Featured Articles

ერთმანეთის ნახვით დიდი სიამოვნება მივიღეთ და ინაუგურაციამდე კიდევ ერთხელ შეხვედრას ვგეგმავთ, – ამის შესახებ აშშ-ის არჩეულმა პრეზიდენტმა, დონალდ ტრამპმა New York Post-თან ექსკლუზიურ სატელეფონო ინტერვიუში განაცხადა.

„ჩვენ ხელახლა გავიცანით ერთმანეთი. ეს იყო გრძელი, ძალიან გრძელი გზა. ორივე მხარემ ბევრი იმუშავა და მან საკმაოდ კარგად გაართვა თავი კამპანიასა და ყველაფერს. ჩვენ მართლაც კარგი შეხვედრა გვქონდა“, – განაცხადა ტრამპმა.

არჩეულმა პრეზიდენტმა აღნიშნა, რომ შეხვედრისას განიხილეს ახლო აღმოსავლეთში მიმდინარე კონფლიქტები და უკრაინაში მიმდინარე ომი.

„მე ვთხოვე თავისი მოსაზრებების გაზიარება და მანაც გამიზიარა. ჩვენ ბევრი ვისაუბრეთ ახლო აღმოსავლეთზეც. მინდოდა, მცოდნოდა მისი ხედვა იმის შესახებ, თუ სად ვართ და რას ფიქრობს. მან კი ძალიან თავაზიანად გამიზიარა თავისი მოსაზრებები“,- განაცხადა ტრამპმა.

ადმინისტრაციებს შორის მშვიდ გადაბარებასთან დაკავშირებით ტრამპმა აღნიშნა, რომ მისა და მოქმედი პრეზიდენტის გუნდებს შორის „ძალიან, ძალიან კარგი ურთიერთობაა“.

„ოვალური კაბინეტი მშვენიერია და მოუთმენლად ველი იქ დაბრუნებას“, – აღნიშნა ტრამპმა.

აშშ-ის სენატში რესპუბლიკელთა ლიდერად ჯონ ტუნი აირჩიეს. ინფორმაციას „ბიბისი“ ავრცელებს.

სამხრეთ დაკოტას რესპუბლიკელი სენატორი, ჯონ ტუნი მიტჩ მაკკონელის ადგილს დაიკავებს, რომელიც 20 წელია, სენატში რესპუბლიკელთა პარტიის ლიდერია.

მეორე დახურულ კენჭისყრაში ტუნმა დაამარცხა სენატორი ჯონ კორნინი. კენჭისყრის შედეგად, ტუნმა მიიღო 29 ხმა, ხოლო კორნინმა 24. პირველ საიდუმლო კენჭისყრაში ვერცერთმა კანდიდატმა ვერ მოიპოვა უმრავლესობა, რის გამოც მეორე საიდუმლო კენჭისყრაში მხოლოდ ტუნი და კორნინი მონაწილეობდნენ.

რამდენიმე დღის წინ, აშშ-ის სენატში რესპუბლიკელთა ლიდერმა, მიტჩ მაკკონელმა განაცხადა, რომ ნოემბერში თანამდებობიდან გადადგება.

16 ნოემბერს, პერუში, აშშ-ის პრეზიდენტი ჯო ბაიდენი და ჩინეთის პრეზიდენტი სი ძინპინი შეხვედრას გამართავენ, – ამის შესახებ ინფორმაციას „როიტერი“ აშშ-ის ოფიციალურ პირებზე დაყრდნობით ავრცელებს.

მედიის ცნობით, სავარაუდოდ, ეს იქნება ბაიდენის ბოლო შეხვედრა ჩინელ კოლეგასთან პრეზიდენტის რანგში.

ოფიციალური პირების განცხადებით, ლიდერები პერუში დაგეგმილ აზია-წყნარი ოკეანის ეკონომიკური თანამშრომლობის ფორუმის ფარგლებში შეხვდებიან.

მათივე თქმით, მოსალოდნელია, რომ ორი ლიდერი მოლაპარაკებებს გამართავს გლობალურ საკითხებზე, მათ შორის ვაშინგტონსა და პეკინს შორის ურთიერთობებზე.

აშშ-ის მოქმედი პრეზიდენტი, ჯო ბაიდენი და ქვეყნის ახლად არჩეული პრეზიდენტი, დონალდ ტრამპი ერთმანეთს შეხვდნენ. არჩევნებში გამარჯვების შემდეგ ბაიდენმა ტრამპი თეთრ სახლში დაპატიჟა.

მოქმედი ადმინისტრაციის მიერ გამარჯვებული კანდიდატის დაპატიჟება აშშ-ში წესია, ხოლო ტრამპმა ეს წესი გასულ საპრეზიდენტო არჩევნებში დაარღვია და ბაიდენს არ უმასპინძლა.

აშშ-ის მოქმედსა და ახლად არჩეულ პრეზიდენტებს შორის კომუნიკაცია ამ პერიოდში ტელეფონის საშუალებით შედგა. პირველად ტრამპის მკვლელობის მცდელობის დროს, ხოლო მეორედ მისი გამარჯვების შემდეგ.