Featured Articles

შეერთებული შტაბების მოქმედმა პრეზიდენტმა ჯო ბაიდენმა საკუთარი ვაჟი, ჰანტერ ბაიდენი შეიწყალა. მას ბრალი იარაღის შეძენა-ფლობასა და 9 საგადასახადო სამართალდარღვევაში ედებოდა. შეწყალების გადაწყვეტილების შესახებ ბაიდენმა თეთრი სახლის ვებგვერდზე გამოქვეყნებულ განცხადებაში დაწერა.

ბაიდენის თქმით, შვილი იმის გამო შეიწყალა, რომ ის შერჩევით და უსამართლოდ იდევნებოდა. შეწყალების დოკუმენტის თანახმად, ეს არის სრული და უპირობო შეწყალება და ამ ოფიციალური შეწყალების გაუქმებას არჩეული პრეზიდენტი, დონალდ ტრამპი ვერ შეძლებს.

რუმინეთში საპარლამენტო არჩევნები მიმდინარეობს. საკანონმდებლო ორგანოში მოსახვედრად 31 პოლიტიკური პარტია იბრძვის. მანდატების მოსაპოვებლად ხუთპროცენტიანი ბარიერის გადალახვაა აუცილებელი.

დონალდ ტრამპმა და ჯასტინ ტრუდომ შეხვედრა გამართეს. აშშ-ის არჩეულმა პრეზიდენტმა განაცხადა, რომ კანადის პრემიერ-მინისტრთან ძალიან პროდუქტიული შეხვედრა ჰქონდა.

„ჩვენ განვიხილეთ ბევრი მნიშვნელოვანი საკითხი, რომელიც მოითხოვს ორივე ქვეყნის ერთობლივ მუშაობას ამ პრობლემების მოსაგვარებლად, მაგალითად, როგორებიცაა ნარკოტიკებთან დაკავშირებული კრიზისი, რომელმაც, არალეგალური იმიგრაციის შედეგად, ბევრი სიცოცხლე გაანადგურა, სამართლიანი ვაჭრობის შეთანხმებები. ტრუდომ აიღო ვალდებულება, ითანამშრომლოს ჩვენთან, რათა დასრულდეს აშშ-ის ოჯახების განადგურება“, – წერს ტრამპი საკუთარ სოციალურ ქსელში.

თავის მხრივ, ჯასტინ ტრუდომ აღნიშნა, რომ მოუთმენლად ელოდება ტრამპთან თანამშრომლობას.

რუსულმა ძალებმა ბოლო 24 საათის განმავლობაში დნეპროპეტროვსკის რეგიონზე სარაკეტო იერიში მიიტანეს. შედეგად, ოთხი ადამიანი დაიღუპა, 20-ზე მეტი კი დაშავდა, მათ შორის ერთი მცირეწლოვანი ბავშვი. დაზარალებულები საავადმყოფოში არიან გადაყვანილი, მათგან ექვსი მძიმე მდგომარეობაშია.

რუსეთმა ღამით სარაკეტო იერიში კიევზეც მიიტანა. შედეგად, ნამსხვრევები საცხოვრებელ კორპუსს მოხვდა, დაზარალებულების შესახებ ინფორმაცია ამ დრომდე ზუსტდება.

პარალელურად, რუსეთის თავდაცვის სამინისტროში აცხადებენ, რომ ღამით უკრაინის მხრიდან გაშვებული 29 უპილოტო საფრენი აპარატი ჩამოაგდეს. მათივე თქმით, თავდასხმა განხორციელდა ბრიანსკის, კალუგის, სმოლენსკისა და კურსკის რეგიონებზე.