ვიეტნამში ტაიფუნს 197 ადამიანი ემსხვერპლა

ვიეტნამში ტაიფუნ „იაგის“ გამო დაიღუპა სულ მცირე 197 ადამიანი, დაახლოებით 800 დაშავდა, ასზე მეტი კი უგზო-უკვლოდ დაკარგულად ითვლება. ამის შესახებ Associated Press-ი წერს ვიეტნამურ მედიაზე დაყრდნობით.

დაღუპულები ძირითადად წყალდიდობასა და მეწყერს ემსხვერპლნენ. წყლისა და ტალახის ნაკადებმა გაანადგურა ხიდები, წაიღო მანქანები მგზავრებით და მთელი სოფლები. განხორციელდა დაახლოებით 50 ათასი ადამიანის ევაკუაცია, ქვეყნის ნახევარში სკოლები დაიხურა. დაზარალებულ რაიონებში სასმელი წყლისა და საკვების დეფიციტია. ზარალი უკვე ათეულობით მილიონ დოლარად არის შეფასებული.

ქვეყნის დედაქალაქ ჰანოიში ბოლო ოცი წლის განმავლობაში ყველაზე ძლიერი წყალდიდობაა. ფეხით მოსიარულეებს წყალი მუხლებზე მაღლა სწვდება, ბევრნი ნავებით გადაადგილდებიან. წყალში ნაგავი დაცურავს.

„იაგი ყველაზე ძლიერი ტაიფუნია, რომელიც დაატყდა თავს ვიეტნამს ბოლო ოცდაათი წლის განმავლობაში. სანაპიროსთან მისი სიჩქარე, რომელსაც მან შაბათს მიაღწია, 7 სექტემბერს იყო საათში 149 კილომეტრი. მოგვიანებით ქარი შესუსტდა, თუმცა ქვეყნის ზოგიერთ რაიონში კვლავაც გრძელდება კოკისპირული წვიმები. „იაგიმ“ გადაიარა ფილიპინები, ჩინეთის სამხრეთი სანაპირო, ლაოსი და მიანმარი, სადაც მან ასევე გამოიწვია მსხვერპლი და ნგრევა.

კლიმატოლოგები აღნიშნავენ, რომ „იაგის“ მსგავსი შტორმები ძლიერდება კლიმატის ცვლილების გამო. ქარიშხლები იკვებება ოკეანის წყლებით, რომლებიც წლითიწლობით სულ უფრო მეტად თბება და თბილი ჰაერი მათ საშუალებას აძლევს, მეტი ტენიანობა შეინარჩუნონ.

2024 წლის ზაფხული ისტორიაში ყველაზე ცხელი იყო. მოსალოდნელია, რომ ასე იქნება მთელი მიმდინარე წლის განმავლობაში, რაც გასული წლის ტემპერატურის რეკორდებს მოხსნის.

კლიმატის ცვლილების შესანელებლად მეცნიერები, აქტივისტები და ზოგიერთი პოლიტიკოსი მთელს მსოფლიოში ითხოვენ ნავთობის, გაზისა და ქვანახშირის მოხმარების შემცირებას, რომლებიც დაწვისას წარმოქმნიან სათბურის გაზებს. სათბურის აირები გლობალური დათბობის ერთ-ერთი მთავარი ფაქტორია.