Featured Articles

საფრანგეთის პრეზიდენტი ემანუელ მაკრონი კანადის ახალ პრემიერ-მინისტრს, მარკ კარნის პარიზში შეხვდა. პრემიერ-მინისტრის პოსტზე ყოფნისას ეს მარკ კარნის პირველი ვიზიტია საზღვარგარეთ.

როგორც მაკრონთან შეხვედრისას კანადის პრემიერმა აღნიშნა, კანადისთვის, როგორც არასდროს, მნიშვნელოვანია საფრანგეთის მსგავს საიმედო მოკავშირეებთან ურთიერთობების გაძლიერება.

„ორივე მხარს ვუჭერთ სუვერენიტეტსა და უსაფრთხოებას, რაც გამოიხატება თქვენი ხელმძღვანელობით უკრაინისადმი ჩვენს ურყევ მხარდაჭერაში. დღეს, როდესაც ვხედავთ, რომ მთელ მსოფლიოში ეს პრინციპი უარყოფილია სულ უფრო მეტი მთავრობის მიერ, კანადისთვის, როგორც არასდროს, მნიშვნელოვანია საფრანგეთის მსგავს საიმედო მოკავშირეებთან ურთიერთობების გაძლიერება“, – განაცხადა მარკ კარნიმ.

თავის მხრივ, საფრანგეთის პრეზიდენტმა, ემანუელ მაკრონმა განაცხადა, რომ საერთაშორისო წესების დაცვით ვაჭრობა უფრო ეფექტიანი ინსტრუმენტია კეთილდღეობისთვის, ვიდრე ტარიფები.

„ვფიქრობ, ჩვენ ორივეს გვჯერა, რომ სამართლიანი ვაჭრობა, რომელიც პატივს სცემს საერთაშორისო წესებს, კარგია ყველას კეთილდღეობისთვის. რა თქმა უნდა, უფრო ეფექტურია, ვიდრე ტარიფები, რაც ქმნის ინფლაციას და აზიანებს წარმოების ჯაჭვებს, ჩვენი ეკონომიკის ინტეგრაციას“, – განაცხადა მაკრონმა.

დღეს მოგვიანებით მარკ კარნი პარიზიდან ლონდონში გაემგზავრება.

საფრანგეთში ემანუელ მაკრონისა და მარკ კარნის შეხვედრა კანადისა და ევროკავშირის აშშ-თან დაძაბული სავაჭრო ურთიერთობების ფონზე გაიმართა.

გერმანიის საგარეო საქმეთა მინისტრის, ანალენა ბერბოკის თქმით, გერმანიამ მიიღო გადაწყვეტილება, 2025 წელს უკრაინის დახმარება 3 მილიარდი ევროთი გაზარდოს. ამის შესახებ მან ბრიუსელში, ევროკავშირის საგარეო საქმეთა საბჭოს სხდომის დაწყებამდე განაცხადა.

"მნიშვნელოვანია, რომ უსაფრთხოებისა და ინფრასტრუქტურის ძირითადი კანონით გათვალისწინებული ინვესტიციების გარდა, ჩვენ საბოლოოდ გამოვყოფთ კიდევ 3 მილიარდ ევროს უკრაინის მხარდასაჭერად 2025 წელს. ეს ნიშნავს, რომ გერმანია გააგრძელებს უკრაინისთვის 7 მილიარდი ევროს მიწოდებას, როგორც ეს გასულ წელს გააკეთა," - განაცხადა მან. 

გერმანიის საგარეო საქმეთა მინისტრმა ასევე აღნიშნა, რომ სამშაბათს, 18 მარტს, გერმანიის კონსტიტუციაში განხორციელდება ცვლილება, რომელიც ქვეყანას საშუალებას მისცემს მნიშვნელოვნად გაზარდოს ვალის მოცულობა თავდაცვის დასაფინანსებლად და "უკრაინას უფრო მეტ მხარდაჭერას გაუწევს".

"ეს არის ძლიერი სიგნალი იმისა, რომ გერმანია სერიოზულად ეკიდება საკუთარ უსაფრთხოებას, უკრაინის და ევროპის უსაფრთხოებას... ჩვენი წვლილი ევროპულ მშვიდობაში, რომელსაც ხვალ გერმანიის ბუნდესტაგში ისტორიული გადაწყვეტილებით გამოვაქვეყნებთ, არის ის, რაც აქამდე არასდროს გაკეთებულა, ასეთი მასშტაბით," - აღნიშნა ბაერბოკმა.

შეგახსენებთ, რომ გერმანიაში საპარლამენტო არჩევნებამდეც განიხილებოდა უკრაინისთვის 3 მილიარდი ევროს გამოყოფის შესაძლებლობა. თუმცა, ამის შემდეგ კანცლერმა ოლაფ შოლცმა ეს საკითხი დღის წესრიგიდან ამოიღო.

ევროკავშირის საბჭომ უკრაინისთვის 3,5 მილიარდამდე ევროს ოდენობის მორიგი ტრანშის გამოყოფა დაამტკიცა.

აღნიშნულ თანხას უკრაინა გრანტებისა და სესხების სახით ევროკავშირის „უკრაინის ფონდიდან“ მიიღებს. ევროკავშირის საბჭოს ცნობით, აღნიშნული მექანიზმის მიზანია უკრაინის მაკროფინანსური სტაბილურობის, აღდგენის, რეკონსტრუქციისა და მოდერნიზაციის მხარდაჭერა.

მესამე ტრანშის გათვალისწინებით, ბოლო ერთ წელში აღნიშნული ფონდიდან გამოყოფილი დახმარების საერთო რაოდენობა 20 მილიარდ ევროს მიაღწევს.

საბჭოს განცხადებით, დღეს საბჭომ დაასკვნა, რომ უკრაინამ მესამე ტრანშის მისაღებად დააკმაყოფილა ყველა აუცილებელი პირობა, რომელიც გათვალისწინებულია უკრაინის გეგმაში.

ასევე, ევროკავშირის საბჭოს განცხადებით, უკრაინამ აჩვენა, რომ მან გადადგა 13 ნაბიჯი, მათ შორის განახლებადი ენერგიის გამოყენების ზრდასთან, ევროკავშირის სტანდარტების შესაბამისად საზღვრის კვეთის პროცედურის გამარტივებასთან, სოფლის მეურნეობის სტრატეგიის მიღებასთან დაკავშირებით, ასევე სტრატეგიული და კრიტიკული ნედლეულის სიის შემუშავების გაგრძელებით.

ვლადიმერ პუტინის პირადი ექიმი, ლეონიდე ბოკერია, ჟურნალისტების ჯგუფთან ერთად, რამდენიმე დღეა საქართველოში იმყოფება - ინფორმაციას "გურიის მოამბე" ავრცელებს და წერს, რომ ორი დღის განმავლობაში დელეგაცია ფოთში იმყოფებოდა, გუშინ საღამოს კი შეკვეთილში, სასტუმრო “პარაგრაფში” გადაინაცვლეს.

ჟურნალისტების ჯგუფში არიან "ისტანკინოს”, “ნტვ” -სა და ტვ “რასიას” გადამღები ჯგუფები. ჯერჯერობით უცნობია, კონკრეტულად ვისი მიწვევით იმყოფება რუსების დელეგაცია საქართველოში. არსებული ინფორმაციით, ჟურნალისტები გადაღებებს აწარმოებენ, თავად ლეონიდე ბოკერია კი დახურულ შეხვედრებს მართავს.