ჩვენთვის ბატონი ფიშერი არ არის ევროპელი, ღირებულებითი თვალსაზრისით, არც ბატონი ჰერჩინსკი არ არის ჩვენთვის ევროპელი, ღირებულებითი თვალსაზრისით, გეოგრაფიულად ისინი მიეკუთვნებიან ევროპას, მაგრამ ღირებულებითი თვალსაზრისით, ისინი არ არიან თავსებადი იმ ყველაფერთან, რასაც ჩვენთვის მოიაზრებს ევროპა, - ამის შესახებ საქართველოს პრემიერ-მინისტრმა ირაკლი კობახიძემ „იმედი LIVE“-ის ეთერში განაცხადა.
როგორც მთავრობის მეთაურმა აღნიშნა, სუვერენიტეტი აქვს დაკარგული ევროპის სახელმწიფოების უდიდეს უმრავლესობას, დეგრადაციაა ადამიანის უფლებების კუთხით, ასევე ციფრებშია გამოხატული ეკონომიკური სტაგნაცია.
„ჩვენ არსად გვითქვამს, რომ მარტო ჩვენ ვართ ევროპელები, ასეთი აბსურდი შეიძლება, ახასიათებდეს გერმანიის ელჩს, მაგრამ ჩვენ ასეთი აბსურდული განცხადებები არ გვახასიათებს, მაგრამ ერთი რამ უნდა შევახსენოთ ბატონ ფიშერს, რომ ჩვენც ვართ ევროპელები და ჩვენთვის ღირებულია ის პრინციპები, ფასეულობები, რომლებსაც დაეფუძნა ევროკავშირი, განსხვავებით ბატონი ფიშერისგან, რომელიც ვერ ბედავს, შეფასება მისცეს იმას, რაც მოხდა დანიაში. ჩვენთვის შესაბამისად, კონკრეტულად ბატონი ფიშერი საერთოდ არ არის ევროპელი. ევროპელობა არ ნიშნავს გეოგრაფიულ კუთვნილებას. შეიძლება, ისინი თავსებადი იყვნენ შედარებით გვიანდელი პერიოდის ევროპასთან, ვგულისხმობ 40-იანი წლების ბოლოდან ქვემოთ რომ გავყვეთ ისტორიას, მაგრამ მათი განცხადებები და მათი დამოკიდებულება, მათ შორის ქართველი ხალხის მიმართ, თავსებადი არ არის არანაირად ევროპულ ღირებულებებთან. ამიტომ, როდესაც საუბარია ღირებულებებზე, დიახ, ჩვენ რა თქმა უნდა, გვაქვს პრეტენზია ევროპელობაზე განსხვავებით ამ ადამიანებისგან, რომლებსაც რეალურად ევროპელობაზე პრეტენზია არ აქვთ, ისინი პირდაპირ უპირისპირდებიან სწორედ იმ ღირებულებებს, რომლებსაც განასახიერებდა ევროპა მთელი ბოლო ათწლეულების განმავლობაში. სწორედ ასეთი ადამიანების ქმედებების შედეგია ის დეგრადაცია, რასაც ვხედავთ როგორც დემოკრატიის კუთხით, ისე ადამიანის უფლებების. სუვერენიტეტი აქვს დაკარგული ევროპის სახელმწიფოების უდიდეს უმრავლესობას. დეგრადაციაა ადამიანის უფლებების კუთხით, არის ეკონომიკური სტაგნაცია, რაც პირდაპირ ციფრებშია გამოხატული. ბევრჯერ გვისაუბრია, რომ 30 პროცენტი იყო 2008 წელს მსოფლიო ეკონომიკაში ევროკავშირის ეკონომიკის წილი და ეს 30 პროცენტი ჩამოსულია 17,5 პროცენტამდე. მათემატიკურად იზომება ეს ყველაფერი“, - განაცხადა ირაკლი კობახიძემ.
მისივე თქმით, მათემატიკურად არ იზომება უკუსვლა დემოკრატიული და ადამიანის უფლებების კუთხით, მაგრამ რეალურად ზუსტად ასეთივე მასშტაბის უკუსვლა განიცადა ევროკავშირმა, განსაკუთრებით 2008 წლის შემდეგ.
