Featured Articles

ხუთშაბათს ლიეტუვაში ფიცი დადო ახალმა მთავრობამ. მასში წამყვან როლს თამაშობენ სოციალ-დემოკრატები, რომლებიც მანამდე ოპოზიციაში იყვნენ. მათ დამაჯერებელი გამარჯვება მოიპოვეს ოქტომბერში გამართულ არჩევნებში.

მანამდე სეიმმა - ლიეტუვის პარლამენტმა - დაამტკიცა სოციალ-დემოკრატი გინტაუტას პალუკასის მთავრობის პროგრამა.

მთავრობის ფორმირებას არ ჩაუვლია სკანდალებისა და ოპოზიციის მხრიდან კრიტიკის გარეშე. სამთავრობო კოალიციაში შედიოდა პოპულისტური პარტია „ნემანის გარიჟრაჟი“, რომლის ლიდერის, რემიგიუს ჟემაიტაიტისის, მიმართ ახლა სოციალურ ქსელებში მისი განცხადებების გამო გამოძიება მიმდინარეობს სიძულვილის გაღვივების ბრალდებით. გამოძიება მის გამონათქვამებს ანტისემიტურად მიიჩნევს. ჟემაიტაიტისი, რომელსაც მანამდე პარლამენტის იმუნიტეტი ჩამოერთვა, აცხადებს, რომ ის პოლიტიკური დევნის მსხვერპლია.

ლიეტუვის პრეზიდენტმა გიტანას ნაუსედამ თავდაპირველად უარი თქვა პარტიის მიერ შეთავაზებული სამი მინისტრის დამტკიცებაზე. შედეგად მიღწეულ იქნა კომპრომისი - „ნემანის გარიჟრაჟის“ კვოტით მინისტრების პოსტებს დაიკავებენ პარტიის მიერ შეთავაზებული უპარტიო სპეციალისტები. მმართველ კოალიციაში კიდევ ერთი პარტია შევიდა - დემოკრატიული კავშირი „ლიეტუვისთვის“. ყოფილი მმართველი კონსერვატიული პარტია „სამშობლოს კავშირიდან“ ოპოზიციაში იქნება.

აშშ-ის არჩეულმა პრეზიდენტმა დონალდ ტრამპმა თავის ინაუგურაციაზე ჩინეთის ლიდერი სი ძინ პინი დაპატიჟა. ამის შესახებ ინფორმირებულ წყაროებზე დაყრდნობით ამერიკული არხი CBS-ი წერს. მათი თქმით, მოსაწვევი ჩინეთის ლიდერს ნოემბრის დასაწყისში, აშშ-ის საპრეზიდენტო არჩევნების დასრულებიდან მალე გაეგზავნა.

CBS-ის თანახმად, ტრამპის გუნდი ინაუგურაციაზე მსოფლიოს სხვა ლიდერების მიწვევასაც განიხილავს. კერძოდ - უნგრეთის პრემიერ-მინისტრ ვიქტორ ორბანისა, რომელმაც არაერთხელ განაცხადა, რომ დონალდ ტრამპის პოლიტიკური მოკავშირეა. 9 დეკემბერს ორბანი მარ-ა-ლაგოს რეზიდენციაში, ფლორიდაში, შეხვდა დონალდ ტრამპს.

აშშ-ის პრეზიდენტების ინაუგურაციებზე, როგორც წესი, იწვევენ უცხოეთის ქვეყნების ელჩებსა და სხვა დიპლომატებს. სახელმწიფო დეპარტამენტის თანახმად, 1874 წლიდან ამ ცერემონიაში არცერთ უცხოელ ლიდერს არ მიუღია მონაწილეობა.

26 ნოემბერს ტრამპმა განაცხადა, რომ ინაუგურაციის შემდეგ აპირებს დააწესოს მაღალი გადასახადები და დამატებითი ტარიფები ყველა ჩინურ საქონელზე, რომლებიც შეერთებულ შტატებში შედის.

დონალდ ტრამპის ინაუგურაცია 2025 წლის 20 იანვარს გაიმართება. ამ დღიდან ის ოფიციალურად შეუდგება უფლებამოსილების შესრულებას.

ევროკავშირის წევრმა ქვეყნებმა მიიღეს გადაწყვეტილება, რომლის თანახმად 2025 წლის 1 იანვრიდან ბულგარეთისა და რუმინეთის საზღვარზე და შიდა სახმელეთო საზღვრებზე გაუქმდება პირთა შემოწმება.

"ეს არის ისტორიული მომენტი, როდესაც ბულგარეთი და რუმინეთი საბოლოოდ გახდებიან შენგენის ზონის სრულუფლებიანი წევრები. ამ წევრ ქვეყნებთან და მათ შორის შიდა სახმელეთო საზღვრებზე შემოწმების გაუქმება უნგრეთის თავმჯდომარეობის მთავარი პრიორიტეტი იყო. დღეს ჩვენ ეს რეალობად ვაქციეთ. ეს ნაბიჯი სარგებელს მოუტანს არა მხოლოდ ბულგარეთისა და რუმინეთის მოქალაქეებს, არამედ მთლიანად ევროკავშირს", - განაცხადა ევროკავშირის მორიგე თავმჯდომარე ქვეყნის, უნგრეთის შინაგან საქმეთა მინისტრმა შანდორ პინტერმა.

ორივე შავიზღვისპირა სახელმწიფო მარტში შეუერთდა შენგენის ზონას, ოღონდ შეზღუდული უფლებებით: მათ მოქალაქეებს უვიზოდ გადაადგილება შეუძლიათ მხოლოდ თვითმფრინავებითა და გემებით, მაგრამ არა საავტომობილო ტრანსპორტის საშუალებით.

ამერიკის არჩეული პრეზიდენტი დონალდ ტრამპი, უფლებამოსილების შესრულების პირველ დღეს აპირებს რომ 25-ზე მეტი აღმასრულებელი ბრძანება და დირექტივა გამოსცეს. ამის შესახებ წყაროებზე დაყრდნობით reuters-ი წერს.

დოკუმენტები შეეხება მიგრაციულ კანონმდებლობას, ასევე ენერგეტიკას, განათლებას და ა.შ. კერძოდ, მოსალოდნელია მიგრაციის ზომების გამკაცრება და მექსიკასთან საზღვარზე კედლის აშენების განახლება, ასევე სასაზღვრო ზონის გამაგრება. ასევე, სააგენტოს ცნობით, ტრამპმა შესაძლოა გაზარდოს ნავთობისა და გაზის მოპოვება ქვეყანაში - ასეთი ღონისძიება პოლიტიკოსმა საარჩევნო დაპირებებში დააანონსა.

ბაიდენმა პრეზიდენტობის პირველ დღეს 17 აღმასრულებელი ბრძანება გამოსცა, მათი უმეტესობა მისი წინამორბედის ბრძანებების გაუქმებას ემსახურებოდა.