Featured Articles

კიევში მუშაობა განაახლა ამერიკის შეერთებული შტატების საელჩომ, რომელიც 20 ნოემბერს დროებით დახურეს შესაძლო მასშტაბური საჰაერო შეტევის გამო. 20 ნოემბერს მუშაობა შეაჩერეს იტალიის, ესპანეთის და საბერძნეთის საელჩოებმაც.

აშშ-ის საელჩოს საიტზე გამოქვეყნებული ინფორმაციით, მუშაობის რეჟიმი დროებით შეცვალეს სავარაუდო საჰაერო შეტევასთან დაკავშირებული ცნობების გამო, თუმცა, უკვე ჩვეული რეჟიმით მუშაობას განაგრძობენ.

შეერთებული შტატების დიპლომატიური წარმომადგენლობა უკრაინაში მყოფ ამერიკელებს მიმართავს, საჰაერო განგაშის დროს ადგილობრივი ხელისუფლების ინსტრუქციები შეასრულონ და შესაბამისი მითითების შემთხვევაში, დაუყოვნებლივ მოძებნონ თავშესაფარი.

უკრაინის თავდაცვის სამინისტროს დაზვერვის მთავარმა სამმართველომ 20 ნოემბერს, დღის მეორე ნახევარში განაცხადა, რომ მისი სახელით სოციალურ ქსელებში გავრცელდა „ფეიკი“ მოსალოდნელი მასირებული შეტევის შესახებ.

უკრაინის სამხედრო დაზვერვამ ცრუ ინფორმაციის გავრცელებასა და საზოგადოების დაშინების მცდელობაში რუსეთი დაადანაშაულა და მოქალაქეებს მოუწოდა, სიმშვიდე შეინარჩუნონ და მხოლოდ ოფიციალურ ინფორმაციას დაუჯერონ.

უკრაინის პრეზიდენტმა ვოლოდიმირ ზელენსკიმ 20 ნოემბერს, საღამოს გაავრცელა მიმართვა, რომ რუსეთი ყოველდღე ერთნაირ სიგიჟეს სჩადის და დღის განმავლობაში პანიკური შეტყობინებების გაგზავნა და საინფორმაციო გარემოს დაძაბვა იმით, რომ რაღაც განსაკუთრებული საფრთხე არსებობს, მხოლოდ რუსეთს ეხმარება. ზელენსკიმ ყველას მოუწოდა, ყოველთვის ყურადღებით იყვნენ საჰაერო განგაშის დროს.

აშშ-ის თავდაცვის დეპარტამენტის ინფორმაციით, უკრაინას 275 მილიონი დოლარის ღირებულების სამხედრო დახმარების პაკეტს გადასცემენ.

დახმარების პაკეტი მოიცავს: საბრძოლო მასალას HIMARS სისტემებისთვის, 155 მმ 105 მმ საარტილერიო ჭურვებს, საბრძოლო მასალას ნაღმმტყორცნებისთვის, დრონებს, ტანკსაწინააღმდეგო TOW რაკეტებს, Javelin და AT-4 სისტემებს, ცეცხლსასროლ იარაღსა და საბრძოლო მასალას, ასაფეთქებელ აღჭურვილობასა და საბრძოლო მასალას, და ა.შ.

განცხადებაში აღნიშნულია, რომ სამხედრო დახმარების ეს პაკეტი უკრაინას Presidential Drawdown Authority-ის (PDA) ფარგლებში გადაეცემა, რაც იმას ნიშნავს, რომ სიაში ჩამოთვლილი საბრძოლო აღჭურვილობა კიევს აშშ-ის თავდაცვის დეპარტამენტის მარაგებიდან გადაეცემა.

რუსეთის თავდაცვის სამინისტრო 19 ნოემბერს აცხადებს, რომ ღამით ბრიანსკზე თავდასხმისას უკრაინამ აშშ-ის მიერ მიწოდებული ექვსი ATACMS-ის რაკეტა გამოიყენა. იგი დასძენს, რომ რუსეთის ძალებმა შეძლეს მათგან ხუთის ჩამოგდება და ერთის დაზიანება.

სამინისტროს თანახმად, დაზიანებული ATACMS-ის ნაწილები სამხედრო ობიექტს დაეცა, რასაც მოჰყვა ხანძარი, რომელიც მალევე ჩააქრეს. სამინისტროს განცხადებით, მსხვერპლი არ არის.

მანამდე რამდენიმე საათით ადრე, უკრაინის სააგენტო RBK-მ უკრაინის არმიის წყაროზე დაყრდნობით გაავრცელა ცნობა, რომ კიევმა ATACMS-ის რაკეტები პირველად გამოიყენა რუსეთის სამხრეთ-დასავლეთის ბრიანსკის რეგიონში მდებარე სამიზნის წინააღმდეგ და მას ზიანი მიაყენა.

ოპერაცია ემთხვევა რუსეთის უკრაინაში შეჭრის მე-1000 დღეს, რითაც მას სიმბოლური მნიშვნელობაც აქვს. ანალიტიკოსთა თქმით, საპასუხო თავდასხმების სიზუსტით განხორციელების შესაძლებლობის დემონსტრირებით უკრაინა ცდილობს, შეცვალოს ომის სტრატეგიული სურათი და აჩვენოს, რომ რუსეთის ტერიტორია არ არის დაცული პირდაპირი თავდასხმებისგან.

კიევს ეს ცნობები ოფიციალურად არ დაუდასტურებია, თუმცა როცა ამაზე პრეზიდენტ ვოლოდიმირ ზელენსკის დაუსვეს კითხვა, მან თქვა: "უკრაინას აქვს ფართო რადიუსის შესაძლებლობები, მათ შორის ადგილობრივი წარმოების ფართო რადიუსის დრონებით... და ახლა ATACMS-იც გვაქვს".

The Washington Post-ის ინფორმაციით, აშშ-ის პრეზიდენტი  უკრაინისთვის ქვეითსაწინააღმდეგო ნაღმების გადაცემას დათანხმდა, რაც უკრაინის შეიარაღებულ ძალებს საოკუპაციო არმიის შეკავებაში უნდა დაეხმაროს. უკრაინული მხარე დიდი ხანია ითხოვდა აღნიშნულ შეიარაღებას მათ ფრონტის ხაზზე განთავსებისა და რუსეთის შეტევის შეკავების მიზნით. ამერიკელი ოფიციალური პირების თქმით, პენტაგონი ამ მიწოდებას ერთ-ერთ ყველაზე სასარგებლო ნაბიჯად მიიჩნევს.

ერთ-ერთი ოფიციალური პირის თქმით, უკრაინის შეიარაღებული ძალები მიიღებენ ე.წ. არამუდმივ ქვეითსაწინააღმდეგო ნაღმებს. ამ ტიპის საბრძოლო მასალა დროთა განმავლობაში კარგავს ბატარეის მუხტს, რაც მის თვითგანადგურებას იწვევს და რაც ამცირებს საშიშროებას მშვიდობიანი მოსახლეობისთვის. უკრაინა კი ვალდებულებას იღებს, რომ ნაღმებს არ განათავსებენ მჭიდროდ დასახლებულ ადგილებში.