Featured Articles

აშშ-ის პრეზიდენტმა, დონალდ ტრამპმა განაცხადა, რომ პროგრესს ხედავს რუსეთ-უკრაინის ომის დასრულების მიზნით მიმდინარე მოლაპარაკებებში, თუმცა თავი შეიკავა რუსეთის პრეზიდენტთან, ვლადიმერ პუტინთან კომუნიკაციის დეტალების გამჟღავნებისგან.

ტრამპმა აღნიშნა, რომ მას ჰქონდა კონტაქტი პუტინთან.

„გვქონდა საუბარი. უბრალოდ ვთქვათ, რომ მქონდა… კიდევ ველოდები ბევრ საუბარს. ჩვენ უნდა დავასრულოთ ეს ომი. არ მინდა, გითხრათ ამ საუბრების შესახებ. მე მჯერა, რომ პროგრესს ვაღწევთ. ჩვენ გვსურს უკრაინა-რუსეთის ომის შეჩერება“, – აღნიშნა ტრამპმა.

აშშ-ის პრეზიდენტმა დაადასტურა, რომ შეერთებული შტატები კონტაქტშია როგორც რუსეთთან, ასევე უკრაინასთან.

„ვსაუბრობთ ორივე მხარესთან. ვვარაუდობ, რომ შევხვდები პუტინს, დიახ, სწორ დროს, შესაფერის დროს“, – განაცხადა აშშ-ის პრეზიდენტმა.

აშშ-ის ვიცე-პრეზიდენტი, ჯეი დი ვენსი უკრაინის პრეზიდენტ ვოლოდიმირ ზელენსკის შეხვდება.

აუდიენცია მიუნხენში, უსაფრთხოების ყოველწლიურ კონფერენციაზე გაიმართება.

იქამდე, აშშ-ის პრეზიდენტმა, დონალდ ტრამპმა თქვა, რომ სავარაუდოდ მომავალ კვირას, ვაშინგტონში, ზელენსკის შეხვდება. მისივე თქმით, ის ტელეფონით ვლადიმირ პუტინსაც ესაუბრა.

ავიაკომპანია EasyJet-ის ჰურგადა-მანჩესტერის რეისზე პილოტმა ფრენისას გონება დაკარგა, რის გამოც თვითმფრინავი ათენში ავარიულად დაეშვა. პილოტს სასწრაფო სამედიცინო დახმარება დასჭირდა.

მგზავრები ყვებიან, რომ ბორტგამცილებლები ბორტზე ექიმებს ეძებდნენ, მოგვიანებით კი გამოაცხადეს, რომ პილოტი შეუძლოდ გახდა.

მათი ინფორმაციით, ბორტზე მყოფმა მეორე პილოტმა მოახერხა და თვითმფრინავი ათენში, ავარიულად დასვა, თუმცა დაშვება "უხეში და საშინელი" იყო.

თვითმფრინავს ათენის აეროპორტში სასწრაფო დახმარების რამდენიმე ჯგუფი დახვდა. მგზავრები სასტუმროში გადაიყვანეს. შემთხვევის შედეგად მგზავრები არ დაშავებულან.

ამერიკელი მილიარდერი, აშშ-ის სამთავრობო ეფექტიანობის დეპარტამენტის ხელმძღვანელი ილონ მასკი „რადიო თავისუფლებისა“ და „ამერიკის ხმის“ დახურვას ითხოვს. ამის შესახებ მასკი სოციალურ ქსელში წერს.

„დიახ, დახურეთ ისინი.

1. ევროპა ახლა თავისუფალია (თუ არ ჩავთვლით მახრჩობელ ბიუროკრატიას). გამარჯობა??
2. მათ აღარავინ უსმენს;
3. უბრალოდ საკუთარ თავს ელაპარაკებიან რადიკალი მემარცხენე გიჟები, რომლებიც წვავენ აშშ-ის გადასახადის გადამხდელთა ფულს, წელიწადში ერთ მილიარდ დოლარს“, – წერს მასკი და აზიარებს სოციალური ქსელის ერთ-ერთი მომხმარებლის პოსტს, რომელშიც სპეციალურ მისიებში აშშ-ის პრეზიდენტის, დონალდ ტრამპის წარმომადგენელის, რიჩარდ გრენელის სიტყვებია ციტირებული.

„აშშ-ის გადასახადის გადამხდელები აფინანსებენ მემარცხენე სახელმწიფო მედიას. მათი დახურვის დროა. „რადიო თავისუფლება“ და „ამერიკის ხმა“ არის მედიასაშუალებები, რომლებსაც თანხას ამერიკელი გადასახადის გადამხდელები უხდიან. ეს არის სახელმწიფო მედია. ეს საშუალებები სავსეა მემარცხენე აქტივისტებით. ამ ჟურნალისტებთან ათწლეულების განმავლობაში ვმუშაობ. ეს არის წარსულის რელიკვია. ჩვენ არ გვჭირდება მთავრობისგან დაფინანსებული მედიასაშუალებები“, – აცხადებს რიჩარდ გრენელი.