Featured Articles

აშშ-ს ვიცე-პრეზიდენტმა და დემოკრატიული პარტიის პრეზიდენტობის კანდიდატმა, კამალა ჰარისმა ჯანმრთელობის მდგომარეობის შესახებ ექიმის მიერ გაცემული შეფასება გამოაქვეყნა.

თერაპევტი ჯოშუა საიმონსი წერს, რომ 59 წლის ვიცე-პრეზიდენტის ჯანმრთელობა შესანიშნავ მდგომარეობაშია, მას აქვს როგორც ფიზიკური, ისე მენტალური სიმტკიცე პრეზიდენტის მოვალეობის შესასრულებლად.

აქვე აღნიშნულია, რომ კამალა ჰარისს უვლინდება სეზონური ალერგიები და ურტიკარია, რომელიც მკურნალობას ექვემდებარება.

თერაპევტის დასკვნით, კამალა ჰარისს არ აქვს დიაბეტი, არ აწუხებს წნევა, მაღალი ქოლესტერინი ან გულის დაავადებები. რაც შეეხება გენეტიკურ დაავადებებს, დედის მხრიდან ნათესავებში ფიქსირდება ნაწლავის კიბო, თუმცა ვიცე-პრეზიდენტი პრევენციულ რეკომენდაციებს მიჰყვება და კვლევებს რეგულარულად იტარებს.

ვიცე-პრეზიდენტი პერიოდულად და ზომიერად მოიხმარს ალკოჰოლს და საკმაოდ დატვირთული გრაფიკის მიუხედავად, აქტიური ცხოვრების წესს მისდევს.

თურქეთის პრეზიდენტი რეჯეფ თაიფ ერდოღანი შესაძლო სამთავრობო ცვლილებებზე საუბრობს.

როგორც თურქეთის ლიდერმა განაცხადა, მინისტრთა კაბინეტში და მმართველ „სამართლიანობისა და განვითარების პარტიის“ ხელმძღვანელობაში მოსალოდნელია საკადრო ცვლილებები.

ამის შესახებ ერდოღანმა სერბეთიდან სამშობლოში გზაზე მედიასთან ისაუბრა.

ერდოღანი აცხადებს, რომ შესაძლო ცვლილებებთან დაკავშირებით გარკვეულ შეფასებებს გააკეთებს. თუმცა, თურქეთის პრეზიდენტს მეტი დეტალი არ გაუსაჯაროებია.

Al Jazeera აშშ-ის ფინანსთა უწყებაზე დაყრდნობით წერს, რომ შეერთებულმა შტატებმა ირანს ისრაელზე თავდასხმის საპასუხოდ ახალი სანქციები დაუწესა.

გარცელებული ინფორმაციით, სანქციები, ძირითადად, სანავთობო სექტორს შეეხება. 

"ახალი სანქციების მიზანი ირანზე საფინანსო ზეწოლის გაძლიერება და ირანის მთავრობის შეზღუდვაა, რათა მოგება ვერ ნახოს ნავთობის გაყიდვით. ირანი მოგებულ თანხებს რეგიონში სტაბილურობის ხელშესაშლელად და აშშ-ის მოკავშირეებსა და პარტნიორებზე თავდასასხმელად იყენებს", - წერია უწყების განცხადებაში.

აშშ-ის ფინანსთა მინისტრმა, ჯანეტ იელენმა განაცხადა, რომ მთავრობა შემდგომ ზომებს უყოყმანოდ მიიღებს, რათა ირანს პასუხი აგებინონ.

ნორვეგიამ ლიბანიდან დიპლომატების ევაკუაცია დაიწყო, ამის შესახებ ინფორმაციას ნორვეგიის საგარეო საქმეთა სამინისტრო ავრცელებს.

მისი თქმით, ლიბანში ვითარება კვლავ დაძაბულია, მათ შორის აფეთქებები ბეირუთში ნორვეგიის საელჩოსთან.

„ზოგიერთმა ნორვეგიელმა დიპლომატმა დატოვა ლიბანი. შემთხვევის ადგილზე იმყოფებიან ელჩი და სხვა ნორვეგიელი დიპლომატები“, - აცხადებენ ნორვეგიის საგარეო საქმეთა სამინისტროში.