2025 წლის 7 ოქტომბრიდან 6 დეკემბრის ჩათვლით, საერთაშორისო მნიშვნელობის მცხეთა-სტეფანწმინდა-ლარსის საავტომობილო გზის 126-ე კილომეტრზე ავტოტრანსპორტის მოძრაობა ნაწილობრივ შეიზღუდება.

ინფორმაციას საქართველოს რეგიონული განვითარებისა და ინფრასტრუქტურის სამინისტროს გზების დეპარტამენტი ავრცელებს.

უწყების ცნობით, შეზღუდვა დაკავშირებულია სტეფანწმინდა-გველეთის (კმ0–კმ4) მონაკვეთზე მიმდინარე სამშენებლო სამუშაოებთან, რაც ფერდის საექსკავაციო სამუშაოების ჩატარებას ითვალისწინებს.

„სამუშაოების უსაფრთხოდ შესრულების მიზნით, გზის აღნიშნულ მონაკვეთზე მოძრაობა ყოველდღიურად, დილის 06:00 საათიდან 10:00 საათამდე შეიზღუდება. დანარჩენ დროს ავტომანქანების გადაადგილება სავალ ნაწილზე სპეციალური რეჟიმით გაგრძელდება,“ — ნათქვამია დეპარტამენტის მიერ გავრცელებულ განცხადებაში.

გზების დეპარტამენტი მოსახლეობას მოუწოდებს, გადაადგილებისას გაითვალისწინონ აღნიშნული შეზღუდვები და დაიცვან საგზაო ნიშნებისა და რეგულაციების მოთხოვნები.

ეროვნული ბანკი მოქალაქეებს აფრთხილებს ვირტუალური აქტივის მომსახურება არ განახორციელონ არარეგისტრირებულ სუბიექტთან. საუბარია ვირტუალური აქტივების პროვაიდერებზე (VASP-ებზე), რომლებიც სებ-ის მიერ არ არიან რეგისტრირებული. ამასთან, სებ-ი აცხადებს

"ბოლო პერიოდში, ეროვნული ბანკი რეგულარულად ახდენს იმ პირთა იდენტიფიცირებას, რომლებიც საქართველოს ტერიტორიაზე, მათ შორის თავისუფალ ინდუსტრიულ ზონებში, შესაბამისი ნებართვის ან ავტორიზაციის გარეშე ახორციელებენ ვირტუალური აქტივის მომსახურებას.

როგორც მოგეხსენებათ, ეროვნული ბანკის საზედამხედველო უფლებამოსილება, მოიცავს ვირტუალური აქტივის მომსახურების პროვაიდერების საქართველოს ეროვნულ ბანკში სავალდებულო რეგისტრაციასა და რეგისტრაციის გაუქმებას, ადმინისტრატორთა შესაფერისობის კრიტერიუმების დადგენას, ფულის გათეთრებისა და ტერორიზმის დაფინანსების აღკვეთის ხელშეწყობის კუთხით ზედამხედველობას, წერილობითი მითითებების გაცემას, დამატებითი მოთხოვნების, შეზღუდვებისა და სანქციების დაწესებას. შეგახსენებთ, რომ კანონმდებლობის შესაბამისად, ვირტუალური აქტივის მომსახურების განხორციელების უფლებამოსილება შესაბამისი შეზღუდვების გათვალისწინებით აქვთ კომერციულ ბანკებს, მიკრობანკებს, მიკროსაფინანსო ორგანიზაციებსა და საბროკერო კომპანიებს.

ეროვნული ბანკის შესახებ ორგანული კანონის თანახმად, დაუშვებელია ვირტუალური აქტივის მომსახურების განხორციელება იმ პირის მიერ, რომელიც არ არის ეროვნული ბანკის მიერ რეგისტრირებული ვირტუალური აქტივის მომსახურების პროვაიდერი ან საფინანსო სექტორის წარმომადგენელი. გარდა ამისა, მარეგულირებელი კანონმდებლობით მინიჭებული აქვს ვირტუალური აქტივის მომსახურების განხორციელების უფლებამოსილება.