„2008 წლის შემდეგ ყველა მიმართულებით არის სტაგნაცია, დეგრადაცია, უკუსვლა და თუ ევროპული ბიუროკრატია კოლექტიური ფიშერები, ჰერჩინსკები და ა.შ. გააგრძელებენ იგივე მიმართულებით სვლას, რა თქმა უნდა, არათუ არ შეჩერდება ეს უკუსვლა და დეგრადაცია, არამედ პირიქით, კიდევ უფრო მეტად გაღრმავდება, ამიტომ ჩვენი მოკრძალებული რჩევაა ევროპული ბიუროკრატიის მიმართ, უფრო მეტად იზრუნონ, თუ აქვთ ამის რესურსი, ევროპის ობიექტურ ინტერესებზე და ევროკავშირის მოსახლეობის ობიექტურ ინტერესებზე. ჩვენ გვინდა ასეთი ევროკავშირის წევრობა, სადაც აღდგება ის ტენდენციები, რომლებიც მანამდე ძალიან მკვეთად იყო გამოხატული. ვსაუბრობ დადებით ტენდენციებზე დემოკრატიის, ადამიანის უფლებების, ეკონომიკური კეთილდღეობის კუთხით და ა.შ“, - განაცხადა პრემიერ-მინისტრმა.
მთავრობის მეთაურის თქმით, ადგილი ჰქონდა მშვიდობიანი შეკრების ბრუტალურ დარბევას და ამაზე ევროკავშირის ელჩი, გერმანიის ელჩი და დანიის ხელისუფლება ვერ ბედავენ სათანადო რეაქციის გამოვლენას.
„წერილს რა მიზანიც ჰქონდა, ეს შინაარსიდან მარტივად განიმარტება. ჩვენ საზოგადოებას გვინდა, ვაჩვენოთ, რა ხდება სინამდვილეში ევროპაში, ევროპულ სტრუქტურებში, როგორია სინამდვილეში მათი ღირებულებები და დანიის მაგალითმა ეს ძალიან კარგად აჩვენა. კიდევ უფრო კარგად აჩვენა ეს ყველაფერი შემდგომმა რეაქციებმა. ყველამ ვნახეთ, როგორ გაურბოდნენ კითხვებს ევროკავშირის ელჩები. მათ არაფერი ჰქონდათ საპასუხო. ეს არის ყველაზე მეტად შემაშფოთებელი. კითხვები დასვეს ჟურნალისტებმა 2024 წელთან დაკავშირებით, როდესაც იყო რამდენიმე უხეში გადაცდომა სამართალდამცავი ორგანოების მხრიდან. შედარება რომ გავაკეთოთ, ეს იყო ექსცესები და ხელისუფლებას ჰქონდა მყისიერი რეაგირება. მყისიერად დავგმეთ ის გადაცდომები, რომელიც საზოგადოებამ იხილა. არის ევროკავშირის, გერმანიის ელჩები, არის დანიის ხელისუფლება, რომლებიც ამის დაგმობასაც კი ვერ ბედავენ. ეს აჩვენებს სრულ ღირებულებით დეგრადაციას, რასაც განიცდის ევროპული ბიუროკრატია და რასაც ვხედავთ ევროპის მასშტაბით, რაც არის ტრაგიკული და სამწუხარო. ჩვენ ვნახეთ აბსოლუტურად მშვიდობიანი შეკრების ბრუტალური დარბევა და ამაზე ევროკავშირის ელჩი, გერმანიის ელჩი და დანიის ხელისუფლება ვერ ბედავენ სათანადო რეაქციის გამოვლენასაც კი, რაც იქნებოდა ამ ყველაფრის დაგმობა და თავისი სახელის დარქმევა“, - განაცხადა პრემიერმა.
როგორც მთავრობის მეთაურმა აღნიშნა, საქართველოს უნდა ისეთი ევროკავშირის წევრობა, რომელიც უბრუნდება იმ ღირებულებებს, რომლებსაც თავის დროზე დაეფუძნა.
