გაზაფხულის მოსვლა ბევრისთვის ენერგიის, განახლებისა და ახალი დასაწყისის სიმბოლოა, თუმცა პარადოქსულად, ამ პერიოდში საკმაოდ გავრცელებულია „გაზაფხულის დაღლილობა“ - მდგომარეობა, რომელიც ხასიათდება ენერგიის ნაკლებობით, ძილიანობით, კონცენტრაციის დაქვეითებითა და მოტივაციის შემცირებით.

რატომ ვგრძნობთ თავს დაღლილად?
გაზაფხულის დაღლილობის გამომწვევი მიზეზები მრავალფეროვანია:
ჰორმონალური დისბალანსი — ზამთრის „მოდუნებული“ რეჟიმიდან აქტიურ ფაზაში გადასვლა
ვიტამინების დეფიციტი — განსაკუთრებით ვიტამინი D და ვიტამინი B12
ამინდის ცვალებადობა — ტემპერატურის მკვეთრი ცვლილებები ორგანიზმს სტრესს უქმნის
დაბალი ფიზიკური აქტივობა ზამთარში — რაც გაზაფხულზე ენერგიის ნაკლებობით ვლინდება

როგორ დავძლიოთ გაზაფხულის დაღლილობა ბუნებრივად?

მიუხედავად იმისა, რომ ეს მდგომარეობა დროებითია, არსებობს ეფექტური გზები მის დასაძლევად: ვრცლად სტატია იხილეთ აქ.

ხელისუფლება ძეხვეულის შესახებ ტექნიკურ რეგლამენტის შემუშავებას გეგმავს - ამის შესახებ სურსათის ეროვნულ სააგენტოში ძეხვეულის მწარმოებლებთან შეხვედრისას გახდა ცნობილი. ინფორმაციას გარემოს დაცვისა და სოფლის მეურნეობის სამინისტრო ავრცელებს.

მათი ცნობით, შეხვედრაზე ხორცპროდუქტების ეტიკეტირების წესში ცვლილებების საკითხი განიხილეს.

გარემოს დაცვისა და სოფლის მეურნეობის მინისტრის მოადგილე ლაშა ავალიანმა ბიზნესსექტორის წარმომადგენლებთან ერთად მომხმარებლისათვის სურსათის შესახებ ინფორმაციის მიწოდების წესში დაგეგმილი ცვლილებები განიხილა.

"დისკუსიის ფორმატში მხარეებმა ძეხვეულის არსებული ეტიკეტირების პრაქტიკების გაუმჯობესებასა და მომხმარებლისთვის ზუსტი და ამომწურავი ინფორმაციის მიწოდების აუცილებლობაზე იმსჯელეს. აღინიშნა, რომ ახალი საკანონმდებლო ცვლილებების შემუშავების პროცესში მნიშვნელოვანია როგორც მომხმარებელთა უფლებების დაცვა, ასევე ბიზნესსექტორის ინტერესების გათვალისწინება.

აღნიშნული ცვლილებების მიზანია, მომხმარებლისთვის შეცდომაში შემყვანი ინფორმაციის მიწოდების რისკის მინიმუმამდე შემცირება, რაც დაეხმარება მყიდველს გააკეთოს ინფორმირებული არჩევანი. ცვლილებების ფარგლებში, საერთაშორისო სტანდარტების შესაბამისად, დაგეგმილია ძეხვეულის შესახებ ტექნიკური რეგლამენტის შემუშავება", - ნათქვამია გავრცელებულ ინფორმაციაში.

შეხვედრას სურსათის ეროვნული სააგენტოს უფროსის მოადგილე ვასილ კვერნაძე, გარემოს დაცვისა და სოფლის მეურნეობის სამინისტროსა და სურსათის დეპარტამენტის სპეციალისტები ასევე, ბიზნესის წარმომადგენლები ესწრებოდნენ.

ჭიათურის მაღაროების მმართველი კომპანია CMC, შუქრუთის მაღაროში მუშის გარდაცვალების ფაქტს ადასტურებს და გარდაცვლილის ოჯახსა და ახლობლებს სამძიმარს უცხადებს. ჭიათურა მანეჯმენტ კომპანიში აცხადებენ, რომ მათი ინფორმაციით, მომხდარ შემთხვევაში საწარმოო ტრავმას ადგილი არ ჰქონია. მათივე ცნობით, ისინი გამოძიებასთან თანამშრომლობენ.

განცხადებას უცვლელად გთავაზობთ:

"25 მარტს, შუქრუთის მაღაროს პირველი უბნის მესამე ცვლის სამუშაოს დასრულების შემდეგ, სამწუხარო შემთხვევა მოხდა. გარდაიცვალა CMC-ის ჭიათურა მენეჯმენტ კომპანიის თანამშრომელი. შემთხვევა იმ დროს მოხდა, როდესაც სამუშაო ცვლა უკვე დასრულებული იყო და დასაქმებულები იმყოფებოდნენ მაღაროს სამგზავრო-სარკინიგზო შემადგენლობაში ჩასხდომის ადგილზე.