ასევე, "თავისუფალი ინდუსტრიული ზონების შესახებ" საქართველოს კანონის შესაბამისად, თავისუფალი ინდუსტრიული ზონა წარმოადგენს საქართველოს ტერიტორიის ნაწილს განსაზღვრული საზღვრებითა და კანონით მინიჭებული სპეციალური სტატუსით. შესაბამისად, პირმა, რომელიც აპირებს განახორციელოს ვირტუალური აქტივის მომსახურება საქართველოს ტერიტორიაზე, მათ შორის, ქვეყანაში მოქმედ თავისუფალ ინდუსტრიულ ზონებში, უნდა უზრუნველყოს შესაბამისი რეგისტრაცია.

საქართველოს ეროვნული ბანკი აფრთხილებს მოქალაქეებს, რომ ვირტუალური აქტივის მომსახურების მიღებამ ისეთი სუბიექტისგან, რომელიც არ ფლობს ზემოაღნიშნულ რეგისტრაციას, შესაძლოა გამოიწვიოს მათი შეცდომაში შეყვანა და ფინანსური ზარალი. სებ-ი მოგიწოდებთ, გამოიჩინოთ განსაკუთრებული სიფრთხილე და უპირველეს ყოვლისა გადაამოწმოთ, მსგავსი პირის სანდოობისა და საქმიანობის შესახებ მონაცემები. ამასთან, გთხოვთ მოგვაწოდოთ თქვენს ხელთ არსებული ინფორმაცია იმ პირების შესახებ, რომლებიც ვირტუალური აქტივის მომსახურებას ახორციელებენ ან შესაძლოა ახორციელებდნენ საქართველოს ეროვნულ ბანკში რეგისტრაციის გარეშე. დანაშაულის შესაძლო ნიშნების გამოვლენის შემთხვევაში, ეროვნული ბანკი აღნიშნულ ინფორმაციას მიაწვდის სამართალდამცავ ორგანოებს.

ვირტუალური აქტივის მომსახურების პროვაიდერების შესახებ ვრცელ ინფორმაციას, მათ შორის, რეგისტრირებული პროვაიდერების რეესტრსა და სამართლებრივ აქტებს შეგიძლიათ გაეცნოთ ეროვნული ბანკის ოფიციალურ ვებგვერდზე,"- ნათქვამია სებ-ის განცხადებაში.

პარალელურად, პარლამენტში დეპუტატების მიერ ინიცირებულია კანონპროექტი, რომელიც VASP-ებზე სებ-ის ზედამხედველობას აფართხოებს.

VASP-ების რეგულირების საკითხები ქართულ კანონმდებლობაში 2022 წლის 9 სექტემბერს განხორციელებული ცვლილებებით შევიდა, რის შედეგადაც სებ-მა 2023 წელს VASP-ების რეგისტრაცია დაიწყო.

დღეის მდგომარეობით რეგისტრირებულია 27 ვირტუალური აქტივის მომსახურების პროვაიდერი და კიდევ რამდენიმე სუბიექტის მიმართ მიმდინარეობს სარეგისტრაციო წარმოება. ვირტუალური აქტივის მომსახურების პროვაიდერზე ეროვნული ბანკის ზედამხედველობა დღეის მდგომარეობით შემოიფარგლება ვირტუალური აქტივის მომსახურების პროვაიდერის საქმიანობის რეგისტრაციითა და რეგისტრაციის გაუქმებით, ადმინისტრატორთა შესაფერისობის კრიტერიუმების დადგენით, ფულის გათეთრებისა და ტერორიზმის დაფინანსების აღკვეთის ხელშეწყობის მიზნით შემოწმებითა და რეგულირებით, ვირტუალური აქტივის გადაცემისას თანმხლები ინფორმაციის განსაზღვრით.