„ასეთ ევროკავშირს როცა გამადლის გერმანიის ელჩი, ეს რა თქმა უნდა, ვერავითარ გამართლებას ვერ დაექვემდებარება. ჩვენ გვინდა სხვანაირი ევროკავშირი. ვერ დაგვამადლის ვერავინ ასეთ ევროკავშირს, სადაც ძაღლებით უსწორდებიან მშვიდობიან მომიტინგეებს. ასეთ ევროკავშირს გერმანიის ელჩი, ეს კონკრეტული ადამიანი ჩვენ ვერ დაგვამადლის. ჩვენ გვინდა ისეთი ევროკავშირის წევრობა, რომელიც უბრუნდება იმ ღირებულებებს, რომლებსაც თავის დროზე დაეფუძნა. რა იყო ეს ღირებულება - მინდა, შეგახსენოთ, რომ 40-იან წლებამდე ევროპისთვის უცხო იყო ის ღირებულებები, რომლებმაც ფესვი მოიკიდა ევროპაში სწორედ 40-იანი წლების ბოლოს. ძირითადად 1949 წლიდან, როდესაც დამყარდა ახალი კონსტიტუციური სისტემები სხვადასხვა ქვეყანაში, მათ შორის გერმანიაში. მანამდე ევროპა იყო გამუდმებული ომების სივრცე. აქ არ იყო დამკვიდრებული ადამიანის უფლებები სისტემური სახით, სერიოზული პრობლემები იყო ადამიანის უფლებების კუთხით ევროპაში ტრადიციულად. მანამდე გახსოვთ ინკვიზიცია, კოცონზე ადამიანების დაწვა, მეცნიერების დაწვა კოცონზე და ა.შ. ათასი უბედურება. ამიტომ როდესაც ჩვენ ვსაუბრობთ ევროპულ ღირებულებებზე, ესეც უნდა გავიხსენოთ, რომ ის ღირებულებები, რომლებიც დამკვიდრდა ევროპაში, მაინცდამაინც ძველი არ არის. დამკვიდრდა გასული საუკუნის 40-იანი წლების ბოლოს. ამიტომ უნდა შევახსენოთ ჩვენ ევროპელ ბიუროკრატებს, რომ იმის დაკარგვა, რასაც აქვს მხოლოდ რამდენიმე ათწლეულის ისტორია, მარტივად შეიძლება. შესაბამისად, ისინი მარტივად უნდა გაუმკლავდნენ ამ ღირებულებებს, რომლებსაც აქვს სულ რამდენიმე ათეული წლის ისტორია ევროპაში“, - განაცხადა ირაკლი კობახიძემ.
მთავრობის მეთაურმა აღნიშნა, რომ სინამდვილეში, საზოგადოება თვალს ადევნებდა ხელისუფლების გადატრიალების ძალადობრივ მცდელობებს 2024 წლის ნოემბერ-დეკემბერში და მანამდეც.
„თქვენ გახსოვთ რეაქციები საქართველოში მომხდართან დაკავშირებით, როდესაც მშვიდობიანი შეკრების დარბევა უწოდეს იმას, რაც ხდებოდა და ამ დროს ყველას ძალიან კარგად გვახსოვს, თუ როგორი „მშვიდობიანი“ იყო ის შეკრებები. სინამდვილეში, ჩვენ ვადევნებდით თვალს 2024 წლის ნოემბერ-დეკემბერში, მანამდეც, ხელისუფლების გადატრიალების ძალადობრივ მცდელობებს. ამას უწოდებდნენ მშვიდობიან შეკრებებს, აქაც ჩანს რამდენად სამარცხვინოა მათი მდგომარეობა. და როდესაც იყო მძიმე გადაცდომები, მაგრამ ეს იყო კონკრეტული ექსცესები სამართალდამცავი ორგანოების კონკრეტული წარმომადგენლების გადაცდომები, ამის განზოგადება ხდებოდა სრულიად უსამართლოდ. ეს არის ორმაგი სტანდარტები, ძალიან სამარცხვინო სახეს აჩვენებს დღეს ევროპული ბიუროკრატია. ამის ადგილობრივი გამოხატულება იყო ევროკავშირის ელჩის, გერმანიის ელჩის უსუსური სახე, როდესაც მათ ვერ გაბედეს ამ ქმედებისთვის შეფასების მიცემაც კი, დანარჩენზე საზოგადოება ჩამოიყალიბებს საკუთარ მოსაზრებას,“- აღნიშნა პრემიერმა.