ცნობისთვის, ეს არის ადგილი, სადაც თანამშრომლები იკრიბებიან მაღაროს გვირაბში სარკინიგზო შემადგენლობაში ჩასაჯდომად, რათა მაღაროს ზედაპირზე ამოვიდნენ. თვითმხილველების ინფორმაციით, ჯეირან ალსანდია მოულოდნელად ცუდად გახდა და მიწაზე დაეცა. ადგილზე მალევე გამოიძახეს სასწრაფო სამედიცინო დახმარების ჯგუფი, რომელმაც გარდაცვალების ფაქტი დააფიქსირა.

კომპანიის ინფორმაციით, მომხდარ შემთხვევაში საწარმოო ტრავმას ადგილი არ ჰქონია. მომხდართან დაკავშირებით დაიწყო გამოძიება. კომპანია CMC აქტიურად თანამშრომლობს საგამოძიებო უწყებებთან და დეტალურად აწვდის ყველა მოთხოვნილ ინფორმაციას. ვიდრე საქმეზე გამოძიება დასრულდება და გაირკვევა, რა გახდა ჩვენი თანამშრომლის გარდაცვალების მიზეზი, მოვუწოდებთ ყველა მხარეს, თავი შეიკავონ თემით სპეკულირებისგან.

კომპანია CMC ღრმა მწუხარებას გამოთქვამს თანამშრომლის გარდაცვალების გამო და სამძიმარს უცხადებს გარდაცვლილის ოჯახს, ახლობლებსა და კოლეგებს", - ნათქვამია კომპანიის განცხადებაში.

ცნობისთვის, შუქრუთის მაღაროში 25 მარტს მაღაროელის გარდაცვალების შესახებ ინფორმაციატარიელ მიქაცაძემ გაავრცელა.

იუსტიციის სახლების 15 ფილიალი მომხმარებლებს 28-29 მარტს, შაბათ-კვირასაც მოემსახურება. მიზეზი 2026 წლის 1 აპრილიდან მეწარმეთა შესახებ ახალი კანონის ამოქმედებაა, რომელიც 2022 წლამდე რეგისტრირებულ ბიზნესებს ამონაწერის განახლებას ავალდებულებს.

აღნიშნულის გამო ათიათასობით ბიზნესს სარეგისტრაციო მონაცემების ცვლილება და ახალ კანონმდებლობასთან შესაბამისობაში მოყვანა უწევს. თუკი ისინი აღნიშნულს ვერ მოასწრებენ, მაშინ 2026 წლის 1 აპრილიდან მათ რეგისტრაცია შეუჩერდებათ, რის გამოც ვეღარ გასცემენ ხელფასებს, გაეყინებათ საბანკო ანგარიშები და ვეღარ განკარგავენ ქონებას. ამის გამო იუსტიციის სახლებში ბიზნესების გაზრდილი მომართვიანობაა.

"იმისათვის, რომ მონაცემების შესაბამისობაში მოსაყვანად ბიზნესსუბიექტებმა მაქსიმალურად შეძლონ დარჩენილი დღეების გამოყენება, შაბათს და კვირას, 28 და 29 მარტს, იუსტიციის სახლის 15 ფილიალი, 10:00 - 17:00 საათამდე მომხმარებელს სპეციალურ რეჟიმში მოემსახურება. სერვისი შაბათს და კვირას ხელმისაწვდომი იქნება საქართველოს მასშტაბით ყველა მსხვილ ქალაქში: თბილისში მდებარე სამივე ფილიალში, ბათუმში მდებარე ორივე ფილიალში, ასევე რუსთავის, გორის, ბორჯომის,მარნეულის, ოზურგეთის, ფოთის, ქუთაისის, ხაშურის, ზუგდიდის და თელავის იუსტიციის სახლის ფილიალებში.

იმ ბიზნესსუბიექტებს, ვისაც ჯერ არ მოუყვანიათ მონაცემები კანონთან შესაბამისობაში, აქვთ შესაძლებლობა, დროულად ისარგებლონ შაბათს და კვირას შეთავაზებული სერვისით და თავიდან აიცილონ შეუსაბამობით გამოწვეული შედეგები.

სამუშაო გრაფიკსა და სხვა დამატებითი ინფორმაციის მიღება მომხმარებლებს იუსტიციის სახლისა და საჯარო რეესტრის ეროვნული სააგენტოს ფეისბუქ გვერდებზე ან სატელეფონო ცენტრის 2 405 405 საშუალებით შეუძლიათ.

მონაცემების კანონთან შესაბამისობაში მოყვანა სავალდებულოა 2022 წლის 1 იანვრამდე რეგისტრირებული შემდეგი საწარმოებისთვის: შეზღუდული პასუხისმგებლობის საზოგადოება, სოლიდარული პასუხისმგებლობის საზოგადოება, სააქციო საზოგადოება, კომანდიტური საზოგადოება, კოოპერატივი და უცხოური საწარმოს ფილიალი", - ნათქვამია იუსტიციის სამინისტროს მიერ გამოქვეყნებულ განცხადებაში.