Featured Articles

რუსეთმა ახლა უნდა მიიღოს აშშ-უკრაინის წინადადება 30-დღიანი ცეცხლის შეწყვეტის შესახებ, - განაცხადა საფრანგეთის პრეზიდენტმა, ემანუელ მაკრონმა.

„რუსეთმა ახლა უნდა მიიღოს აშშ-უკრაინის წინადადება 30-დღიანი ცეცხლის შეწყვეტის შესახებ. უკრაინაში რუსული აგრესია უნდა დასრულდეს. სისასტიკე უნდა შეწყდეს“, - აღნიშნა საფრანგეთის პრეზიდენტმა.

კანადის ახალი პრემიერმინისტრი მარკ კარნი გახდა. დღეს, ჯასტინ ტრუდო ოფიციალურად გადადგა დაკავებული პოსტიდან.

კარნიმ ფიცი ტრადიციულად ინგლისურ და ფრანგულ ენებზე დადო. პრემიერმინისტრის რანგში მარკ კარნი პირველი ოფიციალური ვიზიტით თავდაპირველად დიდ ბრიტანეთს და საფრანგეთს ეწვევა. 

შეგახსენებთ, მარკ კარნი კანადის მმართველი ლიბერალური პარტიის თავმჯდომარედ 9 მარტს აირჩიეს. 

მსოფლიო ხედავს, როგორ აყენებს რუსეთი შეგნებულად ისეთ პირობებს, რომელიც მხოლოდ ართულებს და აჭიანურებს სამშვიდობო პროცესს, - განაცხადა უკრაინის პრეზიდენტმა, ვოლოდიმირ ზელენსკიმ.

„ტყვეთა გაცვლა და უპირობო 30-დღიანი ცეცხლის შეწყვეტა პირველი სწრაფი ნაბიჯებია, რომლებმაც შეიძლება მნიშვნელოვნად დააახლოონ სამართლიანი და მდგრადი მშვიდობა. უკრაინა მზად არის, გადადგას ეს ნაბიჯები, რადგან უკრაინელ ხალხს მშვიდობა ყველაზე მეტად სურს. მსოფლიო ხედავს, თუ როგორ აყენებს რუსეთი შეგნებულად ისეთ პირობებს, რომელიც მხოლოდ ართულებს და აჭიანურებს პროცესს, რადგან რუსეთი ერთადერთი მხარეა, რომელსაც სურს ომის გაგრძელება და დიპლომატიის ჩამოშლა“, - აღნიშნა უკრაინის პრეზიდენტმა.

აშშ-ის პრეზიდენტმა, დონალდ ტრამპმა თავის სოციალურ ქსელში დაწერა, რომ ტელეფონით რუსეთის ლიდერს, ვლადიმერ პუტინს ესაუბრა. 

„გუშინ ჩვენ კარგი და პროდუქტიული მოლაპარაკებები გვქონდა რუსეთის პრეზიდენტთან, ვლადიმერ პუტინთან. არსებობს ძალიან კარგი შანსი იმისა, რომ ეს საშინელი, სისხლისმღვრელი ომი ბოლოსდაბოლოს დასრულდეს, თუმცა ახლა ათასობით უკრაინელი ჯარისკაცი სრულ ალყაშია მოქცეული და ძალიან ცუდ მდგომარეობაშია. მე მკაფიოდ ვთხოვე პრეზიდენტ პუტინს შეუნარჩუნოს მათ სიცოცხლე. ეს იქნება საშინელი სასაკლაო, როგორიც მეორე მსოფლიო ომის შემდეგ არ გვინახავს. ღმერთმა დალოცოს ყველა“, - დაწერა ტრამპმა.