უზრუნველყოფას და ჩამორთმეული ტექნიკის დაბრუნებას მოელიან. ამ დროისთვის ეთო ბუზიაშვილის და სოფო გელავას სახლებიდან გამოძიებას ამოღებული აქვს მათი პირადი ელექტრონული მოწყობილობები, მობილური ტელეფონები და პერსონალური კომპიუტერები. თავად მკვლევრებს გამოძიების ფარგლებში მოწმის სტატუსი აქვთ.

"ატლანტიკური საბჭო დიდი ხანია არის დემოკრატიული და დამოუკიდებელი საქართველოსა და მისი მისწრაფებების, ტრანსატლანტიკური საზოგადოების ინსტიტუტებში გაწევრიანების დამცველი. ციფრული სასამართლო ექსპერტიზის ლაბორატორია აქვეყნებს კვლევას, რომელიც ხაზს უსვამს დისკურსის და ობიექტური ინფორმაციის მნიშვნელობას, როგორც თავისუფალი, ღია და დემოკრატიული ქვეყნების საფუძველს.

ატლანტიკური საბჭო გააგრძელებს მუშაობას საქართველოში პარტნიორებთან და მოკავშირეებთან ერთად გლობალური მომავლის ფორმირების მისიის სულისკვეთებით. ჩვენ გავაგრძელებთ სიტუაციაზე ყურადღებით დაკვირვებას" - წერია განცხადებაში.

24 ოქტომბერს ატლანტიკური საბჭოს მკვლევრების სახლების გარდა, ჩხრეკა ჩატარდა ყველაზე ცოტა, კიდევ 2 სხვა საცხოვრებელ სახლში და ერთ კომპანიაში. ფინანსური პოლიციის მიერ გავრცელებული ინფორმაციით, უწყება "ქოლცენტრის" საქმის ძიების ფარგლებში ატარებს საგამოძიებო მოქმედებებს. კავშირი ამერიკული ორგანიზაციის მკვლევარებსა და ქოლცენტრების საქმესთან ამ დროისთვის არ იკვეთება და ამ კავშირზე არც სახელმწიფო უწყებები აკეთებენ მინიშნებას ან განმარტებას.