Featured Articles

სლოვაკეთის ქალაქებში ხელისუფლების წინააღმდეგ მრავალათასიანი საპროტესტო აქციები იმართება ლოზუნგით, „სლოვაკეთი – ევროპაა“. პრემიერ-მინისტრ რობერტ ფიცოს მთავრობის წინააღმდეგ აქციების ორგანიზატორი ინიციატივა „მშვიდობა უკრაინაში“ და ოპოზიციური პარტიები არიან.

რამდენიმე დღის წინ რობერტ ფიცომ განაცხადა, რომ ქვეყანაში სახელმწიფო გადატრიალება მზადდება ოპოზიციური ძალების, არასამთავრობო ორგანიზაციების, მედიისა და ასევე „ექსპერტთა საიდუმლო ჯგუფის“ მონაწილეობით. 

ჩვენ მზად ვართ უკრაინის პრობლემატიკაზე მოლაპარაკებებისთვის, - განაცხადა რუსეთის პრეზიდენტმა, ვლადიმირ პუტინმა.

ვლადიმირ პუტინის თქმით, „რუსეთი ინარჩუნებს მზადყოფნას უკრაინის საკითხზე მოლაპარაკებებისთვის, მათ შორის შეერთებულ შტატებთან, თუმცა კიევი ამას დაბრკოლებებს უქმნის“.

„მაგრამ აქაც არის საკითხები, რომლებიც განსაკუთრებულ ყურადღებას მოითხოვს. მაგალითად, როგორც ცნობილია, კიევის რეჟიმის ამჟამინდელმა მეთაურმა, როდესაც ის ჯერ კიდევ საკმაოდ ლეგიტიმური სახელმწიფოს მეთაური იყო, გამოსცა ბრძანება მოლაპარაკებების აკრძალვის შესახებ“, - დასძინა რუსეთის პრეზიდენტმა.

ევროკავშირის ახალმა საგარეო-პოლიტიკურმა ხელმძღვანელმა კაია კალასმა ბრიუსელში მიიწვია მარკო რუბიო, რომელიც ახლახან გახდა აშშ-ის სახელმწიფო მდივანი და ამ პოსტზე ენტონი ბლინკენი შეცვალა.

რუბიო ბრიუსელში ევროკავშირის წარმომადგენლებს შეხვდება, იტყობინება ბლოკის ოფიციალური პირი.

ევროკავშირი ესწრაფვის, მოაწესრიგოს თავისი კავშირები აშშ-ის ახალი პრეზიდენტის, დონალდ ტრამპის ადმინისტრაციასთან. ბლოკის წევრი ქვეყნები ცდილობენ, თავიდან აიცილონ ტრამპის სავაჭრო ტარიფები და უკრაინის საკითხში თავიანთ მხარეს ჰყავდეთ, რადგან მან უკრაინასთან რუსეთის ომის დასრულების პირობა დადო.

„წერილში სახელმწიფო მდივანს, მარკო რუბიოს, შევთავაზე, მონაწილეობა მიიღოს ჩვენს შეხვედრაში მისთვის სასურველ დროს“, - მისწერა კალასმა საგარეო საქმეთა მინისტრებს. ამავე ცნობით, რუბიოს ჯერ არ უპასუხია წერილზე.

ევროკავშირის 27 ქვეყნის საგარეო საქმეთა მინისტრები აშშ-თან ურთიერთობის განხილვას 27 იანვარს აპირებენ ბრიუსელში. ტრამპი არ მალავს უკმაყოფილებას ევროკავშირის მიმართ და მას აშშ-ის მიმართ „ძალიან, ძალიან" უსამართლო მოპყრობას აბრალებს ვაჭრობის სფეროში.

კალასს რუბიოსთან არ უსაუბრია. სახელმწიფო მდივანმა თანამდებობაზე მოსვლის შემდეგ მხოლოდ პოლონელ კოლეგასთან გამართა სატელეფონო საუბარი.

ტრამპის პირობამ, რომ ომს დაასრულებს უკრაინაში, შეაშფოთა კიევი და მისი ევროპელი მოკავშირეები, რადგან ისინი არ გამორიცხავენ, რომ აშშ-ის ახალი პრეზიდენტი კიევის მხარდაჭერას შეწყვეტს და აიძულებს უკრაინას, რუსეთთან მტკივნეულ დათმობებზე წავიდეს.

რადიო თავისუფლება