სწორი მიმართულებით მივდივართ და ჩვენი ამბიციური ამოცანაა, მოწინავე ქვეყნებს შორის, თუნდაც მსოფლიო ქვეყნების სამეულში დავიკავოთ ადგილი კორუფციის სიმცირის თვალსაზრისით, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს დუბაიში განუცხადა.

პრემიერის თქმით, კორუფციის უფრო მეტად შემცირება არის ხელისუფლების ერთ-ერთი ეროვნული ამოცანა.

„რაც შეეხება კორუფციის მეტად შემცირებას, ეს არის ჩვენი ერთ-ერთი ეროვნული ამოცანა, ჩვენი სტრატეგიული ამოცანა, რაზეც არაერთხელ მისაუბრია, მათ შორის პარლამენტის სხდომათა დარბაზში. არა მარტო მისაუბრია, ამისთვის ძალიან ბევრი რამ გაკეთდა, მათ შორის ამ ბოლო ერთი წლის განმავლობაში, გასული წლის თებერვლიდან დღემდე. კონკრეტული ნაბიჯები გადაიდგა, კონკრეტული ზომები იქნა მიღებული, რათა შემცირებულიყო ქვეყანაში კორუფციის დონე და კორუფციასთან დაკავშირებული რისკები. შესაბამისად, სწორი მიმართულებით მივდივართ და ჩვენი ამბიციური ამოცანაა, მოწინავე ქვეყნებს შორის, თუნდაც მსოფლიო ქვეყნების სამეულში დავიკავოთ ადგილი კორუფციის სიმცირის თვალსაზრისით. სადაც არის პოლიტიკური ნება, იქ შედეგი არის მიღწევადი, დანარჩენი არის სამუშაო პროცესი“, – განაცხადა პრემიერმა.

ჩვენ კიდევ ერთხელ უნდა გამოვხატოთ ჩვენი კმაყოფილება იმით, რომ აშშ-ის ახალი ადმინისტრაცია საუბრობს იმ ყველაფერზე, რაზეც ჩვენ ვსაუბრობდით გასული სამი-ოთხი წლის განმავლობაში, რა თქმა უნდა, საქართველოშიც USAID-ი პირდაპირ იყო უხეშად ჩართული პოლიტიკურ პროცესებსა და უშუალოდ საარჩევნო პროცესებში, – ამის შესახებ საქართველოს პრემიერ-მინისტრმა, ირაკლი კობახიძემ დუბაიში ქართველ ჟურნალისტებს განუცხადა.

მისი თქმით, USAID-ი ჩართული იყო რევოლუციური პროცესების დაგეგმვასა და განხორციელებაში.

„USAID-ი ჩართული იყო რევოლუციური პროცესების დაგეგმვასა და განხორციელებაში. ამის კონკრეტული მტკიცებულებები არსებობს, მათ შორის ვიდეო-მტკიცებულებები. გახსოვთ, იგივე „კანვასის“ ტრენინგი, სხვადასხვა აქტივობა, რა თქმა უნდა, ეს ყველაფერი არის უკიდურესად მიუღებელი და ძალიან კარგია, რომ დღეს ამ ყველაფერზე ალაპარაკდა უკვე აშშ-ის ახალი ადმინისტრაცია. გახსოვთ, რადიკალური ოპოზიცია, „ენჯეოები“, მათი მხარდამჭერები აცხადებდნენ, რომ არსებობდა იდეალური დასავლეთი და არცერთ შემთხვევაში ამ იდეალურ დასავლეთს არ შეიძლებოდა ჰქონოდა რაიმე უარყოფითი განზრახვა ჩვენი ქვეყნის მიმართ. დღეს, რაზეც ჩვენ ვსაუბრობდით, რომ იყო მანკიერი გამოვლინებები დასავლელი პარტნიორების ქმედებებში, ამ ყველაფერს ადასტურებენ თვითონ დასავლური ინსტიტუტების წარმომადგენლები, კერძოდ აშშ-ის ახალი ადმინისტრაციის წარმომადგენლები, რომლებიც პირდაპირ ადასტურებენ, რომ USAID-დან სხვადასხვა ქვეყანაში და მათ შორის საქართველოში იმართებოდა არასწორი პროცესები, ეს იყო რადიკალური, რევოლუციური პროცესები. ეს ყველაფერი უკავშირდებოდა საარჩევნო პროცესებში ჩარევას. იმედია, რომ ამას ერთხელ და სამუდამოდ დაესმება წერტილი. ჩვენ მივიღეთ „გამჭვირვალობის შესახებ“ კანონი, რომელიც აუცილებლად ამოქმედდება, კიდევ უფრო მეტად დაიხვეწება, აღსრულდება პრაქტიკაში. ეს არის ერთადერთი გარანტია იმისა, რომ ვერავინ ვეღარასდროს გარედან ვეღარ გაბედოს და შეძლოს ჩვენს შიდა საქმეებში ჩარევა“,- განაცხადა კობახიძემ.

