Featured Articles

თუ დონალდ ტრამპი პრეზიდენტი გახდება, ვლადიმერ პუტინი კიევში დაჯდება, - ამის შესახებ აშშ-ის ვიცე-პრეზიდენტმა და „დემოკრატიული პარტიის“ პრეზიდენტობის კანდიდატმა, კამალა ჰარისმა მიჩიგანში გამართულ წინასაარჩევნო ღონისძიებაზე განაცხადა.

„მან, დონალდ ტრამპმა, თქვა, რომ უკრაინისა და რუსეთის საკითხს ერთ დღეში მოაგვარებს. გაიგეთ რას ამბობს. ის დანებდება. ის აიძულებს უკრაინას, უარი თქვას აგრესორის წინააღმდეგ ბრძოლაზე, რომელიც მის სუვერენიტეტს არღვევს. თუ დონალდ ტრამპი პრეზიდენტი გახდება, ვლადიმერ პუტინი კიევში დაჯდება. გააცნობიერეთ, რა მნიშვნელობა ექნება ამას ამერიკისთვის და მსოფლიოში ჩვენი პოზიციისთვის“, - განაცხადა კამალა ჰარისმა.

ცნობისთვის, მანამდე კამალა ჰარისმა განაცხადა, რომ უკრაინის საკითხზე ვლადიმერ პუტინს უკრაინის მონაწილეობის გარეშე არ შეხვდება.

შეხედეთ, რა მოხდა მოლდოვაში, ხალხი გავიდა, რეფერენდუმში ხმა მისცა, რომ შეუერთდეს ევროკავშირს, – ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა.

ელჩის თქმით, ყველა ქვეყანას, რომელიც შეუერთდა ევროკავშირს, მიეცა შესაძლებლობა დიდი ცივილიზაციური ნახტომისთვის. როგორც ჰერჩინსკიმ აღნიშნა, იმედოვნებს, რომ საქართველოს შემთხვევაშიც ასე იქნება.

„როგორც იცით, სამწუხაროდ, ევროკავშირი-საქართველოს ურთიერთობები ისტორიულად დაბალ ნიშნულზეა. საქართველოს ევროკავშირში გაწევრიანების პროცესი შეჩერებულია და ევროკავშირის ლიდერებმა ძალიან ნათლად განაცხადეს, რომ ეს არის საქართველოს მთავრობის მოქმედებების შედეგი. როგორც ევროკავშირის ელჩისთვის, ძალიან სამწუხარო და დასანანია, რომ ვუყურებ სხვა ქვეყნებს, როგორ მიდიან წინ ევროკავშირის წევრობისკენ და საქართველო, წინსვლის მაგივრად, უკან მიდის. შეხედეთ, რა მოხდა მოლდოვაში. ხალხი გავიდა და რეფერენდუმში ხმა მისცა, რომ შეუერთდეს ევროკავშირს, მაგრამ ყველა ხმა დაითვალა, განსხვავება ძალიან მცირე იყო. ასე რომ, გთხოვთ, გადით და მიეცით ხმა თქვენს მომავალს“, – განაცხადა პაველ ჰერჩინსკიმ.

მოლდოვის საკონსტიტუციო რეფერენდუმი მოლდოვაში 20 ოქტომბერს გაიმართა. საკონსტიტუციო რეფერენდუმზე ბიულეტენების სრულად დათვლის შემდეგ მოლდოვაში ევროინტეგრაციის მომხრეა 50,46%, ხოლო 49,54% – წინააღმდეგი.

ალბანეთის ყოფილი პრეზიდენტი ილირ მეტა კორუფციის ბრალდებით ტირანაში დააკავეს. მისი ადვოკატი დაკავებას პოლიტიკურად მოტივირებულს უწოდებს.

55 წლის მეტა, რომელიც პრეზიდენტი 2017-2022 წლები იყო, ამჟამად ოპოზიციური პარტია თავისუფლების ლიდერია. იგი კოსოვოდან ტირანაში ბრუნდებოდა, როდესაც პოლიციამ მისი მანქანა გააჩერა და დააკავა. პოლიციის განცხადებით, მის წასაყვანად ძალის გამოყენება დასჭირდათ. 

ყოფილი პრეზიდენტის ადვოკატის განცხადებით, მეტას ბრალად ედება პასიური კორუფცია, არადეკლარირებული ქონება და ფულის გათეთრება. წარსულში მეტა ბრალდებებს უარყოფდა. ადვოკატის თქმით კი, აპრილის საპარლამენტო არჩევნების წინ წლების წინანდელი "სიცრუე" გააცოცხლეს. 

მეტას ყოფილმა ცოლმა, მონიკა კრიმადჰიმ Facebook-ზე დაწერა, რომ მასაც მსგავსი ბრალი წაუყენეს.

ანტიკორუფციული პროკურატურის SPAK-ის განცხადებით, ეკონომიკის მინისტრის თამამდებობაზე ყოფნის დროს მეტამ უცხოური კომპანიის წინაშე ვალების დაგროვების სქემით საკმაოდ დიდი თანხა გამოიმუშავა. ამასთან, ბრალდების თანახმად, მეტამ და მისმა ყოფილმა ცოლმა სატელეფონო ქსელთან გარიგებითაც იშოვეს ფული.

პარლამენტის სპიკერად ყოფნის პერიოდში კი მეტამ და კრიმადჰიმ, რომელიც დეპუტატი იყო, ბრალდების თანახმად, ბიზნესმენისგან ვილა მიიღეს დახმარების სანაცვლოდ, რაც პარლამენტში კანონის შეცვლასაც მოიცავდა. სხვა ბრალდებები მოიცავს ლობისტური ფირმისთვის უკანონო გადახდებს, ბინის შეძენასა და არადეკლარირებულ ქონებას.

მეტა არაა ოპოზიციის ერთადერთი წევრი, რომლის წინააღმდეგაც სისხლის სამართლის საქმე აღძრეს. გასულ თვეში ყველაზე მსხვილი ოპოზიციური ჯგუფის დემოკრატიული პარტიის ლიდერს, სალი ბერიშას კორუფციაში დასდეს ბრალი. ამასთან, პარტიულ პოლიტიკოსს ერვინ სალიანჯის პრემიერზე "ყალბი ანგარიშის" მომზადების გამო ერთი წელი მიუსაჯეს.

უკრაინის პრეზიდენტმა, ვოლოდიმირ ზელენსკიმ განაცხადა, რომ აშშ ამზადებს 800 მილიონი დოლარის დახმარების პაკეტს, რომელიც უკრაინაში დრონების წარმოების დაფინანსებისთვის იქნება გამოყენებული. ამის შესახებ ზელენსკიმ ვიდეომიმართვაში განაცხადა.

„მზადდება კიდევ ერთი ცალკეული პაკეტი – 800 მილიონი დოლარი უკრაინული დრონების წარმოების დასაფინანსებლად. უკრაინა მადლიერია ამ მხარდაჭერისთვის. ჩვენ გვჭირდება, რომ მსოფლიოში ნებისმიერი პოლიტიკური საფრთხის მიუხედავად, უკრაინამ შეძლოს თავისი სუვერენიტეტისა და დამოუკიდებლობის დაცვა”, – აღნიშნა მან.

ზელენსკი ასევე შეეხო აშშ-ის თავდაცვის მდივანთან, ლოიდ ოსტინთან შეხვედრას. უკრაინის პრეზიდენტის თქმით, ოსტინთან განიხილა უკრაინის „გამარჯვების გეგმის“ კონკრეტული ნაბიჯები.