რუსეთის საგარეო დაზვერვის სამსახური საქართველოს კათოლიკოს-პატრიარქის არჩევასთან დაკავშირებით განცხადებას ავრცელებს და მსოფლიო პატრიარქ ბართლომეოსს საქართველოს მართლმადიდებელი ეკლესიის შიდა საქმეებში ჩარევაში ადანაშაულებს.

"საგარეო დაზვერვის სამსახურში შემოსული ინფორმაციით, კონსტანტინოპოლის პატრიარქი ბართლომეოსი დაჟინებით აგრძელებს მსოფლიო მართლმადიდებლობის გახლეჩის მზაკვრულ ხაზს პრინციპით "გათიშე და იბატონე".

ამჯერად მას სურს, ისარგებლოს სრულიად საქართველოს კათოლიკოს-პატრიარქის ილია II-ის გარდაცვალებით და თავის გავლენას დაუმორჩილოს საქართველოს მართლმადიდებელი ეკლესია. ფანარიოტს ვაკანტურ თანამდებობაზე საქართველოს მართლმადიდებლური ეკლესიის ისეთი წარმომადგენლის ისეთი დაწინაურება სურს, რომელსაც თავად დაეყრდნობა.

ამ როლისთვის ბართლომე კანდიდატებად განიხილავს დასავლეთ ევროპის მიტროპოლიტ აბრაამს (გარმელია) და ფოთისა და ხობის მიტროპოლიტ გრიგოლს (ბერბიჭაშვილი). თავის უახლოეს გარემოცვაში იგი მათ წარმოაჩენს, როგორც მისი ნების ყველაზე შესაფერის შემსრულებლებს", - ვკითხულობთ განცხადებაში. 

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის კახეთის რეგიონული სამმართველოს თანამშრომლებმა უკანონო ტყითსარგებლობის წინააღმდეგ ბრძოლის ფარგლებში ხე-ტყის უკანონო მოპოვების ორი ფაქტი გამოავლინეს.

ინფორმაციას გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი ავრცელებს. 

"ახმეტის მუნიციპალიტეტში, პანკისის ხეობაში, სოფელ შუა ხალაწანში სამართალდამრღვევს, კუთვნილ რეგისტრირებულ სახერხ საამქროში წიფლის სახეობის 8 ერთეული დაუფირნიშებელი მორი და უკანონოდ მოპოვებული ხე-მცენარეებისგან მიღებული 2 კუბურ მეტრამდე მოცულობის პირველადი გადამუშავების პროდუქტი (ფიცარი) ჰქონდა განთავსებული. 
გურჯაანის მუნიციპალიტეტის სოფელ ახაშენის მიმდებარედ კი, მოქალაქემ, სახელმწიფო ტყის ტერიტორიაზე უკანონოდ მოჭრილი ვერხვის სახეობის 6 ძირი ხისგან 11 ერთეული მრგვალი ხე-ტყე (მორი) დაამზადა.  ფაქტი სისხლის სამართლის დანაშაულის ნიშნებს შეიცავს და მასალები შემდგომი რეაგირების მიზნით, შესაბამის უწყებაში გადაიგზავნა. 
ბუნებრივი რესურსების დაცვა და ტყით უკანონო სარგებლობის პრევენცია გარემოსდაცვითი ზედამხედველობის დეპარტამენტისთვის პრიორიტეტია. ამ მიზნით, დეპარტამენტი ქვეყნის მასშტაბით მკაცრ და უწყვეტ კონტროლს ახორციელებს. შედეგად, გასულ წელს, მხოლოდ კახეთის რეგიონული სამმართველოს სამოქმედო ტერიტორიაზე უკანონო ტყითსარგებლობის 500-ზე მეტი ფაქტია გამოვლენილი.", - წერია გავრცელებულ განცხადებაში. 

რთული მეტეოროლოგიური პირობების გამო, ფარავნის უღელტეხილზე გადაადგილება შეიზღუდა. ინფორმაციას ამის შესახებ საავტომობილო გზების დეპარტამენტი ავრცელებს.

უწყების ცნობით, ძლიერი ქარბუქისა და შეზღუდული ხილვადობის გამო, შიდასახელმწიფოებრივი მნიშვნელობის კოდა–ფარცხისი–მანგლისი–წალკა-ნინოწმინდის საავტომობილო გზის კმ94-კმ110 (ფარავნის უღელტეხილი) მონაკვეთზე აკრძალულია ყველა სახის ავტოტრანსპორტის მოძრაობა.

გარდა ამისა, შეზღუდვები მოქმედებს ამავე გზის სხვა მონაკვეთზეც: კმ110-კმ146 მონაკვეთზე: აკრძალულია მისაბმელიანი და ნახევრადმისაბმელიანი ავტოტრანსპორტის გადაადგილება.

გზების დეპარტამენტი მძღოლებს სიფრთხილისკენ და არსებული რეკომენდაციების გათვალისწინებისკენ მოუწოდებს.

თბილისის სახელმწიფო სამედიცინო უნივერსიტეტის მენტალური ჯანმრთელობის საუნივერსიტეტო კლინიკა დღეს ოფიციალურად გაიხსნა.

გახსნის ღონისძიებაზე სიტყვით გამოსვლისას ჯანდაცვის მინისტრმა, მიხეილ სარჯველაძემ ხაზი გაუსვა მენტალური ჯანმრთელობის სერვისების განვითარებისა და ხელმისაწვდომობის ზრდის მნიშვნელობას. ამასთან, აღნიშნა, რომ ახალი საუნივერსიტეტო კლინიკა მნიშვნელოვან როლს შეასრულებს როგორც პაციენტებისთვის ხარისხიანი მომსახურების მიწოდებაში, ისე სამედიცინო განათლების გაძლიერებაში.

ახლად აშენებული საუნივერსიტეტო კლინიკის გახსნის ღონისძიებაზე დამსწრე საზოგადოებას სიტყვით მიმართეს ასევე საქართველოს განათლების, მეცნიერებისა და ახალგაზრდობის მინისტრმა, გივი მიქანაძემ და თსსუ-ის რექტორმა, პროფესორმა ირაკლი ნატროშვილმა.

როგორც ღონისძიებაზე აღინიშნა, მენტალური ჯანმრთელობის საუნივერსიტეტო კლინიკა აერთიანებს 100-ზე მეტ სხვადასხვა პროფილის სპეციალისტს. კლინიკა ორიენტირებულია პაციენტთა ინდივიდუალურ საჭიროებებზე და უზრუნველყოფს ინტეგრირებულ, კომპლექსურ მომსახურებას.

ჯანდაცვის სამინისტროს ინფორმაციით, პირველ ეტაპზე თსსუ-ის მენტალური ჯანმრთელობის საუნივერსიტეტო კლინიკა პაციენტებს ამბულატორიულ მომსახურებას გაუწევს. პარალელურად მიმდინარეობს სტაციონარის ლიცენზირების პროცესი.

ღონისძიებას ესწრებოდნენ თსსუ-ის ადმინისტრაციის წევრები, საკანონმდებლო და აღმასრულებელი ხელისუფლების წარმომადგენლები, ასევე საუნივერსიტეტო და პარტნიორი კლინიკების ხელმძღვანელები.