საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის გუდაური(ფოსტა)-კობის მონაკვეთზე მისაბმელიანი და ნახევრადმისაბმელიანი ავტოტრანსპორტის მოძრაობა აღდგენილია.

გარემოს ეროვნული სააგენტოს ცნობით, მლეთა-გუდაურის და გუდაური(ფოსტა)–კობის მონაკვეთებზე ავტოტრანსპორტის მოძრაობა განხორციელდება გაუჩერებლად გავლის რეჟიმში, გუდაური(ფოსტა)–კობის მონაკვეთზე მხოლოდ ზვავდამცავი გვირაბების გავლით.

მისაბმელიანი, ნახევრადმისაბმელიანი ავტოტრანსპორტის და M3 კატეგორიის (გააჩნია 8-ზე მეტი დასაჯდომი ადგილი (მძღოლის ადგილის გარდა) და აქვს 5 ტონაზე მეტი სრული მასა) მგზავრთა გადასაყვანად განკუთვნილი ავტოსატრანსპორტო საშუალებების მოძრაობა გვირაბებში, განხორციელდება ცალმხრივად.

8 მაისი საქართველოში ღვინის ეროვნულ დღედ გამოცხადდა. მთავრობის შესაბამის განკარგულებას საქართველოს პრემიერ-მინისტრმა ირაკლი კობახიძემ მოაწერა ხელი.

„ქართული ღვინის, როგორც ქვეყნის იდენტობისა და უმნიშვნელოვანესი კულტურული მემკვიდრეობის, ქართული ღვინის მრავალსაუკუნოვანი ისტორიისა და მასთან დაკავშირებული ტრადიციების წარმოჩენის მიზნით:

ა) დაწესდეს „ღვინის ეროვნული დღე“; ბ) „ღვინის ეროვნული დღე“ აღინიშნოს ყოველი წლის 8 მაისს“, – ნათქვამია მთავრობის განკარგულებაში, რომელიც 12 თებერვლით თარიღდება.

გარემოს დაცვისა და სოფლის მეურნეობის სამინისტრო M1 კატეგორიის მსუბუქ ავტომობილებთან დაკავშირებული რეგულაციების შესახებ დამატებით განმარტებებს ავრცელებს.

როგორც უწყებაში აცხადებენ, კონკრეტული ავტომობილის M1 კატეგორიასთან შესაბამისობის დასადგენად კონსულტაციის გავლა შესაძლებელია შსს-ს სსიპ მომსახურების სააგენტოში.

„მთავრობის დადგენილების შესაბამისად, 2026 წლის 1 აპრილიდან საქართველოში აიკრძალება 6 წელზე მეტი ასაკის M1 კატეგორიის მსუბუქი ავტომობილების როგორც პირველადი, ისე დროებითი რეგისტრაცია.

M1 კატეგორია მოიცავს არაუმეტეს 5 ტონა სრული მასის მქონე ავტომობილებს, რომლებიც განკუთვნილია მგზავრების გადასაყვანად (მძღოლის ადგილის გარდა არაუმეტეს 8 დასაჯდომი ადგილით) და მათი ბარგის ტრანსპორტირებისთვის.

დადგენილი შეზღუდვა არ შეეხება ელექტრომობილებს და მათი რეგისტრაცია დასაშვებია გამოშვების წლის მიუხედავად. აკრძალვა ასევე არ ვრცელდება ავტომობილების იმპორტზე იმ შემთხვევაში, თუ იმპორტიორი არ ახორციელებს მათ საქართველოში რეგისტრაციას, აგრეთვე, რეექსპორტზე, ტრანზიტსა და ექსპორტზე.

შეზღუდვა არ შეეხება საქართველოში უკვე რეგისტრირებულ ავტომობილებს, ასევე იმ ავტომობილებს, რომლებიც იმპორტირებულია 2026 წლის 1 აპრილამდე. გამონაკლისი ვრცელდება იმ ავტომობილებზეც, რომელთა ტრანსპორტირება საქართველოს მიმართულებით დაწყებულია 2026 წლის 1 აპრილამდე.

საზღვაო გადაზიდვის შემთხვევაში, კონოსამენტში ან გადამზიდავის მიერ გაცემულ შესაბამის დოკუმენტში მითითებული უნდა იყოს, რომ ავტომობილი გამომგზავნ პორტში ან გემზე მიღებულია ან კონტეინერში ჩატვირთულია 2026 წლის 1 აპრილამდე. საავტომობილო, სარკინიგზო ან თვითსვლით წამოსული ავტომობილების შემთხვევაში გამონაკლისი იმოქმედებს მხოლოდ მაშინ, თუ ავტომობილი საქართველოს სახელმწიფო საზღვარს გადმოკვეთს არაუგვიანეს 2026 წლის 1 ივლისისა და იმპორტიორი წარმოადგენს დამადასტურებელ დოკუმენტაციას, რომ ტრანსპორტირება დაწყებულია 2026 წლის 1 აპრილამდე.

