Featured Articles

ხორვატიაში არჩევნები მოქმედმა პრეზიდენტმა, ზორიან მილანოვიჩმა მოიგო. წინასწარი მონაცემებით, არჩევნების მეორე ტურში მან ხმების 74 პროცენტზე მეტი აიღო.

პრეზიდენტსა და პრემიერს სორის პოლიტიკური დაპირისპირებაა ქვეყნის შიდა საკითხებსა და საგარეო კურსთან დაკავშირებით, კონსტიტუციით, პრეზიდენტს არ აქვს კანონებზე ვეტოს დადების უფლება, ასევე არ შეუძლია გავლენა მოახდინოს საგარეო პოლიტიკის, თავდაცვის და უშიშროების საკითხებზე.

5 იანვრიდან ქერჩის სრუტეში მაზუთის დაღვრის შედეგად დაღუპული დელფინების რაოდენობა თითქმის გაორმაგდა. ამის შესახებ იტყობინება დელფინების გადარჩენის სამეცნიერო და ეკოლოგიური ცენტრი „დელფა“.

მათი მონაცემებით, სულ ნაპოვნია 58 მკვდარი დელფინი. ცხედრების მდგომარეობიდან ჩანს, რომ დელფინები დაიღუპნენ არაუმეტეს 3 კვირის განმავლობაში.

ყირიმის რუსული ადმინისტრაციის ხელმძღვანელმა სერგეი აქსიონოვმა განაცხადა, რომ ყირიმში ნავთობის ჩაღვრის გამო შექმნილი ეკოლოგიური ვითარება შეიძლება გაუარესდეს და დაბინძურების მასშტაბმა მიაღწიოს ისეთ დონეს, როგორიც უკვე დაფიქსირდა კრასნოდარის მხარეში.

როგორც რადიო თავისუფლების პროექტი Krym.Realii იტყობინებოდა, 2024 წლის 15 დეკემბერს ქერჩის სრუტეში კატასტროფა განიცადა მაზუთით დატვირთულმა ორმა რუსულმა ტანკერმა.

ზღვაში გასვლის შედეგად „დელფას“ თანამშრომლებმა ნაპირიდან 5 კილომეტრში ტანკერის ჩაძირვის მიდამოში შეამჩნიეს დელფინები, რომლებიც მაზუთით დაბინძურებულ წყალში ცურავდნენ.

„დელფა“ ასევე იტყობინებოდა, რომ რუსული ტანკერების ჩაძირვის შემდეგ, 5 იანვრის მდგომარეობით, იპოვეს 61 მკვდარი ვეშაპისებრი, რომელთაგან 32-ის დაღუპვა სავარაუდოდ შავ ზღვაში საწვავის ჩაღვრას უკავშირდება.

რუსეთის საზღვაო სამაშველო სამსახურმა დაადასტურა, რომ 15 დეკემბერს ქერჩის სრუტეში ტანკერის ჩაძირვის შედეგად შავ ზღვაში 2,4 ათასი ტონა მაზუთი ჩაიღვარა.

ამერიკის პრეზიდენტ ჯო ბაიდენსა და ისრაელის პრემიერ-მინისტრს, ბენიამინ ნეთანიაჰუს შორის სატელეფონო საუბარი გაიმართა. ამის შესახებ ინფორმაციას თეთრი სახლი ავრცელებს.

როგორც თეთრი სახლის განცხადებაშია აღნიშნული, ლიდერებმა განიხილეს დოჰაში მიმდინარე მოლაპარაკებები ცეცხლის შეწყვეტისა და მძევლების გათავისუფლების შესახებ, რომელიც 2024 წლის 27 მაისის შეთანხმებას ეფუძნება. ამასთან, ბაიდენმა და ნეთანიაჰუმ განიხილეს სირიაში მიმდინარე მოვლენები, ასადის რეჟიმის დაცემა და რეგიონში ირანის ძალაუფლების შესუსტება.

„ბაიდენმა ხაზი გაუსვა ღაზაში ცეცხლის დაუყოვნებელი შეწყვეტისა და მძევლების გათავისუფლების აუცილებლობას, ასევე ჰუმანიტარული დახმარების გაზრდას, რაც შესაძლებელი გახდება საბრძოლო მოქმედებების შეწყვეტის შედეგად“, – აღნიშნულია თეთრი სახლის მიერ გავრცელებულ განცხადებაში.

ხორვატიაში საპრეზიდენტო არჩევნების მეორე ტური იმართება. ამომრჩეველს არჩევანის გაკეთება ორი კანდიდატს შორის მოუწევს. ესენი არიან: მოქმედი პრეზიდენტი, ზორან მილანოვიჩი და მისი კონკურენტი, დრაგან პრიმორაკი.

არჩევნების პირველი ტური 29 დეკემბერს გაიმართა, ზორან მილანოვიჩს გამარჯვებისთვის ხმების 1% დააკლდა, მან ხმათა 49,2% მოიპოვა.