დღეს, თბილისის დროით, 16:49 საათზე, საქართველოში მიწისძვრა მოხდა.  ინფორმაციას დედამიწის შემსწავლელ მეცნიერებათა ინსტიტუტი და სეისმური მონიტორინგის ეროვნული ცენტრი ავრცელებს.

ეპიცენტრი ქალაქ ყვარელიდან ჩრდილო-დასავლეთით, სოფელ შილდიდან 2კმ-ში იყო.

მიწისძვრის სიმძლავრემ 3.1(ML) მაგნიტუდა შეადგინა.

11 მარტს, 19:30 საათზე ბანგკოკის დონ მუენგის საერთაშორისო აეროპორტიდან საქართველოს მიმართულებით ჩარტერული რეისი შესრულდება.

როგორც  კერძო ჩარტერის ორგანიზატორი ტურისტული კომპანია Wonderfly-ს დამფუძნებელმა, თამუნა ბოჯგუამ განუცხადა, რეისი უკვე დამტკიცებულია და თვითმფრინავი ხვალ, ინდოეთში საწვავისთვის ტექნიკური შეჩერებით, გაფრინდება თბილისში.

როგორც თამუნა ბოჯგუა განმარტავს, ჩარტერი Wonderfly-მ და მისმა პარტნიორებმა დააორგანიზეს. მისივე ინფორმაციით, ჩარტერით ქართველებთან ერთად, სომხეთის მოქალაქეებიც გამოფრინდებიან.

"ჩარტერი პირადად ჩემი და რამდენიმე მოქალაქის ორგანიზებითაა. ჩვენ დიდი ჯგუფი გვყავს, 43 ადამიანი გასტროტურით. ალტერნატივა ვერ ვნახეთ და როგორც მივხვდი, იქ ჩარჩენილი საქართველოს მოქალაქეების უმეტესობა ეგრე არის. არა მხოლოდ ქართველები, სომხეთის მოქალაქეები ერთად გავერთიანდით. საქართველოს მთავრობა რაშიც გვეხმარებოდა იყო, რომ ბანგკოკის საავიაციოს თანხმობა მიგვეღო ჩარტერის დაფრენაზე. ჩარტერი ჩვენი მოპოვებულია, ადამიანები ჩვენი მოძიებულია. ძალიან გვეხმარება სომხეთის საელჩო, ავრცელებს ამ ინფორმაციებს. ბევრი სომეხი გვემატება. ჩვენ რა თქმა უნდა ყველას გვინდა დავეხმაროთ, პრიორიტეტი ჩვენი მოქალაქეები იყვნენ, მაგრამ სამწუხაროდ აქტიურად ვერ გავდივართ ხაზზე. საქართველოს საელჩო ვერც ჩვენ გვაძლევს ნომრებს და ვერც ავრცელებს ამ ინფორმაციას. რაშიც დაგვეხმარნენ არის ის, რომ ფრენაზე თანხმობა მიგვეღო, საგარეომაც გააგზავნა ოფიციალური ნოტა და ვინც ურეკავს ჩემს საკონტაქტოს აძლევენ, მაგრამ დანარჩენზე, როგორც გვითხრეს, უფლება არ აქვთ, რომ უშუალოდ გაავრცელონ ან მომცენ, მაგალითად საკონტაქტოები იქ მყოფი ადამიანების. ამ ეტაპისთვის რა გამოწვევაც გვაქვს, რადგან ერთი დღით ადრე დაინიშნა ჩარტერი, ყველა ბუნებრივია დეტალებს ელოდებოდა, ზოგი ინდოეთში იმყოფება, ზოგი კუნძულებზე იმყოფება და უნდა ჩამოფრინდნენ ბანგკოკში და ვცდილობთ ხალხის მობილიზებას, იმიტომ რომ ის თანხა, რომელიც ჩარტერმა შემოგვთავაზა ერთ პერსონაზე, არის 150 ადამიანის შემთხვევაში. 100 ადამიანზე მარტივად ავედით. ახლა მნიშვნელოვანია ინფორმაციის გავრცელება, რომ ჩარჩენილ ადამიანებს მივაწვდინოთ ხმა მაქსიმალურად.

მთავრობა რასაც გვეუბნება არის ის, რომ გზები არსებობს და მშვიდობიანი ცის ქვეშ ხართ და გაფრინდითო. გზები ისაა, რომ ახლა ექიმი გვყავდა ქალბატონი და აუცილებლად უნდა წასულიყო და 8 000 ლარად ერთი ბილეთი ძლივს ვიშოვეთ ყაზახეთიდან და არ მგონია ყველასთვის მისაღები იყოს ეგეთი გზები და რომც იყოს, ფიზიკურად არ არის ამდენი ადგილი. 15-ში და 16-ში, რომ არის ფრენა იქამდე როგორ უნდა იცხოვრონ, სასტუმროს ფული როგორ გადაიხადონ ადამიანებმა. ჩვენი კომპანია რამდენიმე ადამიანს ჩვენი სახსრებით ვაცხოვრებთ და საელჩოს რომ მიმართავ, გეუბნებიან რომ არ ვიცით რით დაგეხმაროთო და შესაბამისად გადავწყვიტეთ, რომ ჩვენს თავზე აგვეღო",- ამბობს თამუნა ბოჯგუა.