კითხვაზე, რომელიც დანიაში განვითარებულ მოვლენებზე ადგილობრივი პოლიციის პასუხს შეეხებოდა, რომ როდესაც მოქალაქეები არ ემორჩილებიან პოლიციის მითითებებს, მაშინ შესაძლებელია, აუცილებელი გახდეს ძალის გამოყენება, მთავრობის მეთაურმა აღნიშნა, რომ დიალოგსა და წარუმატებელ დისკუსიაზე საუბარი უადგილოა, როდესაც მშვიდობიანი შეკრება ძალის გამოყენებით დაარბიეს.
„გავიხსენოთ, რა ხდებოდა თბილისში, პირდაპირ თავს ესხმოდნენ პოლიციელებს, ინსტიტუტებს, რა დიალოგზე იყო საუბარი და ამას დაარქვეს აქ მშვიდობიანი შეკრება და დანიაში თურმე დიალოგის ხარისხი არ მოეწონათ მშვიდობიანი შეკრების მონაწილეებთან. საერთოდ „სად არიან“- ჟარგონით რომ ვთქვათ ეს ადამიანები, „სად არის“ დანიის ხელისუფლება, სად არის მთლიანად ევროპული ბიუროკრატია. რა დიალოგზე იყო საერთოდ საუბარი, მშვიდობიანი შეკრება იყო და ბრუტალური მეთოდებით, ძაღლების გამოყენებით მოხდა ამ მშვიდობიანი შეკრების დარბევა. რა დიალოგზე და წარუმატებელ დისკუსიაზეა საუბარი,“- აღნიშნა პრემიერმა.
მთავრობის მეთაურმა უპასუხა შეკითხვას, რომელიც პრემიერ-მინისტრის ღია წერილზე ოპოზიციის შეფასებებს ეხებოდა.
„ოპოზიციას რაც შეეხება, ჯერ ტექსტების განმარტებაზე არ ჰყოფნით ინტელექტი, მერე ქვეტექსტების განმარტება რომ მოთხოვოთ. რა თქმა უნდა, საამისო არც ინტელექტი აქვთ და არც შეგნება.
რაც შეეხება რეალობას, პირდაპირ და ღიად რომ ვთქვათ, გვაწუხებს ერთადერთი რამ, რაც ხდება ევროპაში და ქართველი ხალხის მიმართ დამოკიდებულებაც არის ამის გაგრძელება და ჩვეულებრივი გამოხატულება. რა დამოკიდებულებაც აქვთ ამ ადამიანებს ქართველი ხალხის მიმართ, არის აბსოლუტურად ლოგიკური გაგრძელება იმ დეგრადაციისა, რომელსაც ზოგადად განიცდის ევროკავშირი ევროპული ბიუროკრატიის „წყალობით“. ეს არის ერთადერთი ტექსტიც და ქვეტექსტიც, რაც ადამიანმა უნდა წაიკითხოს ჩვენს მიერ გამოქვეყნებული ღიას წერილიდან. ამის იქით არაფერი არ არის სინამდვილეში საძიებელი, უბედურებაა. რომელიმემ გასცა პასუხი იმ კითხვებზე, რომლებიც დასმული იყო ამ წერილში? თუნდაც ქართველმა ოპოზიციონერმა. შეფასება გაუკეთეს იმას, რაც მოხდა დანიაში? არ გაუკეთებიათ ეს შეფასება იმიტომ, რომ ისინი არიან ზუსტად იგივე დონეზე, რა დონეზეც არის პეტერ ფიშერი და პაველ ჰერჩინსკი. ერთი დონეა და ეს არის აბსოლუტურად მარგინალური მდგომარეობა, რა მდგომარეობამდეც მივიდა მთლიანად ეს კოლექტივი - აგენტურა ქვეყანაში და მათი ხელმძღვანელობა ქვეყნის გარეთ“, - განაცხადა პრემიერმა.
