Featured Articles

აშშ-ის პრეზიდენტმა, ჯო ბაიდენმა განაცხადა, რომ შეერთებული შტატები მზად არის რუსეთთან, ჩინეთთან და ჩრდილოეთ კორეასთან მოლაპარაკებებისთვის ბირთვული საფრთხის შემცირების მიზნით. ამის შესახებ აღნიშნულია აშშ-ის პრეზიდენტის ნობელის მშვიდობის პრემიის გამარჯვებულისადმი გავრცელებულ განცხადებაში.

2024 წლის ნობელის მშვიდობის პრემია მიენიჭა იაპონურ ორგანიზაციას Nihon Hidankyo, რომელიც აერთიანებს ბირთვული დაბომბვის შედეგად გადარჩენილებს და რომლის ძალისხმევა მიმართულია ბირთვული იარაღისგან თავისუფალი სამყაროს შექმნისკენ.

ბაიდენმა აღნიშნა, რომ აუცილებელია წინსვლის გაგრძელება რომ მსოფლიოს საბოლოოდ და სამუდამოდ გათავისუფლდეს ბირთვული იარაღისგან. ამიტომ, მისი თქმით, შეერთებული შტატები მზადაა რუსეთთან, ჩინეთთან და ჩრდილოეთ კორეასთან მოლაპარაკებებისთვის „წინაპირობების გარეშე“ ბირთვული საფრთხის შემცირების მიზნით.

„არც ჩვენი ქვეყნების და არც მსოფლიოს ინტერესებში არ არის ბირთვული არსენალების შემცირებაში პროგრესის შეფერხება. ბირთვული საფრთხის შემცირება მნიშვნელოვანია თანამედროვე მსოფლიოში არსებული საფრთხეების გამო. ეს ბირთვული რისკები ძირს უთხრის ნორმებსა და შეთანხმებებს, რომლებზეც ჩვენ კოლექტიურად ვმუშაობდით“, – განაცხადა აშშ-ის პრეზიდენტმა.

დღეიდან, 14 ოქტომბრიდან ნატომ დაიწყო ყოველწლიური ბირთვული სწავლება Steadfast Noon.

ორკვირიან წვრთნებში მონაწილეობს ალიანსის წევრი სახელმწიფოების 2000 სამხედრო და სხვადასხვა ტიპის 60-ზე მეტი თვითმფრინავი, მათ შორის რეაქტიული თვითმფრინავები ბირთვული ქობინებით, ბომბდამშენები და თანმხლები გამანადგურებლები.

წვრთნები ძირითადად, ჩატარდება ბელგიის და ნიდერლანდის საჰაერო სივრცეში. ასევე, დანიაში, დიდ ბრიტანეთსა და ჩრდილოეთის ზღვის თავზე.

სწავლებაში ჩართულია ნატოს 13 სახელმწიფოს სამხედრო-საჰაერო ძალების თვითმფრინავები.

წვრთნების დაწყების წინ, ორგანიზაციის გენერალურმა მდივანმა მარკ რუტემ განაცხადა, რომ Steadfast Noon-ი მკაფიო სიგნალია ნებისმიერი მოწინააღმდეგისთვის, რომ ნატო ყველა მოკავშირეს დაიცავს.

2024 წლის გაზაფხულსა და ზაფხულში რუსეთმა ჩაატარა არასტრატეგიული (ტაქტიკური) ბირთვული ძალების წვრთნები.

თავდაცვის სამინისტროს განცხადებით, ეს სწავლება მიმართული იყო „რუსეთის ტერიტორიული მთლიანობის და სუვერენიტეტის უპირობო უზრუნველყოფისკენ რუსეთის ფედერაციის მიმართ დასავლეთის ცალკეული ოფიციალური პირების პროვოკაციული განცხადებების და მუქარის პასუხად“. ვის და რომელ განცხადებებს გულისხმობდნენ, დაკონკრეტებული არ ყოფილა.

პარასკევს, 18 ოქტომბერს აშშ-ის პრეზიდენტი ჯო ბაიდენი გერმანიას ეწვევა. პრეზიდენტი ბერლინში კანცლერ ოლაფ შოლცსა და პრეზიდენტ ფრანკ-ვალტერ შტაინმაიერს შეხვდება.

ბაიდენი ბერლინში უკრაინისა და ახლო აღმოსავლეთის საკითხებს განიხილავს.

ბაიდენი ბერლინში ამ კვირაში უნდა ჩასულიყო, თუმცა აშშ-ში ქარიშხლის გამო გააუქმა.

დღეს ლიეტუვაში საპარლამენტო არჩევნები იმართება. საპარლამენტო არჩევნები ლიეტუვაში შერეული სისტემით იმართება. 141-ადგილიან სეიმში 70 დეპუტატს პარტიული სიებიდან, დანარჩენს კი ერთმანდატიან ოლქებში აირჩევენ.

 ბოლო სოციოლოგიური გამოკითხვების თანახმად, ოპოზიციური სოციალ-დემოკრატიული პარტია ლიდერობს, რომელსაც ამომრჩველთა დაახლოებით 18 პროცენტი უჭერს მხარს. პარტიის ლიდერი ევროპარლამენტარი ვილია ბლინკევიჩუტე იმედს გამოთქვამს, რომ პრემიერ-მინისტრის პოსტს დაიკავებს.

კვლევების თანახმად, მოქმედი პრემიერ-მინისტრის ინგრიდა შიმონიტეს მემარჯვენე-ცენტრისტული პარტია „სამშობლოს კავშირი“ მესამე ადგილზეა 9%-იანი მხარდაჭერით. მას წინ უსწრებს პოპულისტური ნაციონალისტური პარტია, რომელსაც გამოკითხვებით, ამომრჩეველთა 12 პროცენტი ემხრობა.