ამასთან, ძალაში რჩება მოთხოვნა, რომლის მიხედვითაც, ავტომობილი უნდა აკმაყოფილებდეს ევრო 5ბ სტანდარტს და აღნიშნულ მოთხოვნასთან დაკავშირებით დამატებითი გამონაკლისი არ ვრცელდება“, – ნათქვამია გავრცელებულ ინფორმაციაში.

საქართველოს ტექნიკური უნივერსიტეტი 2026-2027 სასწავლო წელს დაახლოებით 300-ით ნაკლები სტუდენტის მიღების შესაძლებლობა ექნება, ვიდრე გასულ წელს. მთავრობამ უმაღლეს საგანმანათლებლო დაწესებულებებში 2026-2027 სასწავლო წლისთვის მისაღები სტუდენტების რაოდენობის შესახებ დადგენილება უკვე გამოაქვეყნა.

დოკუმენტის მიხედვით, მომავალ სასწავლო წელს, სტუ-ის მიერ საბაკალავრო პროგრამებზე მისაღები სტუდენტების რაოდენობა 3880-ით განისაზღვრა. გასულ წელს კი კვოტა 4207 იყო, ხოლო ჩარიცხულთა რაოდენობამ 3575 შეადგინა.

2026-2027 სასწავლო წელს მისაღები სტუდენტების კვოტები და პროგრამები:

აგროინჟინერია    30
ბიოსამედიცინო ინჟინერია    50
გამოყენებითი გეოლოგია    60
ნავთობისა და გაზის ტექნოლოგიები (რუსულენოვანი)    15
არქიტექტურა    180
ენერგეტიკა და ელექტროინჟინერია    210
ციფრული სატელეკომუნიკაციო ტექნოლოგიები    50
ინფორმატიკა    290
საინჟინრო ფიზიკა    20
ქიმიური პროცესების ტექნოლოგია    20
მართვის სისტემები, ავტომატიზაცია და ტესტ-ინჟინერინგი    30
საინჟინრო გეოდეზია    70
მშენებლობა    260
მექანიკის ინჟინერია და ტექნოლოგია    50
სამრეწველო ინჟინერია და ტექნოლოგია    50
ტრანსპორტი    40
ქიმიური და ბიოლოგიური ინჟინერია    50
სასურსათო ტექნოლოგია    120
გარემოსდაცვითი ინჟინერია    70
მეტალურგია    30
მასალათმცოდნეობა    30
სამთო და გეოინჟინერია    50
აგრარული ტექნოლოგიები    60
საკვები პროდუქტების გადამუშავება და სამაცივრო ტექნოლოგია    40
სატყეო საქმე    100
საინჟინრო უსაფრთხოება და საგანგებო სიტუაციების მართვა    50
მექანიკის ინჟინერია (ინგლისურენოვანი)    10
არქიტექტურა (რუსულენოვანი)    15
ინფორმატიკა (რუსულენოვანი)    20
დიზაინი (ინგლისურენოვანი)    40
მეცხოველეობა    50
ნიადაგისა და წყლის რესურსების ინჟინერია    40
საინჟინრო მენეჯმენტი    50
აგრონომია    60
სურსათის მეცნიერება და ტექნოლოგია    50
მშენებლობის ინჟინერია და მენეჯმენტი    60
ლოგისტიკა    50
მოდის დიზაინის ტექნოლოგიები    30
მევენახეობა და ენოლოგია    120
კომპიუტერული მეცნიერება (ინგლისურენოვანი)    40
ბიოსამედიცინო ინჟინერია (ინგლისურენოვანი)    20
ელექტრული და ელექტრონული ინჟინერია    210
სამოქალაქო ინჟინერია    100
ბუნებრივი საფრთხეები, მდგრადი გარემო და დაცვა    50
კომპიუტერული ინჟინერია    100
საავიაციო ინჟინერია    30
კომპიუტერული მეცნიერება    300
სამოქალაქო ინჟინერია (ინგლისურენოვანი)    30
ვეტერინარია    80
არქიტექტურა (ინგლისურენოვანი)    20
კომპიუტერული ინფორმაციული ტექნოლოგიები    250
კომპიუტერული ინჟინერია (ინგლისურენოვანი)    30
ცნობისთვის, გასული თვის ბოლოს მთავრობამ განაცხადა, რომ აპირებდა ტექნიკური უნივერსიტეტის თბილისის სახელმწიფო უნივერსიტეტთან გაერთიანებას, თუმცა, 9 თებერვალს გადაწყვეტილება შეცვალა და განაცხადა, რომ გაერთიანება აღარ მოხდება, თუმცა სტუ-ს სოციალური და ჰუმანიტარული პროგრამები აღარ ექნება.