მთავრობის მეთაურმა ქვეყნის დაკონკრეტებისგან თავი შეიკავა, თუმცა განმარტა, რომ საუბარი არ არის საქართველოს მეზობელ ქვეყანაზე და ამავდროულად, საუბარია ქვეყანაზე, რომელიც ევროკავშირის წევრი არ არის.
„არის ე.წ პროევროპული ქვეყანა, ეს არ არის ჩვენი მეზობელი ქვეყანა, რომ ამას რაღაც სპეკულაციები არ მოჰყვეს, რომელიც რუსეთში გზავნის საკუთარ კონკრეტულ პროდუქციას აფხაზეთის გავლით და ეს ქვეყანა არის გამოცხადებული უკიდურესად პროევროპულ და ძალიან დემოკრატიულ ქვეყნად. ასეთი რაღაცები ხდება. ყველამ ყველაფერი იცის სინამდვილეში - აფხაზეთს იყენებს იმისთვის, რომ კონკრეტული პროდუქცია გაგზავნოს ექსპორტზე რუსეთში და ეს არის პროევროპული ქვეყანა და საქართველო არის ანტიევროპული და პრორუსული ქვეყანა. იმდენად სამარცხვინოა ეს ორმაგი სტანდარტები, რომ არ შეიძლება მაინცდამაინც ღრმა შეფასება მივცეთ ამ ყველაფერს“, - განაცხადა ირაკლი კობახიძემ.
პრემიერ-მინისტრი საქართველოს ხელისუფლების მიმართ ევროპულ სტრუქტურებში გაკეთებულ შეფასებებს გამოეხმაურა და აღნიშნა, რომ მსგავსი განცხადებების მიზანია მუდმივი წნეხის შენარჩუნება.
„ოპოზიციას უნდა გადაუგდონ ხოლმე რამდენიმედღიანი მაშველი რგოლი, ამის იქით ვერ მიდის მათი ფანტაზია. საბოლოო ჯამში, რაღაც დონეზე მიზანს აღწევენ, რადგან სრული სიმშვიდე მაინც არ გვაქვს. მუდმივ რეჟიმში ცდილობენ, პატარ-პატარა ჩხვლეტებით ზიანი მიაყენონ ქართველ ხალხს და ამისთვის იყენებენ ადგილობრივ აგენტურას. რაღაც მიზანს ეს მაინც აღწევს - ვერ აღწევს პრინციპულ მიზანს - ვერ დაარღვიეს მშვიდობა, ვერ დაარღვიეს პრინციპულად სიმშვიდე, ვერ შეცვალეს ხელისუფლება, ვერ ჩამოშალეს ეკონომიკა, მაგრამ გარკვეულ შედეგს მაინც აღწევენ. რომ არ ყოფილიყო ეს სიცრუე, უსამართლობა, ეს სამარცხვინო თავდასხმები ქართველ ხალხზე, ბუნებრივია, სიმშვიდის ხარისხი ბევრად უფრო მაღალი იქნებოდა. ამ დონეზე ცდილობენ, ელემენტარული პრობლემები მაინც შექმნან ქართველი ხალხისთვის. ამას ემსახურბა ის ტყუილები და უსამართლობა, რასაც მუდმივ რეჟიმში ვხედავთ. რას ემსახურებოდა მაგალითად კანდიდატის სტატუსის არმინიჭება თავის დროზე, მოლაპარაკებების არგახსნა. მაშინ მეტი იმედი ჰქონდათ, რომ ხელისუფლებას შეცვლიდნენ და ამას აკეთებდნენ წინასაარჩევნოდ, 2024 წლის საპარლამენტო არჩევნებამდე, მაგრამ აქაც ვერ მიაღწიეს მიზანს, რისი იმედიც ჰქონდათ, მაგრამ გარკვეული შედეგი აქვთ, რადგან შეეძლო ქვეყანას, მშვიდად განეგრძო განვითარება“, - აღნიშნა ირაკლი კობახიძემ.
მთავრობის მეთაურმა აღნიშნა, რომ ორმაგი სტანდარტები იმდენად თვალსაჩინო გახდა, რომ ქართულ საზოგადოებას შეცდომაში ვეღარ შეიყვანენ.