ჩარტერულ რეისზე დამატებითი ინფორმაციისთვის დაუკავშირდით - თამუნა ბოჯგუა: 571 00 35 71 (WhatsApp)

წყარო: bm.ge

სურსათის ეროვნული სააგენტოს სამეგრელო-ზემო სვანეთის რეგიონული დეპარტამენტის წარმომადგენლებმა ხობის მუნიციპალიტეტის სოფელ პატარა ფოთში თევზის შესაბოლი არალეგალური საწარმო დალუქეს.

უწყების ინფორმაციით, ინსპექტირების შედეგად დადგინდა, რომ მცირე მეწარმე ლ. ე. საქმიანობას კანონდარღვევით, საჯარო რეესტრში რეგისტრაციისა და კანონმდებლობით სავალდებულო აღიარების გარეშე ახორციელებდა.

სააგენტოს სპეციალისტებმა საწარმოში კრიტიკული შეუსაბამობები გამოავლინეს, კერძოდ:

ჰიგიენური ნორმების დარღვევა: საწარმოო გარემო არ შეესაბამებოდა სანიტარიულ მოთხოვნებს;
ინფრასტრუქტურული პრობლემები: დაზიანებული იყო საწარმოს ინფრასტრუქტურა, მოწყობილობები და აღჭურვილობა;
ინვენტარის დაბინძურება: გამოყენებული ინვენტარი იყო დაბინძურებული, რაც საფრთხეს უქმნიდა სურსათის უვნებლობას;
რისკიანი მეთოდები: ბიზნესოპერატორი თევზის შებოლვასა და შრობას ჯანმრთელობისთვის რისკისშემცველი მეთოდით აწარმოებდა.
დარღვევების გამოვლენისთანავე, კანონმდებლობის შესაბამისად, მეწარმე დაჯარიმდა, ხოლო საწარმოო პროცესი კრიტიკული შეუსაბამობების სრულად აღმოფხვრამდე შეუჩერდა. სააგენტოს ზედამხედველობით დაილუქა და დაგეგმილია 500 კილოგრამამდე ნედლი და შებოლილი ქაფშიის განადგურება.

სურსათის ეროვნული სააგენტო მოუწოდებს მომხმარებლებს, სურსათის შეძენისას ყურადღება მიაქციონ პროდუქციის ეტიკეტირებასა და ბიზნესოპერატორის ავტორიზაციას. ნებისმიერი საეჭვო გარემოების შემთხვევაში, მოქალაქეებს შეუძლიათ მიმართონ სააგენტოს ცხელ ხაზს.

პარლამენტის იურიდიულ საკითხთა კომიტეტმა მეორე მოსმენით - მუხლობრივად განიხილა და მხარი დაუჭირა “ადმინისტრაციულ სამართალდარღვევათა კოდექსში“ დაგეგმილ ცვლილებებს, რომლის ამოქმედების შედეგად, საგზაო-სატრანსპორტო წესების დარღვევაზე არსებული ჯარიმები იზრდება და პასუხისმგებლობა მკაცრდება.

საუბარია შინაგან საქმეთა სამინისტროს მიერ მომზადებულ კანონის პროექტზე, რომელიც პარლამენტს გასული წლის ნოემბერში წარედგინა. მეორე მოსმენის ფარგლებში გარკვეული მუხლები დაკორექტირდა.

საკანონმდებლო ცვლილებათა პაკეტის თანახმად:

100 ლარამდე იზრდება ჯარიმა სატრანსპორტო საშუალების გზაზე მანევრირების წესების დარღვევისთვის. ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა 20 ქულით შემცირდება.

50-დან 100 ლარამდე იზრდება სანქცია 15 კმ/სთ-ზე მეტი, მაგრამ არაუმეტეს 40 კმ/სთ-ის სიჩქარის გადაჭარბებისთვის.

50 ლარამდე იზრდება სანქცია ავტომობილით მოძრაობისას მძღოლის ან მგზავრის მიერ უსაფრთხოების ღვედის გამოუყენებლობისთვის. ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა 10 ქულით შემცირდება.

50 ლარამდე იზრდება სანქცია ავტომობილის მართვის დროს მძღოლის მიერ მობილურით სარგებლობისთვის.

დგომა-გაჩერების წესების დარღვევისთვის თბილისის მსგავსად, 50 ლარამდე იზრდება ჯარიმის ოდენობა ქუთაისის, ბათუმის, მცხეთის, რუსთავის, გორის, თელავის, ფოთის, ზუგდიდის მუნიციპალიტეტებში და საქართველოს კურორტებზე. ამასთან, როგორც კომიტეტის სხდომაზე ითქვა, აღნიშნულ მუნიციპალიტეტებს ახალციხე და ოზურგეთი დაემატება.

დამატებით პასუხისმგებლობა დგინდება “BUS LANE“-ზე სამარშრუტო სატრანსპორტო საშუალების გარდა, სხვა სატრანსპორტო საშუალების მოძრაობის საპირისპირო მიმართულებით მოძრაობისთვის, რაც გამოიწვევს დაჯარიმებას 200 ლარის ოდენობით.

გარდა ამისა, ახალ სამართალდარღვევად განისაზღვრება სატრანსპორტო საშუალების ტროტუარზე ან ქვეითთა გადასასვლელზე დგომა-გაჩერება, რაც გამოიწვევს დაჯარიმებას 100 ლარის ოდენობით. ამავდროულად, ამ სამართალდარღვევის ჩადენის შემთხვევაში, კანონით განსაზღვრული პირობების არსებობისას, სატრანსპორტო საშუალება სპეციალურ დაცულ სადგომზე გადაყვანას დაექვემდებარება.