Featured Articles

საფრანგეთის პრეზიდენტმა ემანუელ მაკრონმა უკრაინისთვის დამატებით €2-მილიარდიანი სამხედრო დახმარების გამოყოფის შესახებ განაცხადა. მაკრონმა ამის შესახებ პარიზში გამართულ პრესკონფერენციაზე ისაუბრა, რომელიც "მსურველთა კოალიციის" პირველ სამიტს უსწრებდა წინ.

Euronews-ის ინფორმაციით, სამხედრო დახმარების პაკეტი ითვალისწინებს სამხედრო აღჭურვილობას, როგორებიცაა ტანკსაწინააღმდეგო რაკეტები, საჰაერო თავდაცვის რაკეტები, ჯავშანმანქანები, დრონები და ა.შ.

პრესკონფერენციაზე მაკრონმა განაცხადა, რომ "მსურველთა კოალიციის" სამიტზე მსოფლიო ლიდერები "უკრაინის შეიარაღებული ძალების სამომავლო ფორმატზე იმსჯელებენ". მისი განმარტებით, პარიზში 27 მარტს ჩანიშნული სამიტის მიზანია უზრუნველყოს, რომ უკრაინა ახალი დარტყმების წინააღმდეგ გამძლეობას ინარჩუნებს.

საფრანგეთის პრეზიდენტმა უკრაინაში მშვიდობისმყოფელი ჯარისკაცების გაგზავნაზეც ისაუბრა და აღნიშნა, რომ ფრანგი სამხედროები წინა ხაზებში არ იბრძოლებენ. მისი თქმით, ჯარისკაცთა პოტენციური გაგზავნა წინა ხაზისთვის ზურგის გამაგრებას მოხმარდება.

პრესკონფერენციაზე პრეზიდენტმა ასევე აღნიშნა, რომ რუსეთისთვის სანქციების შერბილება არ იგეგმება, რადგან ამისთვის "ჯერ მეტისმეტად ადრეა".

ცნობისთვის, უკრაინის მოკავშირე ქვეყნის ლიდერები დღეს პარიზში რუსეთის წინააღმდეგ ომში უკრაინის უსაფრთხოების გრძელვადიან გარანტიებს განიხილავენ. ელისეს სასახლეში ჯამში 31 ქვეყნის, მათ შორის NATO-ს მოკავშირეების, ევროკავშირის წევრი სახელმწიფოების, დიდი ბრიტანეთის, კანადისა და ნორვეგიის ლიდერებს ელიან. სამიტს დაესწრება ვოლოდიმირ ზელენსკიც.

წითელ ზღვაში, ეგვიპტეში, ჰურგადასთან ტურისტული წყალქვეშა ხომალდის ჩაძირვის შედეგად, სულ მცირე, ექვსი ადამიანი დაიღუპა.

მედიაში გავრცელებული ინფორმაციით, ამ ეტაპზე იდენტიფიცირებულია 9 დაშავებული მგზავრი.

ადგილზე სამძებრო-სამაშველო ოპერაცია კვლავ მიმდინარეობს. გემზე სულ 40-მდე ადამიანი იმყოფებოდა.

სამხრეთ კორეაში ტყის ხანძრის შედეგად, დაღუპულთა რიცხვი 26-მდე გაიზარდა. ინფორმაციას BBC ავრცელებს.

ქალაქ უისეონგში, ხანძრის შედეგად 1 300-წლოვანი ტაძარი განადგურდა. სტიქია ასევე საფრთხეს უქმნის სხვა კულტურულ ძეგლებს. ამ დრომდე 33 000 ჰექტარზე მეტი ტერიტორია დაიწვა. ათობით ათასი ადამიანის ევაკუაცია განხორციელდა.

ხანძარს სამხრეთ კორეაში 21 მარტიდან ებრძვიან. ცეცხლის ჩაქრობა ძლიერი ქარის გამოა გართულებული. ადგილობრივი ხელისუფლების თქმით, ეს ქვეყნის ისტორიაში ყველაზე მასშტაბური ხანძარია.

პუტინი მალე მოკვდება და ყველაფერი დასრულდება, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

როგორც ზელენსკიმ განაცხადა, საზოგადოების დესტაბილიზაცია არის ის, რისიც პუტინს ეშინია.

„საზოგადოების დესტაბილიზაცია არის ის, რისიც მას ეშინია, თავად იგი მოახდენს ამაზე გავლენას. მისი ეკონომიკა და სანქციების პოლიტიკა მოახდენს გავლენას. ჩვენი პარტნიორები თუ იმდენად ძლიერები იქნებიან, რამდენადაც არიან, თუ ისინი მოისურვებენ არა სუპერ ძალის, არამედ უბრალოდ საკუთარი რეალური ძალის დემონსტრირებას, თუ ისინი ზეწოლას მოახდენენ პუტინზე, მას ექნება საზოგადოების დესტაბილიზაცია, მას ამის ეშინია“, – განაცხადა ზელენსკიმ.

უკრაინის პრეზიდენტის თქმით, საზოგადოების დესტაბილიზაციის გარდა, პუტინს საკუთარი ძალაუფლების დაკარგვის ეშინია.

„ეს დამოკიდებულია საზოგადოების სტაბილურობაზე, მაგრამ, ამავდროულად, მის ასაკზეც. ფაქტია, რომ ის მალე მოკვდება და ყველაფერი დასრულდება. მისი საკითხი, შეიძლება, იქამდე დასრულდეს, ვიდრე ის დაასრულებს თავის აბსოლუტურად უსაფრთხო და წარუმატებელ ისტორიულ ცხოვრებას. აი, რისი ეშინია მას“, – თქვა ზელენსკიმ.