პრემიერის განცხადებით, დამოუკიდებლობისა და სუვერენიტეტის გარეშე ქვეყნის უსაფრთხოება ვერ იქნება დაცული.

„საქართველო უნდა იყოს დამოუკიდებელი სახელმწიფო, ამისთვის იბრძოდნენ ჩვენი მოქალაქეები 80-იან, 90-იან წლებში და ეს არის ის მიღწევა, რასაც ძალიან უნდა გავუფრთხილდეთ. დამოუკიდებლობისა და სუვერენიტეტის გარეშე ჩვენი უსაფრთხოება, ბუნებრივია, ვერ იქნება დაცული და, თუ უსაფრთხოება არ იქნება დაცული, არ იქნება არც წინსვლა და განვითარება. ამიტომ, ჩვენ მომავალშიც მაქსიმალურად გავუფრთხილდებით ჩვენს სუვერენიტეტს, როგორც არ უნდა დაუპირისპირდნენ ასეთ პროცესებს რადიკალური ოპოზიციის წარმომადგენლები. გავიხსენებ შარშანწინდელ გაზაფხულს, შარშანდელ გაზაფხულს, „გამჭვირვალობის კანონის“ გარშემო აგორებულ რევოლუციურ მცდელობას, რა თქმა უნდა, ყველა ასეთ მცდელობას ჩვენ დავუპირისპირდებით იმისათვის, რომ განვამტკიცოთ ჩვენი ქვეყნის სუვერენიტეტი, დამოუკიდებლობა და შესაბამისად – უსაფრთხოება“, – აღნიშნა პრემიერმა.

ქვეყანა ვითარდება, ვითარდება სტაბილურად, ეკონომიკური პროგრესი რაც გვაქვს, განსაკუთრებით ბოლო ოთხი წლის განმავლობაში, არის ერთ-ერთი ფაქტორი, რომელიც უზრუნველყოფს საზოგადოებრივი უსაფრთხოების თვალსაზრისით ვითარების გაუმჯობესებას, – ამის შესახებ საქართველოს პრემიერ-მინისტრმა, ირაკლი კობახიძემ დუბაიში ქართველ ჟურნალისტებს განუცხადა.

მთავრობის მეთაურმა შინაგან საქმეთა სამინისტროს, პოლიციასა და სახელმწიფო უსაფრთხოების სამსახურს მადლობა გადაუხადა და აღნიშნა, რომ ეს სტრუქტურები აკეთებენ ყველაფერს, რათა საქართველოში გარემო იყოს უსაფრთხო, როგორც მოქალაქეებისათვის, ასევე ვიზიტორებისთვის.

„საზოგადოებრივი უსაფრთხოების მაღალ დონეს ბევრი ფაქტორი განაპირობებს. მინდა, კონკრეტულად მადლობა გადავუხადო შინაგან საქმეთა სამინისტროს, პოლიციას, ასევე სახელმწიფო უსაფრთხოების სამსახურს, რომლებიც აკეთებენ ყველაფერს იმისათვის, რომ საქართველოში გარემო იყოს უსაფრთხო როგორც ჩვენი მოქალაქეებისათვის, ასევე ჩვენი ვიზიტორებისთვის. ბევრი ფაქტორია, ქვეყანა ვითარდება, ვითარდება სტაბილურად, ეკონომიკური პროგრესი, რაც გვაქვს, განსაკუთრებით ბოლო ოთხი წლის განმავლობაში, არის ერთ-ერთი ფაქტორი, რომელიც უზრუნველყოფს საზოგადოებრივი უსაფრთხოების თვალსაზრისით ვითარების გაუმჯობესებას. ბევრი ფაქტორი ერთად, კომპლექსურად უზრუნველყოფს, რომ ჩვენ ვართ მოწინავე ქვეყანა უსაფრთხოების მაღალი დონით. მომავალშიც უნდა განვაგრძოთ ზრუნვა, რომ ეს მაღალი დონე შევინარჩუნოთ“, – განაცხადა ირაკლი კობახიძემ.