არქიმანდრიტი დოროთე ყურაშვილი მოქმედებს საკუთარი შეხედულების მიხედვით და არა პატრიარქის კურთხევით, - წერს სოციალურ ქსელში საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზმა ანდრია ჯაღმაიძე.

„ხშირად ისმის შეკითხვა:- არქიმანდრიტი დოროთე ყურაშვილი, საპროტესტო მოძრაობაში ჩართვით, გამოხატავს თუ არა ქართული ეკლესიის პოზიციას?

პასუხია: - არა, არქიმანდრიტი დოროთე ყურაშვილი მოქმედებს საკუთარი შეხედულების მიხედვით და არა პატრიარქის კურთხევით.

4 ოქტომბრის საპატრიარქოს განცხადებაში, მისი ოფიციალური პოზიციაა ასახული, არქიმანდრიტი დოროთეს ქმედება კი მის შინაასთან მოდის წინააღმდეგობაში.

საქართველოს საპატრიარქოს განცხადება:

არჩევნებს, საერთოდ ყველგან და საქართველოშიც, დაძაბული ფონი ახლავს. სამწუხაროდ, ჩვენთან მუდმივად არის მცდელობა იმისაც, რომ ამ დაძაბულობაში სასულიერო პირებიც ჩართონ, რაც არასწორია.

საქართველოს მართლმადიდებელი ეკლესია, როგორც ერის გამაერთიანებელი ძალა, არ შეიძლება პოლიტიკურ მხარედ წარმოჩინდეს; როგორც არაერთხელ გვითქვამს, ეკლესია ყოველთვის იყო და იქნება მშვიდობისა და ქრისტიანული ღირებულებების მხარდამჭერი და ემიჯნება რადიკალურ მოწოდებებსა და ისეთ ქმედებებს, რამაც შეიძლება დაპირისპირებას შეუწყოს ხელი.

არჩევნები იმიტომ ტარდება, რომ ხალხმა თავისი ნება ამ საშუალებით გამოხატოს.

ღმერთმა მშვიდობით აკურთხოს სრულიად საქართველო“, - წერს დეკანოზი ანდრია ჯაღმაიძე.

საქართველოს შინაგან საქმეთა სამინისტრო განცხადებას ავრცელებს.

„როგორც საზოგადოებისთვის ცნობილია, გუშინ გაიმართა შეკრება, რომლის გაცხადებული მიზანი ხელისუფლების დამხობა იყო. შეკრებამ მალევე მიიღო კანონსაწინააღმდეგო ხასიათი, რის შემდეგაც საქართველოს შინაგან საქმეთა სამინისტრომ უმაღლესი სამართლებრივი სტანდარტის შესაბამისად მიიღო პროპორციული ზომები კანონის დაცვის უზრუნველსაყოფად.

საქართველოს შინაგან საქმეთა სამინისტრო დღეს და მომდევნო დღეების განმავლობაში მიიღებს შესაბამის ზომებს კანონდამრღვევების დასადგენად და მათ მიმართ კანონის აღსასრულებლად.

ამასთან, გუშინ განვითარებული მოვლენებიდან გამომდინარე, გვაქვს საფუძველი მივიჩნიოთ, რომ დღეს და მომდევნო დღეების განმავლობაში გამართული ნებისმიერი შეკრება არის გუშინდელი მცდელობის გაგრძელება და მივიღებთ შესაბამის ზომებს, რათა საფრთხე არ შეექმნას საზოგადოებრივ წესრიგსა და უსაფრთხოებას. მოვუწოდებთ ყველას, მხედველობაში მიიღონ ეს გარემოება და თავი შეიკავონ ნებისმიერი ქმედებისგან, რომელიც მათ მიმართ სამართლებრივი ზომების მიღების საფუძველი შეიძლება გახდეს“, - ნათქვამია შსს-ს განცხადებაში.