Featured Articles

დაჯგუფება „ჰამასმა“ საკუთარი ლიდერის იაჰია სინვარის გარდაცვალება ოფიციალურად დაადასტურა. ინფორმაციას ებრაული მედია ავრცელებს.

მათი ცნობით, სინვარის სიკვდილი „ჰამასის“ მაღალჩინოსანმა ბასემ ნაიმმა დაადასტურა, რომელიც დაჯგუფების პოლიტიკური ბიუროს ხელმძღვანელია.

„ჰამასი“ ყოველი მისი ლიდერის ლიკვიდაციის შემდეგ ხდება უფრო ძლიერი და პოპულარული. რა თქვა უნდა, ლიდერების დაკარგვა, თან ისეთების, როგორიცაა იაჰია სინვარი ტკივილის მომტანია, მაგრამ ჩვენ დარწმუნებულნი ვართ, რომ ბოლოს გავიმარჯვებთ“, - ციტირებს მედია ნაიმს.

ნაიმს აგრეთვე ეჭვი ეპარება იმაში, რომ ისრაელი „ჰამასის“ ლიდერების მკვლელობით დაჯგუფების განადგურებას შეძლებს. „ისრაელს ჰგონია, რომ ჩვენი ლიდერების მკვლელობა მოძრაობის და პალესტინელი ხალხისთვის ბრძოლის დასრულებას ნიშნავს. მათ შეუძლიათ დაიჯერონ ყველაფერი, რაც სურთ და ეს პირველი შემთხვევა არაა, როცა ისინი ასე ამბობენ“, - დასძინა მან.

სინვარის ლიკვიდაციის შესახებ პირველი არაოფიციალური ცნობები გუშინ გავრცელდა. მოგვიანებით „ჰამასის“ ლიდერის ლიკვიდაცია ებრაულმა მხარემ ოფიციალურად დაადასტურა.

რომის პაპმა ფრანცისკემ პირველი ავტობიოგრაფია დაწერა. The Guardian-ი გამომცემლობა Penguin Random House-ზე დაყრდნობით იტყობინება, რომ წიგნი სახელწოდებით „იმედი“ 2025 წლის იანვარში გამოვა.

ფრანცისკეს თანაავტორი იტალიელი გამომცემელი კარლო მუსო გახდა. ისინი წიგნზე ბოლო 6 წლის განმავლობაში მუშაობდნენ, თუმცა თავიდან ნამუშევრის გამოქვეყნებას პონტიფექსის გარდაცვალების შემდეგ გეგმავდნენ.

გამომცემლობაში განმარტავენ, რომ რომის პაპმა გადაიფიქრა და წიგნის ახლა გამოქვეყნება „ჩვენი დროის საჭიროებებიდან გამომდინარე“ გადაწყვიტა.

წიგნი ფრანცისკეს სიცოცხლეზე მოგვითხრობს - დაბადებიდან ამ დრომდე. ავტობიოგრაფიაში რომის პაპი მსჯელობს ეკლესიის მომავალზე, გლობალურ კონფლიქტებზე, ფეხბურთსა და ბევრ სხვა თემაზე.

მემუარები 80 ქვეყანაში 2025 წლის 14 იანვარს გამოქვეყნდება.

უკრაინის პრეზიდენტის ვოლოდიმირ ზელენსკის განცხადებით, უკრაინის ნატოში მიწვევა - რუსეთთან ომის შეწყვეტის ერთადერთი გზაა. ინფორმაციას The Financial Times-ი ავრცელებს.

როგორც ზელენსკი გამოცემასთან ინტერვიუში აღნიშნავს, უკრაინის ნატოში მიწვევა მისი ხუთპუნქტიანი გამარჯვების გეგმის პირველი პუნქტია, რამაც რუსეთის პრეზიდენტი ვლადიმერ პუტინი მოლაპარაკებების მაგიდასთან უნდა დასვას.

„ჩვენ ვერ ვიქნებით ძლიერები მიწვევის გარეშე, რამაც, თავის მხრივ, ჩვენი დიპლომატია უნდა გააძლიეროს, რათა ომი დავასრულოთ“, - განუცხადა ზელენსკიმ The Financial Times-ს.

„ეს ომი დასრულდება მაშინ, როცა პუტინი იზოლაციაში აღმოჩნდება, და სხვა პარტნიორები მას დიპლომატიისკენ უბიძგებენ“, - დასძინა მან.

გამოცემის მტკიცებით, იმ დროს, როცა ნატოს ყველა წევრი ქვეყანა თანხმდება, რომ უკრაინა ალიანსში წევრობის შეუქცევად გზას ადგას, აშშ და გერმანია კიევისთვის მიწვევის გაგზავნისგან ფორმალურად თავს იკავებენ, რადგან რუსეთთან კონფლიქტის ესკალაციის ეშინიათ.

ზოგი ოფიციალური პირი პირად საუბრებში ამბობს, რომ უკრაინის ნატოში გაწევრიანება მოსკოვთან მოლაპარაკებების დროს სავაჭრო თემა იქნება. „ნატოში მიწვევა ჩვენი ხალხისა და ჯარისკაცების მორალურ სულს აამაღლებს“, - აცხადებს ზელენსკი. „მიწვევა ნიშნავს კიდევ ერთ გადადგმულ ნაბიჯს ნატოსკენ, რაც, თავის მხრივ, ნიშნავს, რომ მათი შვილები აღარ მოკვდებიან. არასდროს, იმიტომ რომ ჩვენ ნატოს წევრები ვიქნებით, ხოლო თუ ჩვენ ნატოში არ მიგვიწვევენ, მორალურად დავეცემით“.

აშშ-ის პრეზიდენტს, ჯო ბაიდენსა და ისრაელის პრემიერ-მინისტრს, ბენიამინ ნეთანიაჰუს შორის სატელეფონო საუბარი შედგა.

საუბრისას ბაიდენმა დადებითად შეაფასა ისრაელის თავდაცვის ძალების მუშაობა მას შემდეგ, რაც მათ რაფაში „ჰამასის“ ლიდერი იაჰია სინვარი მოკლეს. ამის შესახებ ინფორმაციას ისრაელის პრემიერ-მინისტრის ოფისი ავრცელებს.

განცხადების თანახმად, ლიდერები შეთანხმდნენ, რომ არსებობს დარჩენილი მძევლების „გათავისუფლების დაჩქარების“ შესაძლებლობა.

ამასთან, განცხადებაში აღნიშნულია, რომ ბაიდენი და ნეთანიაჰუ იმუშავებენ ამ მიზნის მისაღწევად.

ისრაელის მთავრობის პრესსამსახურის მონაცემებით, ამჟამად ღაზაში რჩება 109 ისრაელელი მძევალი, აქედან 36, სავარაუდოდ, გარდაცვლილია.