Featured Articles

თურქეთში, კურორტ ბოდრუმში 4.1 მაგნიტუდის სიმძლავრის მიწისძვრა იყო. ინფორმაციას თურქული მედია ავრცელებს.

თურქეთის საგანგებო სიტუაციებისა და სტიქიური კატასტროფების მართვის სააგენტოს ცნობით, ბიძგები ადგილობრივი დროით 02:48 საათზე დაფიქსირდა. ეპიცენტრი ბოდრუმი იყო - 7 კილომეტრის სიღრმეზე.

ტრამპის ადმინისტრაციამ სამსახურიდან დაითხოვა იმ სამეცნიერო ანგარიშის ყველა, 400-მდე ავტორი და მეცნიერი, რომელიც ამერიკის შეერთებულ შტატებზე კლიმატის ცვლილების გავლენას იკვლევს. ამის შესახებ CNN-ი კვლევის ავტორებისთვის გაგზავნილ მეილზე დაყრდნობით იტყობინება.

აღნიშნული გადაწყვეტილება ადმინისტრაციას საშუალებას აძლევს, თავიდან აირიდოს კონგრესის მიერ მოთხოვნილი კლიმატის ანგარიშის გამოშვება, ან შექმნას ალტერნატიული კვლევა, რომლის შინაარსიც, სავარაუდოდ, უფრო სკეპტიკური იქნება კლიმატის მეცნიერების მიმართ.

აშშ-ის კლიმატის ეროვნული შეფასების ანგარიში ბოლოს 2023 წელს გამოიცა. მაშინ კვლევამ აჩვენა, რომ კლიმატის ცვლილება ქვეყნის ყველა რეგიონზე ახდენს გავლენას, იწვევს გახშირებულ სტიქიებს და სხვა ზარალს.

ტრამპის პრეზიდენტობის პირველი ვადის დროს რიგით მეოთხე შეფასების ანგარიში გამოქვეყნდა, რომელზეც მეცნიერებმა, ძირითადად, ობამას ადმინისტრაციის პირობებში იმუშავეს. ანგარიშის დამალვა მაშინ ტრამპის ადმინისტრაციამ მისი მადლიერების დღის შემდეგ გამოქვეყნებით სცადა. კონგრესის ბრძანებით, შეფასების ანგარიში გლობალური ცვლილების კვლევის პროგრამის ფარგლებში, ყოველ 4 წელიწადში უნდა გამოქვეყნდეს. შესაბამისად, შემდეგი კვლევა 2027 წელს უნდა დასრულდეს.

როგორც კლიმატის მეცნიერებმა CNN-თან აღნიშნეს, შეფასების ანგარიშები განსაკუთრებით მნიშვნელოვანი და ღირებულია ოფიციალური პირებისთვის რეგიონულ, სახელმწიფო და მუნიციპალურ დონეებზე. ისინი ასევე ღიად საუბრობენ რისკებზე, რომლებსაც ალტერნატიული ანგარიში გამოიწვევს.

“ანგარიშის გაუქმების გამო ექსტრემალური ამინდისთვის, ტყის ხანძრებისთვის, ზღვის დონის ზრდისა და სხვა მნიშვნელოვანი ცვლილებებისთვის მოუმზადებლები ვიქნებით”, - განაცხადა სან ხოსეს უნივერსიტეტის პროფესორმა, დასტინ მულვეინიმ.

400 მეცნიერის დათხოვნას წინ უსწრებდა NASA-ს მიერ კონტრაქტის გაწყვეტა საკონსულტაციო ფირმა ICF-თან, რომელიც თავის მხრივ გლობალური ცვლილებების კვლევის პროგრამასთან თანამშრომლობს, რაც პირველი ინდიკატორი იყო, რომ შეფასების ანგარიში პოტენციურად შეფერხდებოდა.

ამერიკის შეერთებულმა შტატებმა და უკრაინამ მინერალების შესახებ შეთანხმებას ხელი მოაწერეს - შესაბამის განცხადებას აშშ-ის ხაზინის დეპარტამენტი ავრცელებს: 

“30 აპრილს აშშ-მა და უკრაინამ ხელი მოაწერეს შეთანხმებას აშშ-უკრაინის რეკონსტრუქციის საინვესტიციო ფონდის შექმნის შესახებ. რუსეთის სრულმასშტაბიანი შეჭრის შემდეგ, აშშ-ის ხალხის მიერ უკრაინის დაცვისთვის გაწეული მნიშვნელოვანი ფინანსური და მატერიალური მხარდაჭერის აღიარების ნიშნად, ეს ეკონომიკური პარტნიორობა ჩვენს ორ ქვეყანას საშუალებას აძლევს, ერთად იმუშაონ და ინვესტირება მოახდინონ, რათა ჩვენი საერთო რესურსით, ნიჭითა და შესაძლებლობებით უკრაინის ეკონომიკური აღდგენა დაჩქარდეს. 

[…]

როგორც პრეზიდენტმა ტრამპმა აღნიშნა, ამერიკის შეერთებული შტატები მზადაა, ხელი შეუწყოს ამ უსამართლო და დაუნდობელი ომის დასრულებას. ეს შეთანხმება მკაფიო გზავნილია რუსეთისთვის, რომ ტრამპის ადმინისტრაცია მტკიცედ უჭერს მხარს სამშვიდობო პროცესს, რომელის მიზანიც თავისუფალი, სუვერენული და აყვავებული უკრაინაა”, - აღნიშნულია განცხადებაში.

შეთანხმებასთან დაკავშირებით სოციალურ ქსელში წერს უკრაინის ეკონომიკის მინისტრი, იულია სვირიდენკოც: 

“უკრაინის მთავრობის სახელით, ხელი მოვაწერე შეთანხმებას რეკონსტრუქციისთვის აშშ-უკრაინის საინვესტიციო ფონდის შექმნაზე. აშშ-თან ერთად ვაყალიბებთ ფონდს, რომელიც ჩვენს ქვეყანაში გლობალურ ინვესტიციებს მოიზიდავს”, - დაწერა მან

აშშ-მა ირანს ახალი სანქციები დაუწესა, – ამის შესახებ „როიტერი“ წერს.

როგორც „როიტერი“ წერს, აშშ-მა იმ ორგანიზაციებს დაუწესა სანქციები, რომლებიც ირანული ნავთობითა და ნავთობპროდუქტებით უკანონოდ ვაჭრობდნენ.

აშშ-ის სახელმწიფო დეპარტამენტის განცხადებაში აღნიშნულია, რომ სანქციები დაუწესდა შვიდ ორგანიზაციას, რომლებიც არაბთა გაერთიანებულ საამიროებში, თურქეთსა და ირანში არიან განთავსებული.

აშშ-ის სახელმწიფო მდივანმა, მარკო რუბიომ აღნიშნა, რომ ეს ქმედება მიმართული იყო ირანული ნავთობპროდუქტების, რომელთა ღირებულება ასობით მილიონ დოლარს შეადგენს, ოთხი გამყიდველისა და ერთი მყიდველის წინააღმდეგ.

„პრეზიდენტი ვალდებულებას იღებს, ნულამდე დაიყვანოს ირანის ნავთობისა და ნავთობპროდუქტების უკანონო ექსპორტი, მათ შორის, ექსპორტი ჩინეთში, მისი მაქსიმალური ზეწოლის კამპანიის ფარგლებში“, – განაცხადა მარკო რუბიომ.

ცნობისთვის, აშშ-სა და ირანს შორის ბირთვული პროგრამის შესახებ მოლაპარაკებების მორიგი რაუნდი რომში, სამ მაისს გაიმართება.