Featured Articles

"ჩვენ გვჭირდება მშვიდობა და არა დაუსრულებელი ომი. და ამიტომ ჩვენ ვამბობთ, რომ უსაფრთხოების გარანტიები არის ამის გასაღები.

უახლოეს მომავალში, ყველა ჩვენგანი ევროპაში ჩამოვაყალიბებთ ჩვენს საერთო პოზიციებს - ხაზებს, რომლებსაც უნდა მივაღწიოთ და ხაზებზე, რომლებზეც კომპრომისზე წასვლა არ შეგვიძლია.

ეს პოზიციები წარედგინება ჩვენს პარტნიორებს აშშ-ში. ძლიერი და ხანგრძლივი მშვიდობა და ომის დასრულების შესახებ სწორი შეთანხმება ნამდვილად ჩვენი საერთო პრიორიტეტია.

და, რა თქმა უნდა, მინდა მადლობა გადაგიხადოთ ყველას - ყველას ჩვენს საყვარელ უკრაინაში, ვინც გრძნობს, თუ რამდენად მნიშვნელოვანია ერთიანობა და როგორ იცვლება ისტორია, როდესაც მილიონები იცავენ თავიანთი ქვეყნის ღირსებას. ჩვენი მეომრები ფრონტზე, მთელი ჩვენი ხალხი - ვამაყობ თქვენით. მინდა მადლობა გადაგიხადოთ ყველას. დიდი მადლობა! დიდება უკრაინას!"

- ამბობს უკრაინის პრეზიდენტი, ვოლოდიმირ ზელენსკი.

ლონდონის ცენტრში, ლანკასტერის სასახლეში, ევროპელი ლიდერების სამიტი ოფიციალურად გაიხსნა, რომელსაც გაერთიანებული სამეფოს პრემიერ-მინისტრი, სერ კირ სტარმერი მასპინძლობს.

შეხვედრაზე განსახილველ თემებზე დეტალური ინფორმაცია არ საჯაროვდება, თუმცა მოსალოდნელია, რომ განხილვის მთავარ საკითხებს შორის იქნება ევროპული ქვეყნების შესაძლო როლი უკრაინაში ომის დასრულების პროცესში, ასევე კონტინენტის ურთიერთობა აშშ-სთან.

სამიტის დასრულების შემდეგ, კირ სტარმერი პრესკონფერენციას გამართავს.

გარდა ამისა, ცნობილია, რომ უკრაინის პრეზიდენტი ვოლოდიმირ ზელენსკი დღის მეორე ნახევარში მეფე ჩარლზ III-ს შეხვდება.

ისრაელი დღეიდან ღაზის სექტორში ჰუმანიტარული დახმარების შესვლას აჩერებს. როგორც პრემიერ-მინისტრის ადმინისტრაციაში განმარტავენ, ეს არის საპასუხო ნაბიჯი „ჰამასის“ უარზე, რომელსაც არ სურს პირველი ფაზის გახანგრძლივება. შეთანხმების პირველი ფაზა შუაღამისას ამოიწურა. ისრაელს ამ ფაზის გახანგრძლივება სურდა, რათა ამავე ფაზაში დაიბრუნოს „ჰამასის“ ტყვეობაში დარჩენილი მძევლები.

„ჰამასს“ კი მეორე ფაზის დაწყება სურს, რომლის ფარგლებშიც მხარეებმა ცეცხლის დროებით შეწყვეტის რეჟიმი პერმანენტულით უნდა ჩაანაცვლონ და ისრაელის ძალებმა ღაზის ტერიტორია დატოვონ, რის შემდეგაც „ჰამასი“ დარჩენილ მძევლებს ისრაელს გადასცემს.

„ჰამასმა“ ისრაელის მიერ ჰუმანიტარული დახმარების წვდომის შეჩერებას „ომის დანაშაული“ უწოდა და ისრაელი შეთანხმების დარღვევის მცდელობაში დაადანაშაულა.

მანამდე აშშ-ს სპეციალურმა წარმომადგენელმა, სტივ უიტკოფმა მხარეებს ცეცხლის შეწყვეტის რეჟიმის გახანგრძლივება შესთავაზა, რადგან გამოიკვეთა, რომ მეტი დროა საჭირო მეორე ეტაპის თაობაზე მოლაპარაკებებისთვის. ისრაელმა არსებული რეჟიმი ექვსი კვირის ვადით გაახანგრძლივა.