„მწვანე შუქი იყო თავიდან ბოლომდე ანთებული იმის მიმართ, რაც მოხდა 2007 წელს ტელეკომპანია იმედში. მწვანე შუქი ე.წ. დემოკრატიული ქვეყნების მხრიდან. იქ იყო ბრიტანეთიც, გერმანიაც, სხვებიც. მაშინ გახსოვთ ვინმე დასანქცირებული, ან ვინმეს მიმართ რაიმე უხეში განცხადება გაკეთებული? - ესეც ხომ „გაუპრავეს“ და ამის შემდეგ „გაუპრავეს“ საპრეზიდენტო არჩევნები იმ კაცს, რომელმაც სისხლიანი რეჟიმი დაამყარა საქართველოში და ახლა ეს ადამიანები ჩვენ გველაპარაკებიან დემოკრატიაზე. რა თქმა უნდა, მათთვის აბსოლუტურად მისაღებია ის, რაც ხდება დანიაში, იმიტომ რომ მანამდე მათთვის აბსოლუტურად მისაღები იყო ის, რაც მოხდა 26 მაისს, საქართველოში, როდესაც ხალხი დახოცეს პირდაპირ. ხალხის დახოცვა „გაუპრავეს“ სააკაშვილის რეჟიმს 2011 წლის 26 მაისს, როდესაც შემდეგ გახსოვთ, ცხედრები განათავსეს ჯიხურების თავზე, რომ დენით დაღუპვის იმიტაცია მოეწყოთ და ეს „გაუპრავეს“, ამაზე მწვანე შუქი აუნთეს, სწორედ, ამ ე.წ. დემოკრატებმა, ბრიტანელებმა, გერმანელებმა და სხვებმა. ამიტომ მათთვის სრულიად ორგანული და მისაღებია ის, რაც მოხდა დანიაში, იმიტომ რომ მანამდე ამას "აპრავებდნენ" თბილისში, "აპრავებდნენ" სხვა ქვეყნებში, სადაც მათთვის მისაღები იყო დიქტატორული რეჟიმები, სისხლიანი ავტორიტარული რეჟიმები. ეს ორმაგი სტანდარტები იმდენად თვალსაჩინო გახდა უკვე, მთელი მსოფლიოს მასშტაბით იმდენი მაგალითი იხილა უკვე საზოგადოებამ, რომ არ მგონია, შეცდომაში ქართული საზოგადოების შეყვანა კიდევ იყოს შესაძლებელი,”- აღნიშნა პრემიერმა.
მთავრობის მეთაურის შეფასებით, ამის მიუხედავად, მნიშვნელოვანია ქვეყნის ინტერესებზე ზრუნვა და ქვეყნის ინტერესებშია, რომ გვარამია არ იყოს ოპოზიციის ერთ-ერთი ლიდერი.
„როგორ შეიძლება, ისეთ ქვეყანაში, როგორიც საქართველოა, მრავალსაუკუნოვანი კულტურის ქვეყანაში, გვარამია იყოს ოპოზიციის ერთ-ერთი ლიდერი, ან ბოკუჩავა, ან ვაშაძე, ან ჯაფარიძე. ესენი როგორ შეიძლება იყვნენ ოპოზიციის ლიდერები. პარლამენტში შემოვიდნენ გახარიები - ეს პარტია. ან ინტელექტის დონე ნახეთ, ან კეთილსინდისიერების დონე, როგორ შეიძლება, ასეთ ხალხს ერქვას ოპოზიცია საქართველოში - მრავალსაუკუნოვანი კულტურის მქონე ქვეყანაში. ასეთ ხალხს, ინტელექტისგან და კეთილსინდისიერებისგან სრულად დაცლილ ხალხს არ შეიძლება, ერქვას ოპოზიცია. ამიტომ, ჩვენ უნდა ვიზრუნოთ ამ მდგომარეობის შეცვლაზე, გაჯანსაღებაზე. ამისთვის უნდა გამოვიყენოთ ყველა სამართლებრივი მექანიზმი და ყველაზე ეფექტური სამართლებრივი მექანიზმი არის საკონსტიტუციო სასამართლო, რომელსაც მივმართეთ შესაბამისი სარჩელით“, - განაცხადა ირაკლი კობახიძემ.