დიდი ბრიტანეთის მთავრობამ, კორუფციაში ჩართულობის ბრალდებით, თბილისის სააპელაციო სასამართლოს თავმჯდომარეს, მიხეილ ჩინჩალაძეს და სააპელაციო სასამართლოს მოსამართლეს, იუსტიციის უმაღლესი საბჭოს წევრს, ლევან მურუსიძეს სანქციები დაუწესა.

დიდი ბრიტანეთის მთავრობის განმარტებით, ჩინჩალაძე და მურუსიძე შეიყვანეს ე.წ. გლობალური ანტიკორუფციული რეგულაციების დამრღვევ პირთა სიაში. ამ სიაში მყოფ პირებს უწესდებათ ფინანსური სანქციები, კერძოდ, გაეყინებათ ფინანსური აქტივები და ეკონომიკური რესურსები. ამასთან, აღნიშნულ პირებთან ფინანსური საქმიანობა იკრძალება, ხოლო სანქციების დარღვევა ან მათთვის თავის არიდება ჩაითვლება სისხლის სამართლის დანაშაულად.

ჩინჩალაძესთან დაკავშირებით დიდი ბრიტანეთის მთავრობის მიერ გამოქვეყნებულ ინფორმაციაში ნათქვამია: „არსებობს გონივრული საფუძველი, ვივარაუდოთ, რომ მიხეილ ჩინჩალაძე არის ან იყო ჩართული სერიოზულ კორუფციაში სერიოზული კორუფციული ქმედებების განხორციელებით. როგორც თბილისის სააპელაციო სასამართლოს თავმჯდომარემ, მან მიიღო ფინანსური უპირატესობა, როგორც ჯილდო თავისი საჯარო ფუნქციების არასათანადოდ შესრულებისთვის. კერძოდ, არასათანადოდ გამოიყენა თავისი გავლენა, როგორც თბილისის სააპელაციო სასამართლოს თავმჯდომარემ, რათა უზრუნველეყო, რომ სასამართლო დანიშვნები და გადაწყვეტილებები უპირატესობას ანიჭებდნენ მოქმედ მმართველ პარტიას, „ქართული ოცნებას“. ჩინჩალაძე არის ან იყო ჩართული სერიოზულ კორუფციაში სერიოზული კორუფციული ქმედებების განხორციელებით. როგორც თბილისის სააპელაციო სასამართლოს თავმჯდომარემ, უცხოელმა საჯარო მოხელემ, რომელიც ასრულებს აღმასრულებელ ან სასამართლო ფუნქციას, მან მიიღო უპირატესობა, კერძოდ, უვადოდ დაინიშნა თბილისის სააპელაციო სასამართლოში იმ განზრახვით, რომ, შედეგად, გააგრძელოს თავისი საჯარო ფუნქციების არასათანადოდ შესრულება იმის უზრუნველყოფით, რომ თბილისის სააპელაციო სასამართლოს გადაწყვეტილებები უპირატესობას მიანიჭებენ მოქმედ მმართველ პარტიას, „ქართული ოცნებას““.

ლევან მურუსიძესთან დაკავშირებით დიდი ბრიტანეთის მთავრობის მიერ გამოქვეყნებულ ინფორმაციაში ვკითხულობთ: „არსებობს გონივრული საფუძველი, ვივარაუდოთ, რომ ლევან მურუსიძე არის ან იყო ჩართული სერიოზულ კორუფციაში სერიოზული კორუფციული ქმედებების განხორციელებით. როგორც საქართველოს იუსტიციის უმაღლესი საბჭოს წევრმა, მან მიიღო ფინანსური უპირატესობა, როგორც ჯილდო თავისი საჯარო ფუნქციების არასათანადოდ შესრულებისთვის. კერძოდ, არასათანადოდ გამოიყენა თავისი გავლენა, როგორც იუსტიციის უმაღლესი საბჭოს წევრმა, რათა უზრუნველეყო, რომ სასამართლო დანიშვნები და გადაწყვეტილებები უპირატესობას ანიჭებდნენ მოქმედ მმართველ პარტიას, „ქართული ოცნებას“. მურუსიძე არის ან იყო ჩართული სერიოზულ კორუფციაში სერიოზული კორუფციული ქმედებების განხორციელებით. როგორც საქართველოს იუსტიციის უმაღლესი საბჭოს წევრმა, მან მიიღო უპირატესობა, კერძოდ, უვადოდ დაინიშნა თბილისის სააპელაციო სასამართლოში, იმ განზრახვით, რომ, შედეგად, გააგრძელოს თავისი საჯარო ფუნქციების არასათანადოდ შესრულება იმის უზრუნველყოფით, რომ სასამართლო დანიშვნები და გადაწყვეტილებები უპირატესობას ანიჭებდნენ მოქმედ მმართველ პარტიას, „ქართული ოცნებას““.