საქართველოს საპატრიარქოში საქართველოს მართლმადიდებელი ეკლესიის წმინდა სინოდის სხდომა მიმდინარეობს.

როგორც ცნობილია, მღვდელმთავრები საქართველოს კათოლიკოს-პატრიარქის, ილია მეორის დაკრძალვის თაობაზე და მასთან დაკავშირებულ სხვადასხვა საკითხზე მსჯელობენ.

საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ განაცხადა, რომ სინოდის სხდომის დასრულების შემდეგ საზოგადოებას ეცნობება, რა გადაწყვეტილებები იქნება მიღებული.

ამასთან, სინოდის სხდომის დასრულების შემდეგ ილია მეორეს სამების ტაძარში გადაასვენებენ. საპატრიარქოს ინფორმაციით მსვლელობა 16:00 საათზე დაიწყება.

სრულიად საქართველოს კათოლიკოს-პატრიარქი ილია მეორე 17 მარტს 93 წლის ასაკში გარდაიცვალა.

საქართველოს კათალიკოს-პატრიარქის ილია მეორის გარდაცვალების გამო მსოფლიო ეკლესიები სამძიმრის წერილებს აქვეყნებენ. მათგან ერთ-ერთი პირველი კიევისა და სრულიად უკრაინის მიტროპოლიტი ეპიფანე იყო.

კიევისა და სრულიად უკრაინის მიტროპოლიტ ეპიფანეს სამძიმარი:

„ღრმა მწუხარებითა და თანაგრძნობით მივიღე ცნობა სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის გარდაცვალების შესახებ. იგი იყო საქართველოს მართლმადიდებელი ეკლესიის წინამძღოლი და სულიერი ლიდერი, რომლის ცხოვრებაც ღვთის, ეკლესიისა და ქართველი ხალხის მსახურებას მიეძღვნა.

მისი მრავალწლიანი საპატრიარქო მოღვაწეობის განმავლობაში, იგი მრავალი მორწმუნის სულიერ ორიენტირად რჩებოდა. იგი დაუღალავად ზრუნავდა რწმენის განმტკიცებაზე, ქრისტიანული ტრადიციების შენარჩუნებასა და სახელმწიფო ათეიზმის წლების შემდეგ საზოგადოების სულიერ აღორძინებაზე. ჩვენთვის განსაკუთრებით დასამახსოვრებელია ის ფაქტი, რომ მან მხარდაჭერა გამოუცხადა უკრაინას, რომელიც რუსეთის სრულმასშტაბიან აგრესიას განიცდის.

პატრიარქ ილია II-ის პიროვნებას განსაკუთრებული მნიშვნელობა ჰქონდა არა მხოლოდ საქართველოსთვის, არამედ მთელი მართლმადიდებლური სამყაროსთვის. მისი მოღვაწეობა შთააგონებდა ადამიანებს, ეხმარებოდა მათ განსაცდელის დაძლევასა და იმედის შენარჩუნებაში ყველაზე რთულ დროს, განსაკუთრებით რუსეთის მიერ პროვოცირებული ომების პერიოდში.

გულწრფელ სამძიმარს ვუცხადებ ეპისკოპატს, სამღვდელოებასა და საქართველოს მართლმადიდებელი ეკლესიის ყველა მრევლს, რომლებმაც დაკარგეს თავიანთი წინამძღოლი, ასევე ქართველ ხალხს, რომლისთვისაც იგი არა მხოლოდ პატრიარქი, არამედ ნამდვილი სულიერი მამა იყო.

ვლოცულობთ, რათა ჩვენმა ზეციერმა მამამ მიიბაროს თავისი მსახური სასუფეველში. უფალმა განუსვენოს ახლად შესვენებული კათოლიკოს-პატრიარქის ილია II-ის სულს თავის სასუფეველში, ხოლო ყველა მგლოვიარეს მიმადლოს ნუგეში, მშვიდობა და სულიერი ძალა. საუკუნო იყოს მისი ხსენება!“

რუმინეთის მართლმადიდებელი ეკლესიის პატრიარქ დანიელის სამძიმარი:

"საქართველოს მართლმადიდებელი ეკლესიის წმინდა სინოდს

ღრმა მწუხარებით მივიღეთ ცნობა ჩვენი ქრისტესმიერი საყვარელი ძმის, ნეტარხსენებული სრულიად საქართველოს კათოლიკოს-პატრიარქის, ილია II-ის ამ სოფლიდან გასვლის შესახებ. იგი იყო თანამედროვე მართლმადიდებლობის ღირსეული პიროვნება და სარწმუნოების მტკიცე აღმსარებელი, რომელიც სიბრძნით მწყემსავდა საქართველოს მართლმადიდებელ ეკლესიას როგორც განსაცდელის, ისე აღორძინების პერიოდში.

რუმინეთის მართლმადიდებელი ეკლესიის მღვდელმთავრების, სამღვდელოებისა და მრევლის სახელით, სამძიმარს ვუცხადებთ წმინდა სინოდის წევრებსა და სრულიად საქართველოს მართლმადიდებელ ეკლესიას".

ჰელსინკისა და სრულიად ფინეთის მთავარეპისკოპოსი ელია:

"საქართველოს პატრიარქი ილია II მიიცვალა. საუკუნო ხსენება! მარადიული ხსოვნა!".

საქართველოში აშშ-ის საელჩო ღრმა მწუხარებას გამოთქვამს საქართველოს კათოლიკოს-პატრიარქის ილია მეორის გარდაცვალების გამო.

„ღრმა მწუხარებას გამოვთქვამთ მისი უწმინდესობის, სრულიად საქართველოს კათოლიკოს-პატრიარქ ილია მეორის გარდაცვალების გამო. მისი ცხოვრება და უდიდესი ღვაწლი არასდროს მიეცემა დავიწყებას. დაე, მშვიდად განისვენოს მისმა სულმა“, – აღნიშნულია პოლონეთის საელჩოს განცხადებაში.

სრულიად საქართველოს კათოლიკოს-პატრიარქი ილია მეორე 17 მარტს 93 წლის ასაკში გარდაიცვალა.

გლოვის დღეებთან დაკავშირებით თბილისის მუნიციპალიტეტის ყველა ადმინისტრაციულ შენობაზე სახელმწიფო დროშები დაშვებულია.

სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის, ილია მეორის გარდაცვალებასთან დაკავშირებით საქართველოში გლოვა გამოცხადდა.

კათოლიკოს-პატრიარქი ილია მეორე 17 მარტს, 93 წლის ასაკში გარდაიცვალა.